ມີທັງຂ່າວດີແລະຂ່າວຮ້າຍ ລາຄານ້ຳມັນປ່ຽນໃໝ່ມື້ນີ້

ມີທັງຂ່າວດີແລະຂ່າວຮ້າຍ ລາຄານ້ຳມັນປ່ຽນໃໝ່ມື້ນີ້

10th May 2022 0 By Education

ເປັນຂ່າວທີ່ໜ້າຍິນດີສຳລັບຜູ້ໃຊ້ນ້ຳມັນແອັດຊັງທຳມະດາ ແລະກາຊວນ ແຕ່ກໍ່ບໍ່ດີປານໃດສຳລັບຜູ້ໃຊ້ແອັດຊັງພິເສດ ເນື່ອງຈາກມີທັງປັບຂຶ້ນ ແລະປັບລົງ ລາຄານ້ຳມັນຢູ່ປະເທດເຮົາ ຫຼັງກະຊວງອຸດສາຫະກຳ ແລະການຄ້າແຈ້ງປັບລາຄານ້ຳມັນໃນຂອບເຂດທົ່ວປະເທດມື້ນີ້.


ໂດຍກະຊວງອຸດສາຫະກຳ ແລະ ການຄ້າ ໄດ້ອອກແຈ້ງການ ສະບັບເລກທີ 0557/ອຄ ລົງວັນທີ 10 ພຶດສະພາ 2022 ເຖິງ: ສະມາຄົມນໍ້າມັນເຊື້ອໄຟ ແລະ ອາຍແກ໊ສ, ບັນດາບໍລິສັດນໍ້າມັນເຊື້ອໄຟ ແລະ ປໍ້າຂາຍຍ່ອຍນໍ້າມັນເຊື້ອໄຟ. ກ່ຽວກັບການແຈ້ງປັບລາຄາຂາຍຍ່ອຍນໍ້າມັນເຊື້ອໄຟ ໃນຂອບເຂດທົ່ວປະເທດ.


ລາຄາໃໝ່ນີ້ແມ່ນໃຫ້ເລີ່ມປະຕິບັດ ວັນທີ 10 ເມສາ 2022 ເວລາ 14:00 ໂມງ ໃນຂອບເຂດທົ່ວປະເທດ. ເຊິ່ງການປັບລາຄານໍ້າມັນເຊື້ອໄຟຄັ້ງນີ້ແມ່ນໄດ້ຫຼຸດອາກອນຊົມໃຊ້ນໍ້າມັນກາຊວນຈາກ 21% ມາເປັນ 11%, ຫຼຸດອາກອນຊົມໃຊ້ນໍ້າມັນແອັດຊັງທຳມະດາ ຈາກ 31% ມາເປັນ 16%. ພ້ອມໄດ້ປັບລາຄາຂາຍຍ່ອຍນໍ້າມັນເຊື້ອໄຟທຸກຊະນິດຄື: ນໍ້າມັນແອັດຊັງພິເສດ ປັບຂຶ້ນ 1.580 ກີບຕໍ່ລິດ; ແອັດຊັງທຳມະດາ ປັບລົງ 760 ກີບຕໍ່ລິດ ແລະ ກາຊວນ ປັບລົງ 170 ກີບຕໍ່ລິດ.


ການຄິດໄລ່ເສຍພັນທະ ແລະ ຄ່າທຳນຽມຕ່າງໆແມ່ນໃຫ້ພາກສ່ວນກ່ຽວຂ້ອງ ຄິດໄລ່ຕາມທີ່ໄດ້ກຳນົດໄວ ໃນໂຄງສ້າງລາຄານໍ້າມັນເຊື້ອໄຟ ສະບັບເລກທີ 0340/ກຄພນ ລົງວັນທີ 10 ພຶດສະພາ 2022 ຈົນກວ່າຈະມີການປ່ຽນແປງ.