ຂົວຂ້າມນ້ຳຂອງ ລາວ-ໄທ ແຫ່ງທີ V ບໍລິຄໍາໄຊ-ບຶງການ ມີຄວາມຄືບໜ້າ 32%

ຂົວຂ້າມນ້ຳຂອງ ລາວ-ໄທ ແຫ່ງທີ V ບໍລິຄໍາໄຊ-ບຶງການ ມີຄວາມຄືບໜ້າ 32%

5th May 2022 0 By Admin

ຂປລ. ແຫລ່ງຂ່າວຈາກ ແຂວງບໍລິຄຳໄຊ ໃຫ້ຮູ້ວ່າ: ໂຄງການກໍ່ສ້າງຂົວມິດຕະພາບ ລາວ-ໄທ ແຫ່ງທີ V (ບໍລິຄໍາໄຊ-ບຶງການ) ສະເພາະເບື້ອງລາວ ໄດ້ແບ່ງອອກເປັນສອງສັນຍາ ຄື: ສັນຍາທີ 1 ແມ່ນສັນຍາກໍ່ສ້າງຂົວຂ້າມນໍ້າຂອງ ແລະ ສັນຍາທີ 2 ແມ່ນສັນຍາກໍ່ສ້າງທາງເຂົ້າຂົວ ແລະ ກໍ່ສ້າງອາຄານດ່ານກວດຄົນເຂົ້າ-ອອກເມືອງ, ມີມູນຄ່າລວມທັງໝົດ 1,1 ຕື້ກວ່າບາດ, ສະເລ່ຍຄວາມຄືບໜ້າທັງ 2 ສັນຍາ ຕາມແຜນການລວມຮອດທ້າຍເດືອນ 03/2022 ເທົ່າກັບ 31,95%, ປະຕິບັດໄດ້ຕົວຈິງ 40,88%, ລື່ນຄາດໝາຍ 8,92%.


ທ່ານ ໄລທອງ ພົມມະວົງ ຫົວໜ້າໂຄງການກໍ່ສ້າງຂົວຂ້າມນໍ້າຂອງແຫ່ງທີ 5 ເບື້ອງລາວ ໄດ້ໃຫ້ສຳພາດຕໍ່ສື່ມວນຊົນແຂວງບໍລິຄຳໄຊ ເມື່ອບໍ່ດົນນີ້ວ່າ: ໂຄງການດັ່ງໄດ້ເລີ່ມລົງມືກໍ່ສ້າງມາແຕ່ຕົ້ນປີ 2021 ສັນຍາທີ 1 ກໍ່ສ້າງຂົວປະຕິບັດໄດ້ເລັດແລ້ວ 32,7 %, ລື່ນແຜນການ 14 %, ປັດຈຸບັນ ກຳລັງສຸມໃສ່ການກໍ່ສ້າງໃນສັນຍາທີ 1 ເປັນສໍາຄັນ ໂດຍສະເພາະແມ່ນການເຈາະ ແລະ ເທເບຕົງເສົາເຂັມທີ່ຍັງເຫລືອຢູ່ເສົາຂົວກາງນ້ຳໃຫ້ສຳເລັດກ່ອນລະດູຝົນທີ່ຈະມາເຖິງນີ້ ຈຳນວນ 8 ຕົ້ນ ຢູ່ກາງຂອງ 3 ຕົ້ນ ແລະ ຢູ່ເທິງບົກ 5 ຕົ້ນ, ການກໍ່ສ້າງພົບສິ່ງທ້າທາຍຫລາຍດ້ານ ເປັນຕົ້ນ ການລະບາດຂອງເຊື້ອພະຍາດໂຄວິດ-19, ການປ່ຽນແປງສະພາບດິນຟ້າອາກາດ, ຝົນຕົກແຕ່ຫົວປີ ແລະ ປັດໄຈອື່ນທີ່ປິ່ນອ້ອມ ເຮັດໃຫ້ນໍ້າຂອງຂຶ້ນລົງຜິດປົກກະຕິ.


ທ່ານ ໄລທອງ ພົມມະວົງ ຍັງໄດ້ໃຫ້ຮູ້ຕື່ມອີກວ່າ: ສໍາລັບການກໍ່ສ້າງສັນຍາ 2 ຄື ການກໍ່ສ້າງອາຄານດ່ານ ແລະ ເສັ້ນທາງ ເຫັນວ່າປະຕິບັດໄດ້ 49% ລື່ນແຜນ 4% ຄາດວ່າທ້າຍເດືອນພຶດສະພາປີ 2022 ນີ້ ຈະໃຫ້ສຳເລັດປູເບຕົງເສັ້ນທາງ, ອາຄານດ່ານຈະເລັ່ງໃຫ້ໄດ້ມຸງຫລັງຄາ ເພື່ອສ້າງສິ່ງອຳນວຍການກໍ່ສ້າງດ້ານອື່ນໆ ໃນໄລຍະລະດູຝົນ ຄາດວ່າທັງສອງສັນຍາ ຈະໃຫ້ສຳເລັດໃນທ້າຍປີ 2023 ຕາມສັນຍາ.