ຣັດເຊຍ ປະກາດຢຸດຕິສົ່ງກ໊າສໃຫ້ໂປແລນ ແລະ ບັລແກເຣຍ ເປັນ2 ຊາດທຳອິດ ຫຼັງບໍ່ຍອມຊຳລະຄ່າກ໊າສເປັນສະກຸນເງິນ ຣູເບີລ

ຣັດເຊຍ ປະກາດຢຸດຕິສົ່ງກ໊າສໃຫ້ໂປແລນ ແລະ ບັລແກເຣຍ ເປັນ2 ຊາດທຳອິດ ຫຼັງບໍ່ຍອມຊຳລະຄ່າກ໊າສເປັນສະກຸນເງິນ ຣູເບີລ

27th April 2022 0 By Admin

ສຳນັກຂ່າວຕ່າງປະເທລາຍງານວ່າ: ບໍລິສັດກາຊປຣອມ (Gazprom) ເຊິ່ງເປັນລັດວິສາຫະກິດດ້ານພະລັງງານລາຍໃຫຍ່ຂອງຣັດເຊຍ ໄດ້ແຈ້ງໃຫ້ໂປແລນ  ແລະ ບັລແກເຣຍ ຊາບວ່າ ບໍລິສັດໄດ້ຢຸດຕິການສົ່ງກ໊າສໄປຍັງ 2 ປະເທດດັ່ງກ່າວ ເລີ່ມແຕ່ເວລາ 8:00 ໂມງຂອງວັນທີ 27 ເມສາ 2022 (ຕາມເວລາທ້ອງຖິ່ນ) ເປັນຕົ້ນໄປ ເນື່ອງຈາກ ໂປແລນ ແລະ ບັລແກເຣຍ ບໍ່ຍອມຈ່າຍຄ່າພະລັງງານເປັນເງິນຣູເບິລ (ສະກຸນເງິນຣັດເຊຍ).


ການດຳເນີນການດັ່ງກ່າວ ເກີດຂຶ້ນ ຫຼັງຈາກທີ່ຣັດເຊຍໄດ້ປະກາດກ່ອນໜ້ານີ້ວ່າ ປະເທດທີ່ບໍ່ເປັນເພື່ອມິດກັບຣັດເຊຍຈະຕ້ອງຈ່າຍຄ່າກ໊າສ ເປັນສະກຸນເງິນຣູເບິລຂອງຣັດເຊຍເທົ່ານັ້ນ ຫາກບໍ່ດັ່ງນັ້ນຈະຕັດການສົ່ງກ໊າສໃຫ້ທັນທີ ເຊິ່ງທັງໂປແລນ ແລະ ບັລແກເຣຍ ໄດ້ປະຕິເສດທີ່ຈະຈ່າຍເງິນຕາມທີ່ຣັດເຊຍສະເໜີມາໂດຍຕະຫຼອດ.


ໃນໄຕມາດ 1 ຂອງປີນີ້ ບໍລິສັດກ໊າສແຫ່ງຊາດຂອງໂປແລນ (PGNiG) ໄດ້ນຳເຂົ້າກ໊າສຈາກຣັດເຊຍກວມເອົາ 53% ຂອງຈຳນວນກ໊າສທັງໝົດໃນໂປແລນ. ທັງນີ້ ບໍລິສັດ PGNiG ລະບຸວ່າ ການຢຸດຕິການສົ່ງອອກກ໊າສໄປຍັງໂປແລນຂອງຣັດເຊຍ ຖືວ່າ ເປັນການລະເມີດສັນຍາ ແລະ ບໍລິສັດຈະດຳເນີນຕາມຂັ້ນຕອນ ເພື່ອໃຫ້ຣັດເຊຍສົ່ງກ໊າສໃຫ້ຕາມສັນຍາທີ່ໄດ້ຕົກລົງກັນໄວ້.


ໃນຂະນະທີ່ບັລແກຣີທີ່ເພີ່ງພາກ໊າສຈາກຣັດເຊຍສູງເຖິງ 90% ຂອງປະລິມານການນຳໃຊ້ກ໊າສທົ່ວປະເທດ ລະບຸວ່າ ຈະດຳເນີນຕາມຂັ້ນຕອນ ເພື່ອຫາແຫຼ່ງກ໊າສຈາກທາງເລືອກອື່ນ ແຕ່ຂະນະນີ້ ຍັງບໍ່ທັນໄດ້ປະກາດໃຫ້ປະຊາຊົນຈຳກັດການໃຊ້ແກັສເທື່ອ.

ແນວໃດກໍຕາມ ເນື່ອງຈາກຂະນະນີ້ ສະຫະພາບເອີຣົບກຳລງກ້າວເຂົ້າສູ່ລະດູຮ້ອນ ເຮັດໃຫ້ຄວາມຕ້ອງການປະລິມານກ໊າສຫຼຸດລົງ ຈຶ່ງອາດຍັງມີຜົນກະທົບໜ້ອຍ ໂດຍຣັດເຊຍເປັນຜູ້ສະໜອງແກັສໃຫ້ແກ່ເອີຣົບກວມເອົາປະມານ 40% ຂອງປະລິມານການນຳໃຊ້ກ໊າສທັງໝົດໃນເອີຣົບ.