ເຊັນສັນຍາສ້າງຕັ້ງວິສາຫະກິດປະສົມ ບໍລິສັດ ພັດທະນານິຄົມອຸດສາຫະກໍາວຽງຈັນ  ເຊິ່ງຈະລົງທຶນ 500 ຕື້ກີບ ເຂົ້າພັດທະນາ 3 ຂົງເຂດ

ເຊັນສັນຍາສ້າງຕັ້ງວິສາຫະກິດປະສົມ ບໍລິສັດ ພັດທະນານິຄົມອຸດສາຫະກໍາວຽງຈັນ ເຊິ່ງຈະລົງທຶນ 500 ຕື້ກີບ ເຂົ້າພັດທະນາ 3 ຂົງເຂດ

11th May 2022 0 By Admin

ເມື່ອບໍ່​ດົນມານີ້ ທີ່ຫ້ອງການປົກຄອງນະຄອນຫຼວງວຽງຈັນ (ນວ) ໄດ້ມີພິທີເຊັນສັນຍາຮ່ວມທຶນເພື່ອສ້າງຕັ້ງວິສາຫະກິດປະສົມ ບໍລິສັດ ພັດທະນານິຄົມອຸດສາຫະກໍາວຽງຈັນ ຈໍາກັດ, ລະຫວ່າງ ອົງການປົກຄອງນະຄອນຫຼວງວຽງຈັນ ຕາງໜ້າລົງນາມໂດຍ ທ່ານ ສີລິລາດທົງສິນ ທອງເພັງ ຫົວໜ້າພະແນກການເງິນ ນະຄອນຫຼວງວຽງຈັນ ແລະ ຕາງໜ້າພາກທຸລະກິດຂອງສະພາການຄ້າ ແລະ ອຸດສາຫະກຳ ນະຄອນຫຼວຽງຈັນ ໂດຍທ່ານ ສັງຄົມ ຈັນສຸກ ປະທານສະພາການຄ້າ ແລະ ອຸດສາຫະກຳ ນະຄອນຫຼວຽງຈັນ ທັງເປັນຜູ້ອໍານວຍການໃຫຍ່ ບໍລິສັດ ພັດທະນານິຄົມອຸດສາຫະກໍາວຽງຈັນ ຈໍາກັດ, ໃຫ້ກຽດເຂົ້າຮ່ວມຂອງທ່ານ ພູຂົງ ບັນນະວົງ ຮອງເຈົ້າຄອງນະຄອນຫຼວງວຽງຈັນ, ມີຄະນະບໍລິຫານງານ, ຫົວໜ້າພະແນກ, ເຈົ້າເມືອງ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.


ການສ້າງຕັ້ງວິສາຫະກິດປະສົມ ມີຊື່ວ່າ: ບໍລິສັດ ພັດທະນານິຄົມອຸດສາຫະກໍາວຽງຈັນ ຈໍາກັດ (ພນອວ), ໂດຍອີງຕາມຂໍ້ຕົກລົງຂອງທ່ານເຈົ້າຄອງນະຄອນຫຼວງວຽງຈັນ ສະບັບເລກທີ 272/ຈນວ, ລົງວັນທີ 1 ເມສາ 2022 ວ່າດ້ວຍການສ້າງຕັ້ງວິສາຫະກິດປະສົມລະຫວ່າງອົງການປົກຄອງ ນະຄອນຫຼວງວຽງຈັນ ແລະ ສະພາການຄ້າ ແລະ ອຸດສາຫະກຳ ນະຄອນຫຼວງວຽງຈັນ.


ການ​ສ້າງ​ຕັ້ງບໍລິສັດ​ດັ່ງ​ກ່າວ, ດ້ວຍທຶນຈົດທະບຽນ 10 ຕື້ກີບ, ການລົງທຶນທັງໝົດ 500 ຕື້ກີບ. ໃນນັ້ນ, ພາກລັດແມ່ນອົງການປົກຄອງນະຄອນຫຼວງວຽງຈັນ ຕາງໜ້າໂດຍພະແນກການເງິນນະຄອນຫຼວງວຽງຈັນ ຖືຮຸ່ນ 25%, ສຳລັບພາກເອກກະຊົນແມ່ນຕາງໜ້າພາກທຸລະກິດຂອງສະພາການຄ້າ ແລະ ອຸດສາຫະກຳນະຄອນຫຼວງວຽງຈັນ ຖືຮຸ້ນ 75%. ໃນ​ນີ້, ທ່ານ ສັງຄົມ ຈັນສຸກ ຖືຮຸ້ນ 38% ແລະ ທ່ານ ຄຳໝັ້ນ ໄຊຍະແສງ ຖືຮຸ້ນ 37%.


ສຳລັບການດຳເນີນທຸລະກິດຂອງບໍລິສັດ ພັດທະນານິຄົມອຸດສາຫະກຳວຽງຈັນ ຈຳກັດ ມີເປົ້າໝາຍໃນການພັດທະນາ ໂດຍອີງໃສ່ແຜນຍຸດທະສາດໃນການພັດທະນານະຄອນຫຼວງວຽງຈັນໃຫ້ເປັນເມືອງທີ່ສະອາດ, ສວຍສົດງົດງາມ ແລະ ໜ້າຢູ່, ບໍລິສັດມີຈຸດສຸມຈະດຳເນີນການສຳຫຼວດເວນຄືນເນື້ອທີ່ດິນຂອງເຂດນິຄົມອຸດສາຫະກຳ ນະຄອນຫຼວງວຽງຈັນ ໃນເນື້ອທີ່ດິນ 99,57 ເຮັກຕາ, ສຳລັບໂຄງການພັດທະນາໄລຍະ 1 ຕາມທີ່ທາງບໍລິສັດໄດ້ອອກແບບ ແລະ ປະເມີນໃນບົດວິພາກເສດຖະກິດແລ້ວແບ່ງອອກເປັນ 3 ເຂດພັດທະນາໃນເບື້ອງຕົ້ນຄື: ເຂດໂລຈິສຕິກ, ເຂດອຸດສາຫະກຳສີຂຽວ, ເຂດການຄ້າ ແລະ ທີ່ພັກອາໄສ.


ສຳລັບໂຄງການພັດທະນາໄລຍະ 2 ຈະສົມທົບກັບພາກສ່ວນທີ່ກ່ຽວຂ້ອງໃນການກໍານົດເຂດໃນການພັດ ທະນານິຄົມ ອຸດສາຫະກຳ ນະຄອນຫຼວງວຽງຈັນ ລວມມີ: ເຂດອຸດສາຫະກຳ ປະເພດ I (UA) ເຂດອຸດສາຫະກໍາປະເພດ II (UB), ເຂດອຸດສາຫະກໍາປະເພດ I (UC), ເຂດທີ່ພັກອາໄສ ແລະ ການຄ້າ, ເຂດສາທາລະນະ ແລະ ຂົນສົ່ງໂດຍສານ, ເຂດກະສິກຳສົ່ງອອກ, ເຂດລະບົບສາງ ແລະ ຂົນສົ່ງສິນຄ້າ, ເຂດການຄ້າ ແລະ ບໍລິການຂາຍຍ່ອຍ, ເຂດການຄ້າສາກົນ, ເຂດບໍາບັດນໍ້າເປື້ອນ, ເຂດສີຂຽວ ແລະ ເຂດຈັດສັນຖະໜົນຫົນທາງ.


ນອກຈາກນີ້, ຍັງຈະສືບຕໍ່ພັດທະນາບັນດາໂຄງການຕາມແຜນພັດທະນານະຄອນຫຼວງວຽງຈັນ ຫຼື ແຜນພັດທະນາຂອງລັດຖະບານຕື່ມອີກ, ເພື່ອເຮັດໃຫ້ບໍລິສັດ ພັດທະນາ ນິຄົມອຸດສາຫະກໍາວຽງຈັນ ຈຳກັດ ໄດ້ເຕີບໃຫຍ່ ຂະຫຍາຍຕົວສົມກັບວ່າເປັນວິສາຫະກິດປະສົມລະຫວ່າງພາກລັດ ແລະ ພາກເອກກະຊົນຢ່າງສົມບູນແບບ.

ທີ່ມາ: ກະ​ຊວງ​ການ​ເງິນ