ຊົມເຊີຍ ມາອີກແຈ້ງການ! ເມືອງສີໂຄດຕະບອງ ແຈ້ງ ໃຫ້ໂຈະ ຫຼື ເລື່ອນການຈັດງານສັງສັນຕ່າງໆ

ຊົມເຊີຍ ມາອີກແຈ້ງການ! ເມືອງສີໂຄດຕະບອງ ແຈ້ງ ໃຫ້ໂຈະ ຫຼື ເລື່ອນການຈັດງານສັງສັນຕ່າງໆ

13th March 2020 0 By Education

ຊົມເຊີຍໃນຄວາມເອົາໃຈໃສ່ຂອງການນໍາທຸກຂັ້ນທີ່ເຫັນໄດ້ຄວາມສໍາຄັນໃນການຈໍາກັດການຈັດງານຕ່າງໆທີ່ມີຄົນເຂົ້າຮ່ວມຈໍານວນຫຼາຍ ເພື່ອຕ້ານໂຄວິດ-19 ດ້ວຍການອອກແຈ້ງການໂຈະງານຊຸມນຸມຕ່າງໆໄລ່ຫຼັງກັນມາແບບຕິດໆ ຫຼ້າສຸດ ເມືອງສີໂຄດຕະບອງ ນະຄອນຫຼວງວຽງຈັນ ກໍ່ໄດ້ອອກແຈ້ງການໃຫ້ໂຈະ ຫຼື ເລື່ອນຊົ່ວຄາວໃນການຈັດງານສັງສັນ, ງານບຸນປະເພນີຕ່າງໆ ເພື່ອປ້ອງກັນການລະບາດຂອງເຊື້ອໂຄວິດ-19

ອີງຕາມແຈ້ງການສະບັບເລກທີ  0212/ຈມ.ສບ ລົງວັນທີ 12 ມີນາ 2020 ໃຫ້ຮູ້ວ່າ: ເຈົ້າເມືອງສີໂຄດຕະບອງ ນະຄອນຫລວງວຽງຈັນ ມີຈຸດປະສົງແຈ້ງມາຍັງ ເລຂາພັກບ້ານ-ນາຍບ້ານ 60 ບ້ານທົ່ວເມືອງສີໂຄດຕະບອງ ຊາບວ່າ: ເພື່ອປ້ອງກັນ ແລະ ສະກັດກັ້ນ ບໍ່ໃຫ້ເກີດມີກໍລະນີຕິດເຊື້ອ ແລະ ການລະບາດຂອງພະຍາດອັກເສບປອດຈາກເຊື້ອຈຸລະໂລກສາຍພັນໃຫ່ມ ພະຍາດ ໂຄວິດ-19 (ໄວຣັດໂຄໂຣນາ) ໃນນະຄອນຫລວງວຽງຈັນ ກໍ່ຄືເມືອງສີໂຄດຕະບອງ ຂອງພວກເຮົາ.

ສະນັ້ນ, ຈື່ງແຈ້ງມາຍັງບັນດາທ່ານນາຍບ້ານ ເພື່ອໂຈະ ຫລື ເລື່ອນ ຫລື ຈຳກັດຜູ້ເຂົ້າຮ່ວມ ການຈັດງານປະເພນີ, ງານດອງ, ງານສ້າງສັນ ແລະ ກິດຈະກຳອື່ນໆ ທີ່ມີຈຳນວນຄົນເຂົ້າຮ່ວມຫລາຍ ລວມທັງການຈັດງານແຂ່ງຂັນກິລາຕ່າງໆອອກໄປ ຈົນກວ່າສະພາບການລະບາດຂອງພະຍາດ ໂຄວິດ-19 ສາມາດຄວບຄຸມໄດ້.

ຖ້າມີຄວາມຈຳເປັນຈະຕ້ອງເຮັດ ແມ່ນຕ້ອງໃຫ້ຄະນະຮັບຜິດຊອບ ຫລື ເຈົ້າພາບປະຕິບັດມາດຕະການ ປ້ອງກັນການຕິດເຊື້ອເຊັ່ນ: ສະແກນອຸນຫະພູມ, ຖ້າຫາກພົບຜູ້ໃດມີອາການໄຂ້, ໄອ ຫລື ຫາຍໃຈຍາກ ທີ່ເຂົ້າກັບນິຍາມຂອງພະຍາດ ໂຄວິດ-19 ແມ່ນບໍ່ອະນຸຍາດໃຫ້ເຂົ້າຮ່ວມງານຢ່າງເດັດຂາດພ້ອມທັງຕິດຕາມກວດກາ ແລະ ຈັດຕັ້ງປະຕິບັດຕາມແຈ້ງການສະບັບນີ້ຢ່າງເຄັ່ງຄັດ ຈົນກວ່າສະພາບຈະເຂົ້າສູ່ສະພາວະປົກກະຕິ.

ດັ່ງນັ້ນ, ຈື່ງແຈ້ງມາຍັງທ່ານ ເພື່ອຊາບ ແລະ ພ້ອມກັນຈັດຕັ້ງປະຕິບັດຕາມແຈ້ງການສະບັບນີ້ດ້ວຍ.