ຈົກເງິນ 8 ລ້ານໂດລາສ້າງຫ້ອງບົ່ງມະຕິພະຍາດລະດັບສາກົນຢູ່ຫຼວງພະບາງ

ຈົກເງິນ 8 ລ້ານໂດລາສ້າງຫ້ອງບົ່ງມະຕິພະຍາດລະດັບສາກົນຢູ່ຫຼວງພະບາງ

22nd April 2022 0 By Education

ຕໍ່ໄປນີ້ຫຼວງພະບາງຈະມີ ຫ້ອງການພະຍາດ ແລະປິ່ນປົວທີ່ໄດ້ມາດຕະຖານສາກົນ ຄອຍບໍລິການປະຊາຊົນເພີ່ມອີກໜຶ່ງທາງເລືອກ ສຳລັບການປິ່ນປົວພະຍາດລະດັບ 30 ຕຽງ ຕາມແຜນ ສູນບົ່ງມະຕິພະຍາດແຫ່ງນີ້ຈະເລີ່ມລົງມືສ້າງພາຍໃນທ້າຍປີນີ້.


ບໍລິສັດ ໄຊມັງກອນ ການຢາ ຈໍາກັດຜູ້ດຽວ ລົງທຶນ 8 ລ້ານໂດລາສະຫະລັດ ສ້າງຕັ້ງສູນບົ່ງມະຕິພະຍາດ-ປິ່ນປົວສາກົນ 30 ຕຽງ ແລະຕຶກພັກຟຶ້ນ 50 ຕຽງ ໂດຍໄດ້ສໍາປະທານທີ່ດິນຂອງລັດ ໃນເນື້ຶອທີ່ 8.055 ຕາແມັດ ຢູ່ບ້ານພູໝອກ ນະຄອນຫຼວງພະບາງ, ແຂວງຫຼວງພະບາງ ເປັນເວລາ 35 ປີ.


ສໍາລັບເນື້ອທີ່ດິນທີ່ສໍາປະທານ 8.055 ຕາແມັດ ຢູ່ບ້ານພູໝອກ ແມ່ນຕິດກັບໂຮງໝໍແຂວງ ຫຼວງພະບາງ, ມີອາຍຸສັນຍາທັງໝົດ 35 ປີ(ເມື່ອຄົບສັນຍາສາມາດຕໍ່ສັນຍາໃໝ່ໄດ້), ມູນຄ່າການລົງທຶນ 8 ລ້ານໂດລາສະຫະລັດ,ຄ່າສໍາປະທານປີໜຶ່ງແມ່ນ 403 ໂດລາສະຫະລັດຕໍ່ປີແລະບໍລິສັດຍັງເຫັນດີສະໜັບສະໜູນງົບປະມານໃນການຈັດຕັ້ງປະຕິບັດສັນຍາໃຫ້ແກ່ພາກລັດຈໍານວນ 1.000 ໂດລາສະຫະລັດ ແລະ ທຶນຈົດທະບຽນ 2.400.000 ໂດລາສະຫະລັດ. ພ້ອມນັ້ນບໍລິສັດໄດ້ມອບເງິນຄໍ້າປະກັນໂຄງການຈໍານວນ 30.000 ໂດລາສະຫະລັດ, ເຊິ່ງເງິນດັ່ງກ່າວຈະໄດ້ສົ່ງຄືນບໍລິສັດພາຍ ຫຼັງໄດ້ກໍ່ສ້າງພື້ນຖານໂຄງລ່າງຂອງໂຄງການສໍາເລັດເກີນ 25%.

ອົງປະກອບຫຼັກການປິ່ນປົວມີ ການກວດ MRI ຫຼື ການຊ່ອງລະບົບໄຟຟ້າ,ປິ່ນປົວສະໝອງ-ເສັ້ນປະສາດ,ຜ່າຕັດຜ່ານທໍ່,ຍິງໜິ້ວ ແລະ ປິ່ນປົວມະເຮັງ,ມີຂະແໜງພາຍນອກ,ພາຍໃນ,ສຸກເສີນ,ປະສູດ-ພະຍາດຍິງ,ຂະແໜງເດັກ,ຫູ,ຕາ,ດັງ,ຄໍ ແລະ ແຂ້ວ,ຂະແໜງພາບລັງສີ ແລະ ຂະແໜງຜິວໜັງ.ເຊິ່ງການກໍ່ສ້າງແມ່ນຈະເລີ່ມໃນທ້າຍເດືອນ ຕຸລາ 2022ນີ້.


ພິທີລົງນາມເຊັນສັນຍາໃນ ວັນທີ 21 ເມສາ 2022 ນີ້ທີ່ຫ້ອງປະຊຸມພະແນກແຜນການ ແລະ ການລົງທຶນ ແຂວງຫຼວງພະບາງ ລະຫວ່າງ ທ່ານ ຈິນດາວົງ ໂພສີຄໍາ ຫົວໜ້າພະແນກແຜນການ ແລະ ການລົງທຶນ ແຂວງ ກັບ ທ່ານ ນາງ ແສງວອນ ຖັງ ປະທານ ບໍລິສັດ ໄຊມັງກອນ ຈໍາກັດຜູ້ດຽວ, ມີທ່ານເຈົ້ານະຄອນຫຼວງພະບາງ,ອໍານວຍການໂຮງໝໍແຂວງ, ມີບັນດາຫົວໜ້າພະແນກການອ້ອມຂ້າງທີ່ກ່ຽວຂ້ອງ ພ້ອມດ້ວຍພະນັກງານຂອງບໍລິສັດເຂົ້າຮ່ວມເປັນສັກຂີພິຍານ.