ກຸ່ມຜະລິດກະສິກຳ 5 ບ້ານຢູ່ເມືອງປາກລາຍ  ໄດ້ຮັບລົດໄຖນາໃຫຍ່ ນໍາໃຊ້ເຂົ້າໃນການຜະລິດ

ກຸ່ມຜະລິດກະສິກຳ 5 ບ້ານຢູ່ເມືອງປາກລາຍ ໄດ້ຮັບລົດໄຖນາໃຫຍ່ ນໍາໃຊ້ເຂົ້າໃນການຜະລິດ

4th May 2022 0 By Admin

ຂປລ. ແຫລ່ງຂ່າວຈາກ ເມືອງປາກລາຍ ແຂວງໄຊຍະບູລີ ໃຫ້ຮູ້ວ່າ: ເມື່ອບໍ່ດົນມານີ້, ປົກຄອງເມືອງປາກລາຍ ກໍຄື ພະແນກກະສິກໍາ ແລະ ປ່າໄມ້ແຂວງ ໄດ້ມອບລົດໄຖນາໃຫຍ່ຈໍານວນ 11 ຄັນ ຮອບທີ 1 ໃຫ້ກຸ່ມການຜະລິດ ບ້ານປ່າໄລ, ບ້ານບວມເລົາ-ຜາແກ້ວ, ບ້ານຂອນແກ່ນ, ບ້ານແສນພົນ ແລະ ບ້ານລາດສະຫວ່າງ ລວມມູນຄ່າ 2 ຕື້ກວ່າກີບ ພາຍໃຕ້ການສະໜັບສະໜູນໂຄງການຜະລິດກະສິກໍາເປັນສິນຄ້າຢູ່ ສປປ ລາວ ເຊິ່ງຕາງໜ້າມອບໂດຍ ທ່ານ ກອງສີ ວົງສີ ເຈົ້າເມືອງປາກລາຍ ແລະ ຮັບໂດຍຫົວໜ້າກຸ່ມຜະລິດກະສິກໍາໃນ 5 ບ້ານດັ່ງກ່າວ.


ລົດໄຖນາ ທີ່ໄດ້ຮັບໃນຄັ້ງນີ້, ທາງໂຄງການຜະລິດກະສິກໍາເປັນສິນຄ້າຢູ່ ສປປ ລາວ ໄດ້ສົມທົບທຶນ 80% ແລະ 20% ແມ່ນມອບໃຫ້ກຸ່ມການຜະລິດກະສິກໍາ ເປັນຜູ້ຮັບຜິດຊອບ ເພື່ອຮັບໃຊເຂົ້າໃນການຜະລິດກະສິກໍາ ໃຫ້ມີຄວາມສະດວກສະບາຍ, ທັງຮັບປະກັນທາງດ້ານຜົນຜະລິດເພິ່ມຂຶ້ນ ແລະ ຫັນການຜະລິດກະສິກໍາ ໄປສູ່ທັນສະໄໝເທຶ່ອລະກ້າວ.


ໂອກາດນີ້, ທ່ານ ສຸລິຈັນ ສີປະມວນ ຫົວໜ້າຫ້ອງການກະສິກໍາ ແລະ ປ່າໄມ້ເມືອງ ປາກລາຍ ໄດ້ໃຫ້ຮູ້ວ່າ: ໂຄງການຜະລິດກະສິກໍາເປັນສິນຄ້າຢູ່ ສປປ ລາວ ເປັນໂຄງການທີ່ໄດ້ຮັບທຶນກູ້ຢືມຈາກທະນາຄານໂລກຈໍານວນ 29,3 ລ້ານໂດລາສະຫະລັດ ເຊິ່ງໄດ້ເຊັນສັນຍາ ແລະ ອານຸມັດໃນເດືອນພຶດສະພາ 2018 ມີ 5 ແຂວງເປົ້າໝາຍ ຄື: ແຂວງໄຊຍະບູລີ, ວຽງຈັນ, ນະຄອນຫລວງວຽງຈັນ, ບໍລິຄໍາໄຊ ແລະ ແຂວງຄໍາມ່ວນ ໂດຍສະເພາະແມ່ນຜະລິດເຂົ້າ, ສາລີ ແລະ ພືດຜັກ.

ສໍາລັບ ຢູ່ເມືອງປາກລາຍ ພືດທີ່ເປັນຈຸດສຸມໃນການສົ່ງເສີມ ແມ່ນການຜະລິດສາລີເປັນສິນຄ້າ ຕິດພັນກັບການປູກພືດຕະກຸນຖົ່ວ ໂດຍໄດ້ກໍານົດກຸ່ມການຜະລິດ 31 ກຸ່ມ, ມີ10 ບ້ານເປົ້າໝາຍ, ມີເນື້ອທີ່ 3.942 ເຮັກຕາ, ມີ 1.504 ຄອບຄົວ ໂດຍໄດ້ຂຶ້ນແຜນຄວາມຕ້ອງການລົດໄຖນາໃຫຍ່ 31 ຄັນ ແລະ ໄດ້ຮັບຮອບມີ 1 ຈໍານວນ 11 ຄັນໃຫ້ກຸ່ມການຜະລິດ 5 ບ້ານດັ່ງກ່າວ.