ຜົ້ງສາລີຈິງຈັງ! ໃຊ້ມາດຕະການ 16 ຂໍ້ ປ້ອງກັນໂຄວິດ-19

ຜົ້ງສາລີຈິງຈັງ! ໃຊ້ມາດຕະການ 16 ຂໍ້ ປ້ອງກັນໂຄວິດ-19

16th March 2020 0 By Education

ຕໍ່ກັບສະພາບການລະບາດຂອງເຊື້ອໄວຣັດໂຄວິດ-19 ທີ່ກໍາລັງລະບາດເປັນວົງກ້ວາງ ແລະ ຮ້າຍຢູ່ຫຼາຍປະເທດໃນທົ່ວໂລກ ເຮັດໃຫ້ລາວເຮົາຕ້ອງມີມາດຕະການອັນເຂັ້ມງວດເພື່ອປ້ອງກັນເຊື້ອພະຍາດດັ່ງກ່າວ ເນື່ອງຈາກປະເທດໃກ້ຄຽງ ເປັນຕົ້ນແມ່ນຫວຽດນາມ, ໄທ, ຈີນ ລ້ວນແຕ່ມີການລະບາດຂອງເຊື້ອພະຍາດນີ້ຢູ່. ແນວໃດກໍ່ຕາມ, ຫຼ້າສຸດ ແຂວງຜົ້ງສາລີ ກໍ່ໄດ້ມີມາດຕະການເຄັ່ງຄັດເພື່ອປະຕິບັດຕາມການຊີ້ນໍາຂອງຂັ້ນເທີງໃນການປ້ອງກັນ, ສະກັດກັ້ນເຊື້ອພະຍາດດັ່ງກ່າວ ໂດຍອອກແຈ້ງ ກໍານົດ 16ຂໍ້ເພື່ອຕ້ານກັບເຊື້ອພະຍາດນີ້.

ອີງຕາມແຈ້ງການຂອງຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງເຊື້ອພະຍາດ ໂຄວິດ-19 ແຂວງຜົ້ງສາລີ ສະບັບເລກທີ 0252/ຈຂ.ສພກ.ຜລ, ລົງວັນທີ 16 ມີນາ 2020 ໃຫ້ຮູ້ວ່າ: ເນື່ອງຈາກສະພາບການລະບາດໂຄວິດ-19 ໃນຫຼາຍປະເທດໄດ້ຂະຫຍາຍເປັນວົງກ້ວາງ, ສືບຕໍ່ມີກໍລະນີຕິດເຊື້ອ ແລະ ເສຍຊີວິດເພີ່ມໃນແຕ່ລະວັນ, ອົງການອະນາໄມໂລກໄດ້ປະເມີນວ່າ ພະຍາດໂຄວິດ-19 ແມ່ນມີຄວາມສ່ຽງສູງທີ່ຈະແຜ່ລະບາດໄປທົ່ວໂລກ. ດັ່ງນັ້ນ ເພື່ອຮັບປະກັນ ການກັນ ແລະ ຄວບຄຸມບໍ່ໃຫ້ມີການຕິດເຊື້ອ ແລະ ແຜ່ລະບາດຂອງໂຄວິດ-19 ຢູ່ແຂວງຜົ້ງສາລີ ຈຶ່ງອອກແຈ້ງການໃຫ້ທຸກພາກສ່ວນປະຕິບັດຕາມຂໍ້ແນະນໍາດັ່ງລຸ່ມນີ້:

1 ການຈັດງານສະເຫຼີມສະຫຼອງວັນສໍາຄັນຂອງພັກ-ຂອງຊາດ, ກຸດສົງການປີໃໝ່ລາວ ທີ່ມີຄົນເຂົ້າຮ່ວມຈໍານວນຫຼາຍນັ້ນ ໃຫ້ໂຈະຊົ່ວຄາວ ຫຼື ເລື່ອນການຈັດງານອອກໄປກ່ອນຕາມທິດຊີ້ນໍາຂອງສູນກາງພັກ ແລະ ລັດຖະບານ. ແຕ່ການກະກຽມແມ່ນໃຫ້ສືບຕໍເປັນຕົ້ນແມ່ນຍດ້ານເນື້ອໃນ, ການປັັກທຸງຊາດ, ທຸງພັກ, ທຸງທິວ ແລະ ການປະຕິບັດຕາມຮີດຄອງປະເພນີ.

2 ໃຫ້ທຸກພາກສ່ວນທັງພາກລັດ, ເອກະຊົນ ແລະ ສ່ວນບຸກຄົນໂຈະ ຫຼື ເລື່ອນການຈັດງານປະເພນີ, ງານດອງ, ງານສ້າງສັນ, ການປະຊຸມທາງການ, ການຈັດຕະຫຼາດນັດ ແລະ ກິດຈະກໍາອື່ນໆ ທີ່ມີຄົນເຂົ້າຮ່ວມຫຼາຍ ລວມທັງການຈັດງານແຂ່ງຂັນກິລາປະເພດຕ່າງໆອອກໄປ. ຖ້າກໍລະນີມີຄວາມຈໍາເປັນຕ້ອງເຮັດ ເຈົ້າພາບຕ້ອງປະຕິບັດມາດຕະການປ້ອງກັນການຕິດເຊື້ອເຊັ່ນ: ສະແກນອຸນຫະພູມ, ຖ້າພົບເຫັນຜູ້ໃດມີອາການໄຂ້, ໄອ ຫຼື ຫາຍໃຈຍາກ ທີ່ເຂົ້ານິຍາມຂອງໂຄວິດ-19 ແມ່ນບໍ່ອະນຸຍາດໃຫ້ເຂົ້າງານຢ່າງເດັດຂາດ.

3 ບັນດາເຈົ້າຂອງກິດຈະການຕ່າງໆ ເປັນຕົ້ນ ໂຮງແຮມ, ເຮືອນພັກ, ຮ້ານອາຫານ, ສະຖານບັນເທີງ, ບໍລິສັດທ່ອງທ່ຽວ ແລະ ສະຖານທີ່ທ່ອງທ່ຽວ ຕ້ອງມີພະນັກງານກວດກາຜູ້ຄົນເຂົ້າມາພັກເຊົາ, ມາໃຊ້ບໍລິການ ຫຼື ເຂົ້າມາທ່ອງທ່ຽວ ໃນຂອບເຂດຄວາມຮັບຜິດຊອບຂອງຕົນຢ່າງເຂັ້ມງວດ, ຖ້າພົບເຫັນກໍລະນີສົງໄສຕ້ອງລາຍງານໃຫ້ສາທາແຂວງຮັບຮູ້ໂດຍດ່ວນ.

4 ໃຫ້ທຸກຄົນໃນທົ່ວແຂວງຜົ້ງສາລີ ຈົ່ງພ້ອມກັນຢຸດຕິຊົ່ວຄາວ ໃນການເຂົ້າຮ່ວມຊຸມແຊວ, ເຂົ້າຮ້ານອາຫານແບບເປັນຈໍານວນຫຼາຍຄົນ, ຫຼີກລ່ຽງການສໍາຜັດ ຈັບມື ຫຼື ກອດ ໃຫ້ໃຊ້ເປັນການນົບທັກທາຍກັນແທນ.

5 ໃນໄລຍະຕິດຕາມ ປ້ອງກັນ, ຕ້ານ ແລະ ຄວບຄຸມການແຜ່ລະບາດຂອງເຊື້ອໄວຣັດໂຄວິດ-19 ນີ້ ແມ່ນອະນຸຍາດໃຫ້ເປີດບໍລິການແຕ່ດ່ານຊາຍແດນ ຄື: ດ່ານປາງຫົກ ເມືອງໃໝ່, ດ່ານລານຕຸ້ຍ ເມືອງຍອດອູ ແລະ ດ່ານປ່າຄາ ເມືອງບຸນເໜືອ, ສ່ວນດ່ານຊາຍແດນອື່ນໆ ຂອງແຂວງ ເປັນຕົ້ນ ດ່ານແມັງກວາຜົງ, ດ່ານຊີປາຝິ່ນ, ດ່ານຫ້ວຍເຮ້ຍ, ດ່ານຫ້ວຍລາ, ດ່ານປາກເທີມ, ດ່ານປາຈ່າ ແລະ ດ່ານປະເພນີອື່ນໆ ໃນຂອບເຂດທົ່ວແຂວງ ແມ່ນໃຫ້ປິດບໍລິການຊົ່ວຄາວກ່ອນ ແຕ່ເຈົ້າໜ້າທີ່ຢູ່ດ່ານ ຕ້ອງສືບຕໍ່ປະຈໍາການປົກກະຕິ ເພື່ອປປ້ອງກັນບໍ່ໃຫ້ມີການເຂົ້າອອກຢ່າງເດັດຂາດ ຫາກຈໍາເປັນແມ່ນໃຫ້ໄປຜ່ານຢູ່ 3ດ່ານທີ່ກ່າວມາຂ້າງເທິງ.

ພາບປະກອບ

6 ການເປີດໃຫ້ບໍລິການຢູ່ 3ດ່ານທີ່ກ່າວມາ ແມ່ນໃຫ້ປະຕິບັດດັ່ງນີ້: ສໍາລັບການເຂົ້າ-ອອກຜ່ານດ່ານຂອງລົດໂດຍສານ, ນັກທ່ອງທ່ຽວ ໃນໄລຍະນີ້ແມ່ນໃຫ້ໂຈະກ່ອນ; ການນໍາເຂົ້າແຮງງານ, ອຸປະກອນກໍ່ສ້າງໂຄງການໃຫຍ່ ແລະ ການສົ່ງອອກສິນຄ້າກະສິກໍາທີ່ຈໍາເປັນ ຕ້ອງແຈ້ງເປັນລາຍລັກອັກສອນໃຫ້ເຈົ້າໜ້າທີ່ປະຈໍາດ່ານກ່ອນ 14ວັນ. ສໍາລັບຄົນແມ່ນຕ້ອງມີການຢັ້ງຢືນສຸຂະພາບຈາກທ່ານໝໍວ່າໄດ້ຕິດຕາມຜູ້ກ່ຽວເປັນເວລາ 14ວັນແລ້ວ ຖ້າບໍ່ມີພະຍາດຈຶ່ງໃຫ້ເຂົ້າມາໄດ້ ແລະ ການເຂົ້າມາແມ່ນໃຫ້ໄປບ່ອນປາຍທາງທີ່ຜູ້ກ່ຽວມີຈຸດປະສົງຈະໄປເລີຍ ບໍ່ອະນຸຍາດໃຫ້ມາພັກແຮມຄືນຢູ່ໂຮງແຮມ, ເຮືອນພັກ ໃນເທດສະບານຂອງແຕ່ລະເມືອງ.

ນອກຈາກນີ້, ໃຫ້ເຈົ້າໜ້າທີ່ທຸກພາກສ່ວນທີ່ປະຈໍາຢູ່ 3ດ່ານ ເອົາໃຈໃສ່ປະຕິບັດໜ້າທີ່ຂອງຕົນຢ່າງເຂັ້ມງວດ ໂດຍສະເພາະການກວດສຸຂະພາບຄົນ, ກວດເອກະສານຢັ້ງຢືນຕ່າງໆ, ພ້ອມທັງສີດຢາຂ້າເຊື້ອ ແລະ ປະຕິບັດມາດຕະການໃນການປ້ອງກັນຕ່າງໆ ຢ່າງເຂັ້ມງວດຕາມຫຼັກວິຊາການ ຂອງແຕ່ລະພາກວສ່ວນ ແລະ ໃຫ້ຖືເປັນການປະຕິບັດງານທີ່ມີຄວາມຮັບປະກັນທີ່ສຸດ ເພື່ອບໍ່ໃຫ້ພະຍາດໂຄວິດ-19 ລະບາດເຂົ້າຜົ້ງສາລີເດັດຂາດ.

ພາບປະກອບ

7 ມອບໃຫ້ສາທາແຂວງ ແຕ່ງຕັ້ງທີມແພດຂອງໂຮງໝໍແຂວງ, ເມືອງ, ສຸກສາລາ ຜູ້ທີ່ມີຄວາມຮູ້ ມີຄວາມຮັບຜິດຊອບສູງ ໄປປະຈໍາຢູ່ 3 ດ່ານ, ດ່ານລະ 4ຄົນ ເພື່ອປະຕິບັດໜ້າທີ່ໃນການກວດສຸຂະພາບ, ກວດເອກະສານຢັ້ງຢືນການຕິດຕາມສຸຂະພາບ ແລະ ອື່ນໆ ຂອງຄົນທີ່ເຂົ້າ-ອອກຜ່ານດ່ານຢ່າງເຂັ້ມງວດຕາມຫຼັກວິຊາການ, ພ້ອມນັ້ນ ກໍ່ຈັດໃຫ້ມີສະຖານທີ່, ວັດຖຸອຸປະກອນ ແລະ ທີມງານວິຊາການແພດທີ່ມີຄວາມພ້ອມ ເພື່ອຮັບມືຕໍ່ການລະບາດຂອງພະຍາດດັ່ງກ່າວ, ຖ້າພົບເຫັນກໍລະນີສົງໄສ ຕ້ອງເອົາໃຈໃສ່ແກ້ໄຂຢ່າງທັນການ ແລະ ລາຍງານຕໍ່ຂັ້ນເທິງ ເພື່ອຮັບຊາບ ແລະ ມີທິດຊີ້ນໍາໃນການແກ້ໄຂໂດຍດ່ວນ.

8 ມອບໃຫ້ສາທາແຂວງ, ກອງບັນຊາການ ປກສ ແຂວງ ແລະ ພະແນກ ຖວທ ແຂວງ ແຕ່ງຕັ້ງທີມງານວິຊາການລົງກວດກາຢູ່ບັນດາໂຮງແຮມ, ເຮືອນພັກ, ຮ້ານອາຫານ, ສະຖານທີ່ບັນເທີງ, ບໍລິສັດ ແລະ ສະຖານທີ່ທ່ອງທ່ຽວ, ຜູ້ປະກອບການທີ່ນໍາໃຊ້ແຮງງານລາວ, ແຮງງານຕ່າງປະເທດ ເປັນປົກກະຕິ 3 ວັນຕໍ່ຄັ້ງຕໍ່ສະຖານທີ່ນັ້ນ ເພື່ອຮັຍປະກັນບໍ່ໃຫ້ມີການຕິດເຊື້ອພະຍາດດັ່ງກ່າວ ແລະ ຖືເອົາ ສາທາ ເປັນກອງເລຂາໃນການຕິດຕາມການລະບາດຂອງພະຍາດດັ່ງກ່າວ.

9 ມອບໃຫ້ອົງການປົກຄອງເມືອງ ແຕ່ງຕັ້ງທີມງານ ເພື່ອສຶກສາອົບຮົມປະຊາຊົນຢູ່ລຽບຕາມຊາຍແດນ ສປຈີນ, ຫວຽດນາມ ແລະ ຊາຍແດນບັນດາແຂວງ ໃຫ້ຮັບຮູ້, ເຂົ້າໃຈເຖິງການລະບາດ ແລະ ຄວາມອັນຕະລາຍຂອງພະຍາດນີ້.

10 ມອບໃຫ້ ສາທາແຂວງ ປະສານຫາພະແນການຕ່າງປະເທດແຂວງ ເພື່ອປະສານ ແລກປ່ຽນບົດຮຽນ ການປ້ອງກັນ, ຄວບຄຸມ ແລະ ຕອບໂຕ້ກັບພະຍາດນີ້ ກັບນະຄອນພູເແີ້ ແລະ ກິ່ງແຂວງສິບສອງພັນນາ ແຫ່ງ ສປ ຈີນ.

11 ມອບໃຫ້ ຖວທ ແຂວງ ເປັນເຈົ້າການໃນການຈັດຕັ້ງຜັນຂະຫຍາຍຄໍາສັ່ງສະບັບນີ້ຜ່ານໂທລະໂຄ່ງ, ວິທະຍຸ, ສື່ອອນລາຍ ໃຫ້ທຸກຄົນໄດ້ຮັບຮູ້ຢ່າງທົ່ວເຖິງ.

12 ມອບໃຫ້ ພະແນກ ສສກ ອອກແຈ້ງການໃຫ້ບັນດາໂຮງຮຽນແຫ່ງຕ່າງໆ ໃນທົ່ວແຂວງ ເປັນເຈົ້າການໃນການຕິດຕາມກວດນັກຮຽນຂອງຕົນຢ່າງໃກ້ຊິດ, ຫາກໂຮງຮຽນໃດພົບກໍລະນີສົງໄສຖືກຕາມນິຍາມໂຄວິດ-19 ແມ່ນຈະໄດ້ນໍາສົ່ງໄປໂຮງໝໍຢ່າງຮີບດ່ວນ ເພື່ອຕິດຕາມ ແລະ ກວດຫາເຊື້ອພະຍາດດັ່ງກ່າວ ຫຼື ໂຮງຮຽນໃດມີການລະບາດເກີດຂຶ້ນ ຕ້ອງມີການໂຈະການຮຽນການສອນຊົ່ວຄາວ ຈົນກວ່າສະພາບຈະສະຫງົບລົງ ຈຶ່ງເປີດຮຽນຕໍ່

ພາບປະກອບ

13 ມອບໃຫ້ທຸກພາກສ່ວນ ຈົ່ງພ້ອມກັນຈັດຕັ້ງຜັນຂະຫຍາຍແຈ້ງການສະບັບນີ້ລົງຮອດຮາກຖານປະຊາຊົນ ແລະ ພາກສ່ວນຕ່າງໆ ເພື່ອຈັດຕັ້ງປະຕິບັດຢ່າງເຂັ້ມງວດ.

14 ຮຽກຮ້ອງມາຍັງພໍ່ແມ່ປະຊາຊົນ ໃນແຂງຜົ້ງສາລີ ຈົ່ງມີສະຕິລະວັງຕົວ ເປັນເຈົ້າຕົນເອງ ປ້ອງກັນການລະບາດຂອງພະຍາດນີ້, ເອົາໃຈໃສ່ຕິດຕາມ ແລະ ຮ່ວມມືປະຕິບັດຕາມວິທີການ, ມາດຕະການ ທີ່ຄະນະສະເພາະກິດລັດຖະບານວາງອອກ.

15 ບຸກຄົນ ຫຼື ການຈັດຕັ້ງທີ່ຈະລົງຂ່າວຜ່ານສື່ສັງຄົມຕ່າງໆກ່ຽວກັບການປ້ອງກັນ, ຕ້ານ ແລະ ຄວບຄຸມການລະບາດຂອງເຊື້ອໄວຣັດໂຄວິດ-19 ຕ້ອງໄດ້ຮັບອະນຖຍາດຈາກພາກສ່ວນກ່ຽວຂ້ອງ ແລະ ເປັນຂໍ້ມູນທີ່ຖືກຕ້ອງກັບຄວາມເປັນຈິງ, ຖ້າຫາກລົງຂ່າວບໍ່ມີມູນຄວາມຈິງເຊິ່ງສ້າງຄວາມຫຍຸ້ງຍາກແກ່ບຸກຄົນ, ການຈັດຕັ້ງ ແລະ ສັງຄົມ ຜູ້ລົງຂ່າວດັ່ງກ່າວຕ້ອງຮັບຜິດຊອບຜົນເສຍຫາຍທັງໝົດ ແລະ ຮັບຜິດຊອບຕາມລະບຽບກົດໝາຍທີ່ກ່ຽວຂ້ອງ.

16 ຖ້າພາກສ່ວນໃດຝ່າຝືນ ແລະ ບໍ່ຈັດຕັ້ງປະຕິບັດຕາມແຈ້ງການສະບັບນີ້ ຈະຖືກສຶກສາອົບຮົມ, ກ່າວເຕືອນ ແລະ ປະຕິບັດຕາມກົດໝາຍ ພ້ອມທັງຮັບຜິດຊອບຕໍ່ຜົນເສຍຫາຍທີ່ເກີດຂຶ້ນທັງໝົດ.