ຊາວເມືອງຍິ້ມ ຂົວຂ້າມນໍ້າພີດ ເມືອງຍົມມະລາດ ສ້າງສຳເລັດ ເປີດນໍາໃຊ້ຢ່າງເປັນທາງການແລ້ວ

ຊາວເມືອງຍິ້ມ ຂົວຂ້າມນໍ້າພີດ ເມືອງຍົມມະລາດ ສ້າງສຳເລັດ ເປີດນໍາໃຊ້ຢ່າງເປັນທາງການແລ້ວ

11th April 2022 0 By Admin

ພິທີ ມອບ-ຮັບ ແລະ ເປີດການນຳໃຊ້ຂົວຂ້າມນໍ້າພີດ ບ້ານໂຄກສະຫວ່າງ ເມືອງຍົມມະລາດ ແຂວງຄຳມ່ວນ ຈັດຂຶ້ນເມື່ອບໍ່ດົນມານີ້ ໂດຍເປັນກຽດເຂົ້າຮ່ວມຂອງ ທ່ານ ວັນໄຊ ພອງສະຫວັນ ເຈົ້າແຂວງຄຳມ່ວນ, ມີບັນດາທ່ານການນຳຂອງແຂວງ, ບັນດາພະແນກການ, ການນຳເມືອງຍົມມະລາດ, ຂະແໜງການອ້ອມຂ້າງເມືອງ ຕະຫຼອດເຖິງປະຊາຊົນເຂົ້າຮ່ວມ.


ໂຄງການກໍ່ສ້າງຂົວຊຸມຊົນ ບ້ານໂຄກສະຫວ່າງ ແມ່ນເປັນປະເພດຂົວເບຕົງ ປະສົມໄມ້ ມີຄວາມຍາວ 115 ແມັດ, ກວ້າງ 3,5 ແມັດ, ມີຈຳນວນເສົາຂົວ 44 ເສົາ, ສາມາດຮອງຮັບນໍ້າໜັກໄດ້ 3,5 ໂຕນ ຊຶ່ງເປັນໂຄງການ ທີ່ໄດ້ຮັບການປະກອບສ່ວນຈາກຫຼາກພາກສ່ວນ ທັງພາກລັດ ແລະ ເອກະຊົນ ໂດຍບໍລິສັດ ເກດສຸວັນ ໄດ້ມີການ ປະກອບສ່ວນທາງດ້ານເຫຼັກ, ປູນຊີມັງ, ເຄື່ອງກົນຈັກໜັກ ແລະ ອື່ນໆ ມີທັງການປະກອບສ່ວນແບບຊ່ວຍເຫຼືອ ແລະ ການປະກອບສ່ວນໃນຮູບແບບຜູ້ຮັບເໝົາ ໂດຍບໍ່ຄິດກຳໄລ.

ສ່ວນທາງດ້ານແຮງງານຫຼັກແມ່ນນໍາໃຊ້ແຮງງານ ຂອງປະຊາຊົນໃນເຂດອ້ອມຂ້າງ ຊຶ່ງການກໍ່ສ້າງແມ່ນແບ່ງອອກເປັນ 2 ໄລຍະຄື: ໄລຍະທີ 1 ໃຊ້ເວລາການກໍ່ສ້າງ 14 ວັນ ກໍ່ສ້າງເສົາຂົວສຳເລັດ 30 ເສົາ ແລະ ໄລຍະທີ 2 ໃຊ້ເວລາ 36 ວັນ ກໍ່ສ້າງເສົາຂົວຕື່ມ 14 ເສົາ, ເສົາຫົວຂົວ 2 ເສົາ ພ້ອມປະກອບຂາງໄມ້ຕາມການອອກແບບ ຊຶ່ງການກໍ່ສ້າງແມ່ນໄດ້ສຳເລັດໃນວັນທີ 15 ທັນວາ 2021 ມີໄລຍະເວລາໃນການກໍ່ສ້າງແມ່ນ 50 ວັນ, ລວມມູຄ່າທັງໝົດ 1,08 ຕື້ກວ່າກີບ.


ທ່ານ ວັນໄຊ ພອງສະຫວັນ ໄດ້ກ່າວສະແດງຄວາມຍ້ອງຍໍຊົມເຊີຍ ຕໍ່ການຈັດຕັ້ງທຸກພາກສ່ວນ ທັງພາກລັດ ແລະ ເອກະຊົນ ທີ່ໄດ້ໃຫ້ການປະກອບສ່ວນ ພິເສດແມ່ນປະຊາຊົນທີ່ໄດ້ສຸມຈິດສຸມໃຈ ແລະ ເຫື່ອແຮງສະຕິປັນຍາເຂົ້າໃນຂະບວນການກໍ່ສ້າງຂົວຂ້າມນໍ້າພີດຈົນສຳເລັດ ຊຶ່ງການກໍ່ສ້າງດັ່ງກ່າວຈະເປັນຕົວແບບ ແລະ ແບບ ຢ່າງທີ່ດີນຳໄປສູ່ຂະບວນການອື່ນ ເພື່ອພັດທະນາສັງຄົມ ເຮັດໃຫ້ປະຊາຊົນມີຄວາມສະດວກສະບາຍໃນການສັນຈອນໄປ-ມາ ກໍຄືການດຳລົງຊີວິດ, ແລກປ່ຽນຊື້-ຂາຍ ສິນຄ້າ ແລະ ອື່ນໆ.

ຕໍ່ກັບຜົນສຳເລັດດັ່ງກ່າວນີ້ແມ່ນຮຽກຮ້ອງໃຫ້ອຳນາດການປົກຄອງ ແລະ ປະຊາຊົນຖືເປັນຊັບສົມບັດຂອງບ້ານ ເພື່ອພ້ອມກັນເປັນເຈົ້າການຕິດຕາມ, ກວດກາ ແລະ ບູລະນະປົກປັກຮັກສາ ເພື່ອເຮັດແນວໃດໃຫ້ຂົວດັ່ງກ່າວນຳໃຊ້ໃຫ້ເກີດປະໂຫຍດສູງສຸດ ແລະ ນຳໃຊ້ໄດ້ຢ່າງຍາວນານ. ພ້ອມນີ້ກໍສະເໜີໃຫ້ປະຊາຊົນ ພ້ອມກັນສຸມໃສ່ໃນການຜະລິດຕາມເງື່ອນໄຂ ແລະ ທ່າແຮງຂອງຕົນ ເພື່ອແກ້ໄຂຊີວິດການເປັນຢູ່ ແລະ ກາຍເປັນສິນຄ້າ ສ້າງລາຍຮັບເຂົ້າສູ່ຄອບຄົວ, ພ້ອມກັນປະຕິບັດມາດຕະການປ້ອງກັນການແຜ່ລະບາດຂອງພະຍາດໂຄວິດ-19 ແລະ ຊຸກຍູ້ປຸກລະດົມປະຊາຊົນ ກໍຄືສະມາຊິກພາຍໃນຄອບຄົວຜູ້ທີ່ຄົບເງື່ອນໄຂໄປສັກວັກຊິນ ເພື່ອສ້າງພູມຄຸ້ມກັນ ຕໍ່ການຕິດເຊື້ອ ແລະ ການເສຍຊີວິດຈາກພະຍາດຮ້າຍດັ່ງກ່າວ.

ຂ່າວ-ພາບ: ແຂວງຄຳມ່ວນ