ໂອກາດອອກຄວາມເຫັນຂອງປະຊາຊົນ ຕໍ່ມາດຕະການເປີດປະເທດ

ໂອກາດອອກຄວາມເຫັນຂອງປະຊາຊົນ ຕໍ່ມາດຕະການເປີດປະເທດ

30th April 2022 3 By Education

ຄະນະສະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19ໄດ້ອອກໜັງສືທາບທາມຄວາມຄິດເຫັນຈາກບັນດາກະຊວງ, ຂະແໜງການພາກລັດແລະເອກະຊົນ ມວນຊົນທຸກທົ່ວໜ້າໃຫ້ທຸກຄົນມີຄວາມເຫັນຕໍ່ມາດຕະການໃນການເຂົ້າ-ອອກ ສປປ ລາວ ໃນໄລຍະມີການລະບາດຂອງໂຄວິດ-19.

ໂດຍອີງຕາມການຕົກລົງຂອງຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ໃຫ້ຮູ້ວ່າ: ເນື່ອງຈາກການລະບາດຂອງພະຍາດໂຄວິດ-19 ແລະ ອັດຕາການຕາຍ ຢູ່ປະເທດເຮົາ ໄດ້ຫຼຸດຫນ້ອຍ ຖອຍລົງ ແລະ ອີງຕາມຄວາມຮຽກຮ້ອງຕ້ອງການຕົວຈິງ ເພື່ອຟື້ນຟູເສດຖະກິດ ໃນໄລຍະການລະບາດຂອງພະຍາດ ດັ່ງກ່າວ.

ຄະນະສະເພາະກິດ ຈຶ່ງໄດ້ປະສານສົມທົບກັບພາກສ່ວນກ່ຽວຂ້ອງຄົ້ນຄວ້າ ມາດຕະການໃນການເຂົ້າ-ອອກ ສປປ ລາວ ໃນໄລຍະໃຫມ່ ໃຫ້ສອດຄ່ອງກັບສະພາບຕົວຈິງ ໂດຍໄດ້ສົມທຽບກັບບົດຮຽນຕົວຈິງຢູ່ບັນດາປະເທດອ້ອມຂ້າງເຊັ່ນ: ສສ ຫວຽດນາມ, ຣາຊະອານາຈັກກໍາປູເຈຍ ແລະ ຣາຊະອານາຈັກໄທ.

ສະນັ້ນ, ເພື່ອຮັບປະກັນຄວາມ ກຽມພ້ອມຮອບດ້ານ ແລະ ການມີສ່ວນຮ່ວມ ຂອງທົ່ວສັງຄົມ ຢ່າງກວ້າງຂວາງ, ຈຶ່ງຂໍທາບທາມຄໍາເຫັນ ຂອງບັນດາ ທ່ານ ຕໍ່ບັນດາມາດຕະການ ທີ່ຈະນໍາສະເຫນີ ຕໍ່ລັດຖະບານ ພິຈາລະນາຮັບຮອງໃນຂັ້ນຕໍ່ໄປ ດັ່ງນີ້:
ເຫັນດີໃຫ້ມີການຜ່ອນຜັນມາດຕະການເຂົ້າ-ອອກ ສປປ ລາວ ດັ່ງນີ້:  ເປີດດ່ານສາກົນທຸກດ້ານ ສໍາລັບການເຂົ້າ-ອອກ ຂອງພົນລະເມືອງລາວ ແລະ ຄົນຕ່າງປະເທດ. ໂດຍໃຫ້ຜົນລະເມືອງຂອງບັນດາປະເທດທີ່ມີສັນຍາຍົກເວັ້ນວິຊາ ກັບ ສປປ ລາວ ແບບສອງຝ່າຍ ຫຼື ຝ່າຍດຽວ ສາມາດເດີນທາງເຂົ້າ ສປປ ລາວ ໂດຍບໍ່ຈໍາເປັນຕ້ອງຂໍວິຊາ.


ສໍາລັບພົນລະເມືອງ ຂອງບັນດາປະເທດ ທີ່ ບໍ່ມີສັນຍົກເວັ້ນວິຊາ ກັບ ສປປ ລາວ, ແມ່ນ ສາມາດເອົາວິຊາ ເຂົ້າ ສປປ ລາວ ໄດ້ ໂດຍຜ່ານລະບົບ F-VISA ຫຼື ເອົາ ວີຊາກັບດ່ານ ຢູ່ ດ່ານສາກົນ ທີ່ມີເງື່ອນໄຂ.
ກ່ອນການເດີນທາງ, ໃຫ້ມີໃບຢັ້ງຢືນຜົນກວດ RT PCR ພາຍໃນ 72 ຊົ່ວໂມງ ສໍາລັບຜູ້ທີ່ບໍ່ທັນມີ ໃບຢັ້ງຢືນສັກວັກຊີນຄົບໂດສູ້ ໃຫ້ມີໃບຢັ້ງຢືນຜົນກວດດ້ວຍເຄື່ອງກວດແບບໄວ (ATF) ພາຍໃນ 24 ຊົ່ວໂມງ ສໍາລັບຜູ້ສັກວັກຊີນ ຄົບໂດສ, ເມື່ອເດີນທາງມາຮອດ ສປປ ລາວ ແລ້ວ ແມ່ນ ຈະບໍ່ມີການກວດຕົວຢ່າງ ຢູ່ສະຫນາມບິນ ຫຼື ຢູ່ດ່ານຊາຍແດນສາກົນ ທາງບົກ ຫຼື ທາງເຮືອ.

ສໍາລັບຄົນຕ່າງປະເທດ ທີ່ເດີນທາງເຂົ້າມາ ສປປ ລາວ ຕ້ອງມີປະກັນໄພໂຄວິດ-19 ໃນວົງເງິນຄຸ້ມຄອງ 10.000 ໂດລາສະຫະລັດ ຍົກເວັ້ນຜູ້ທີ່ໃຊ້ປຶ້ມຜ່ານແດນ (Border Pass) ຫຼື ໃບຜ່ານແດນ (Temporary Border Pass)
ໃຫ້ປັບປຸງຂັ້ນຕອນຕ່າງໆ ເມື່ອເດີນທາງມາຮອດ ສປປ ລາວ ຄື: ເຫັນດີໃຫ້ຜູ້ທີ່ເດີນທາງເຂົ້າມາຮອດ ສປປ ລາວ ແມ່ນ ສາມາດນໍາໃຊ້ພາຫະນະໃດຫນຶ່ງ ຕາມຄວາມສະດວກ, ແຕ່ຕ້ອງປະຕິບັດຕາມມາດຕະການປ້ອງກັນການຕິດເຊື້ອ ແລະ ແຜ່ເຊື້ອ ຢ່າງເຂັ້ມງວດ.


ພ້ອມດຽວກັນນີ້ໃຫ້ຫນ່ວຍງານອໍານວຍຄວາມສະດວກໃນການຂົນສົ່ງຜູ້ໂດຍສານ ແລະ ສິນຄ້າ ຂອງຄະນະສະເພາະກິດ ປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-i9 ປະສານສົມທົບກັບພາກສ່ວນກ່ຽວຂ້ອງຄົ້ນຄວ້າ ຂັ້ນຕອນຕ່າງໆ ເພື່ອຮັບປະກັນຄວາມສະດວກໃນການເຂົ້າປະເທດ.

ເຫັນດີດ້ານຫຼັກການ ໃຫ້ເອກະຊົນ ມີສ່ວນຮ່ວມໃນການບໍລິການ ດ້ານການກວດວິເຄາະ ແລະ ປິ່ນປົວ ຕາມລະບຽບການ.
ມອບໃຫ້ຂະແຫນງສາທາລະນະສຸກ ກະກຽມຮອບດ້ານ ເພື່ອຮັບປະກັນ ການກວດວິເຄາະ ແລະ ປິ່ນປົວ ຢ່າງ ມີປະສິດທິຜົນ.
ທ່ານໃດທີ່ມີຄວາມຄິດເຫັນຢາກສົ່ງຫາຄະນະສະເພາະກິດສາມາດສົ່ງເປັນລາຍລັກອັກສອນເຖິງກອງເລຂາຄະນະສະເພາະກິດ ທີ່ຫ້ອງວ່າການສໍານັກງານ ນາຍົກລັດຖະມົນຕີ ຫຼື ສົ່ງຄໍາເຫັນຜ່ານເວັບໄຊ, ສື່ອອນລາຍ ຫຼື ອີເມວ ຄື: www.laogoo.gov.la; www.Ovid19.gov.la; Facebook page: ສູນຂ່າວສານການແພດສຸຂະສຶກສາ Centre of Information and Education for Health; ອີເມວ: info@mict.gov.la ຫຼື cabinet@mict.gov.la ກ່ອນວັນທີ 03 ພຶດສະພາ 202.