ອັງກິດ ກຽມປະຈຳການທະຫານໃນຢູໂຣບຄັ້ງໃຫຍ່ທີ່ສຸດນັບແຕ່ສົງຄາມເຢັນ ດຶງຄວາມເຄັ່ງຕຶງກັບຣັດເຊຍ ທະວີຂຶ້ນ

ອັງກິດ ກຽມປະຈຳການທະຫານໃນຢູໂຣບຄັ້ງໃຫຍ່ທີ່ສຸດນັບແຕ່ສົງຄາມເຢັນ ດຶງຄວາມເຄັ່ງຕຶງກັບຣັດເຊຍ ທະວີຂຶ້ນ

2nd May 2022 0 By Admin

ສຳນັກຂ່າວ RT ລາຍງານອ້າງອີງຖະແຫຼງການຂອງກະຊວງປ້ອງກັນປະເທດສະຫະຣາຊອານາຈັກວ່າ: ຈະສົ່ງກອງກຳລັງອັງກິດຫຼາຍພັນຄົນໄປປະຈຳການຢູ່ຫຼາຍປະເທດໃນຢູໂຣບຕັ້ງແຕ່ນອດມາຊີໂດເນຍ ເຖິງຟິນແລນ ໃນອີກບໍ່ເທົ່າໃດເດືອນຕໍ່ຈາກນີ້ ເພື່ອເຂົ້າຮ່ວມການຊ້ອມຮົບໃຫຍ່ຂອງນາໂຕ້, ຟິນແລນ ແລະ ສະວີເດັນ.


ຄາດວ່າຈະມີທະຫານອັງກິດຫຼາຍເຖິງ8 ພັນຄົນເຂົ້າປະຈຳການໃນປະເທດດັ່ງກ່າວ ຊ່ວງເດືອນເມສາ ເຖິງມິຖຸນາ. ບໍ່ພຽງເທົ່ານັ້ນ ຍັງມີລົດຕັງ ແລະ ລົດຫຸ້ມເກາະ ລວມຫຼາຍຮ້ອຍຄັນເຂົ້າຮ່ວມການຊ້ອມຮົບນຳອີກ.

ຄວາມຈິງແລ້ວແຜນສົ່ງທະຫານອັງກິດໄປປະຈຳການໃນຢູໂຣບ ມີມາດົນແລ້ວ ແຕ່ເລັ່ງໃຫ້ໄວຂຶ້ນ ຈາກປະຕິບັດການທາງທະຫານຂອງຣັດເຊຍໃນຢູເຄນ. ດັ່ງນັ້ນ ກະຊວງປ້ອງກັນປະເທດຂອງອັງກິດ ອະທິບາຍວ່າ: ການຊ້ອມຮົບທີ່ກຳລັງຈະເກີດຂຶ້ນ ຈະສະແດງໃຫ້ເຫັນເຖິງແສນຍານຸພາບ ແລະ ຄວາມສຳຄັນຂອງທະຫານອັງກິດຕໍ່ຄວາມໝັ້ນຄົງໃນຢູໂຣບ.


ປັດຈຸບັນທະຫານອັງກິດຈຳນວນໜຶ່ງໄດ້ເຂົ້າຮ່ວມການຝຶກຊ້ອມ ທາງການທະຫານຮ່ວມກັບກອງກຳລັງສະຫະລັດອາເມຣິກາໃນໂປແລນຢູ່ແລ້ວ ຂະນະທີ່ທະຫານບາງສ່ວນໄດ້ຖືກສົ່ງໄປຟິນແລນນຳ ເຊິ່ງມີຊາຍແດນຕິດກັບຣັດເຊຍຍາວ1.300ກິໂລແມັດ.
ຂະນະທີ່ຣັດເຊຍ ຕໍ່ຕ້ານການຊ້ອມຮົບເຫຼົ່ານີ້ ລວມເຖິງການຊ່ອງສຸມກອງກຳລັງນາໂຕ້ໃກ້ຊາຍແດນຕິດກັບຣັດເຊຍມາໂດຍຕະຫຼອດ ໂດຍຊີ້ວ່າອາດສ່ຽງນຳໄປສູ່ການຜະເຊີນໜ້າທາງທະຫານໄດ້.