ສຸດທ້າຍ ການບິນໄທກໍ່ຈຳເປັນຕ້ອງລະດົມພະນັກງານພັກວຽກໂດຍສະໝັກໃຈ

ສຸດທ້າຍ ການບິນໄທກໍ່ຈຳເປັນຕ້ອງລະດົມພະນັກງານພັກວຽກໂດຍສະໝັກໃຈ

14th March 2020 0 By Education

ເປັນອີກໜຶ່ງບໍລິສັດສາຍການບິນທີ່ປະກາດຂໍຄວາມຮ່ວມມືຈາກພະນັກງານໃຫ້ອາສາສະໝັກລາພັກວຽກໂດຍບໍ່ຮັບເງິນເດືອນເນື່ອງຈາກໄດ້ຮັບຜົນກະທົບໜັກຈາກພະຍາດໂຄວິດ-19 ນັ້ນຄືການບິນໄທ ໂດຍຍອມຮັບວ່າຕອນນີ້ທຸລະກິດວິກິດແຮງ.

ທາງການບິນໄທແຈ້ງວ່າ ນັບແຕ່ເຂົ້າປີ 2020 ການລະບາດຂອງໄວຣັສອັກເສບປອດຮຸນແຮງຂຶ້ນນັບມື້ ເຊິ່ງຫຼາຍປະເທດໄດ້ຫ້າມປະຊາຊົນອອກນອກປະເທດ ຫຼື ປະເທດທີ່ບໍ່ມີການລະບາດກໍ່ຈະຫ້າມພົນລະເມືອງຂອງຕົນໄປຍັງປະເທດທີ່ມີການຕິດເຊື້ອແລ້ວ, ປະຊາຊົນໂດຍທົ່ວໄປບໍ່ກ້າອອກໄປໃສມາໃສ ເມື່ອເກີດຄວາມກັງວົນແບບນັ້ນ ກໍ່ໄດ້ສົງຜົນກະທົບໂດຍກົງຕໍ່ສາຍການບິນ ຜູ້ໂດຍສານຫຼຸດລົງຢ່າງໄວວາ ບໍລິສັດບໍ່ມີລາຍຮັບເຖິງຂັ້ນວິກິດ.

ການບິນໄທຍັງແຈ້ງອີກວ່ານັບແຕ່ມີການລະບາດຂອງພະຍາດຮ້າຍນີ້ ທາງບໍລິສັດໄດ້ພະຍາຍາມໃຊ້ຫຼາຍມາດຕະການເພື່ອປະຢັດຕົ້ນທຶນ ແລະຄືງການຢູ່ລອດຂອງພະນັກງານລວມທັງກິດຈະການບໍລິສັດ ເປັນຕົ້ນຍົກເລີກຖ້ຽວບິນຈຳນວນຫຼາຍ, ປັບຫຼຸດຄ່າໃຊ້ຈ່າຍໃນການບໍລິຫານຈັດການຕ່າງໆ, ຫຼຸດຜ່ອນການເຮັດວຽກເກີນເວລາ ແຕ່ໂຄວິດຍັງທະວີຄວາມຮຸນແຮງຂຶ້ນ ແລະບໍ່ອາດຄາດເດົາໄດ້ວ່າຈະແກ່ຍາວໄປອີກດົນປານໃດ ຈິ່ງຈຳເປັນຕ້ອງຫຼຸດຄ່າໃຊ້ຈ່າຍທຸກຢ່າງລົງປະມານ 30% ເປັນຢ່າງໜ້ອຍ.

ດັ່ງນັ້ນ ເພື່ອໃຫ້ພະນັກງານມີສ່ວນຮ່ວມໃນການແບ່ງເບົາພາລະຂອງບໍລິສັດໃນຍາມວິກິດ ຄະນະກຳມະການບໍລິຫານຝ່າຍນະໂຍບາຍ ຈິ່ງໄດ້ປະຊຸມກັນໃນວັນທີ 9 ມີນາ ຜ່ານມາ ໃນໂຄງການລາຢຸດວຽກໂດຍບໍ່ຮັບເງິນເດືອນ ດ້ວຍຄວາມສະໝັກໃຈຂອງພະນັກງານເອງ ມີຜົນນັບແຕ່ນີ້ຈົນຮອດວັນທີ 30 ມິຖຸນາ 2020.