ການນໍາ ແລະ ພຸດທະສາສະນິກະຊົນແຂວງ ບໍ່ແກ້ວ ຮ່ວມພິທີໃສ່ໃຈພຣະທາດຣັດຕະນະເຈດີສິຼບຸນເຮືອງ ດອຍມ່ອນທາດ ເມືອງ ຕົ້ນເຜິ້ງ

ການນໍາ ແລະ ພຸດທະສາສະນິກະຊົນແຂວງ ບໍ່ແກ້ວ ຮ່ວມພິທີໃສ່ໃຈພຣະທາດຣັດຕະນະເຈດີສິຼບຸນເຮືອງ ດອຍມ່ອນທາດ ເມືອງ ຕົ້ນເຜິ້ງ

11th May 2022 0 By Admin

ວັນທີ 8 ພຶດສະພາ 2022 ນີ້ ຄະນະສົງວັດສີບຸນເຮືອງ ພ້ອມດ້ວຍອົງການປົກຄອງບ້ານ, ເຖົ້າແກ່ແນວໂຮມ ແລະ ພໍ່ແມ່ປະຊາຊົນພາຍໃນບ້ານ ໂດຍການນໍາພາຂອງພຣະອາຈານ ຈຸ່ມ ວັດຊະຣະ ຫົວໜ້າກຳມາທິການສາທາລະນູປະການ ອພສ ແຂວງ ເຈົ້າອະທິການວັດສີບຸນເຮືອງ ໄດ້ຈັດພິທີໃສ່ໃຈພຣະທາດຣັດຕະນະເຈດີສຼີບຸນເຮືອງ ຢູ່ທີ່ດອຍມ່ອນທາດ.

ເຂົ້າຮ່ວມເປັນປະທານຝ່າຍສົງມີ ພຣະອາຈານໃຫຍ່ອາດຍາທັມ ຄຳເງິນ ຄຳວົງ ປະທານ ອພສ ແຂວງ, ຝ່າຍບ້ານເມືອງ ມີ ທ່ານ ເຄື່ອນເພັດ ວົງຈັນ ຮອງເຈົ້າແຂວງໆ ບໍ່ແກ້ວ, ທ່ານ ຄຳແຍງ ຄອນໄຊຍະກິດ ເຈົ້າເມືອງໆ ຕົ້ນເຜິ້ງ, ມີພຣະເຖຣານຸເຖຣະ, ບັນດາການນໍາ, ແນກການ, ຫ້ອງການ ແລະ ອົງການຈັດຕັ້ງທີ່ກ່ຽວຂ້ອງຂອງແຂວງ – ເມືອງ ຕົ້ນເຜິ້ງ, ນະຄອນຫຼວງວຽງຈັນ, ເມືອງເງິນ, ເມືອງ ຊຽງຮ່ອນ, ສະພາບໍລິຫານເຂດເສດຖະກິດພິເສດສາມຫຼ່ຽມຄຳ ຕະຫຼອດຮອດພຸດທະສາສະນິກະຊົນ ແລະ ຜູ້ມີຈິດໃຈເຫຼື້ອມໃສສັດທາທົ່ວໄປພາຍໃນແຂວງ ແລະ ຕ່າງແຂວງ ເຂົ້າຮ່ວມ ຢ່າງຄັບຄາໜາແໜ້ນ.


ໃນພິທີດັ່ງກ່າວ, ຕອນເຊົ້າ ເວລາ 7: 30 ບັນດາການນໍາ ແລະ ພຸດທະສາສານິກະຊົນທີ່ເຂົ້າຮ່ວມ ໄດ້ຕັກບາດແດ່ພຣະສົງ 29 ອົງ. ພາຍຫຼັງຕັກບາດສຳເລັດ, ທ່ານ ເຄື່ອນເພັດວົງຈັນ ຮອງເຈົ້າແຂວງໆ ບໍ່ແກ້ວ ໄດ້ໃຫ້ກຽດໄຕ້ທູບທຽນບູຊາພຣະຣັດຕະນະໄຕຣ. ຈາກນັ້ນ, ທ່ານ ໜານໄຫວ ພິລະບັນ ນາຍບ້ານໆ ສີບຸນເຮືອງ ໄດ້ລາຍງານກ່ຽວກັບໂຄງການສ້າງຣັດຕະນະເຈດີສຼີບຸນເຮືອງ ເຊິ່ງໄດ້ໃຫ້ຮູ້ວ່າ: ຣັດຕະນະເຈດີສີບຸນເຮືອງ ໄດ້ເລີ່ມວາງສິລາຈາລືກແຕ່ວັນທີ 7 ທັນວາ 2019 ແລະ ໄດ້ດຳເນີນການກໍ່ສ້າງຕະຫຼອດມາ. ຣັດຕະນະເຈດີສຼີບຸນເຮືອງ ມີຄວາມສູງຈາກຖານເຖິງຍອດ 53 ແມັດ ກວ້າງ 28 ແມັດ, ລວມຖານອ້ອມ ກ້ວາງ 48 ແມັດ ເປັນໂຄງສ້າງຊີມັງເສີມເຫຼັກ, ເປັນຮູບແບບສິລະປະທ້ອງຖິນຕາມຮ່ອງຮອຍເມືອງສຸວັນນະໂຄມຄຳທີມີຫລັກຖານປະກົດໃຫ້ເຫັນ, ອົງພຣະທາດເປັນ 4 ຫຼ່ຽມຍໍ້ມຸມ ມີຮູບປັ້ນຊ້າງ 8 ເຊືອກອ້ອມພຣະທາດ, ມີຊຸ້ມພຣະ 4 ດ້ານ.

ໂຄງການໄດ້ສຳເລັດໄປແລ້ວ 90 % ແລະ ຍັງໄດ້ສ້າງອົງປະກອບຕ່າງໆ ເຊັ່ນ: ສາລາຮັບຮອງພຣະເຖຣະ ແລະ ຍາດໂຍມ, ສາລາພຣະເຈົ້າທັນໃຈ ແລະ ໂຄງການປູກຕົ້ນໄມ້ເປັນຍາສະມຸນໄພ ແລະ ອື່ນໆ ເພື່ອເຮັດໃຫ້ສະຖານທີແຫ່ງນີ້ເປັນສູນປະຕິບັດທຳ ແລະຮຽນຮູ້ດ້ານສິລະປະປັ້ນຫຼໍ່່ພຣະພຸດທະຮູບພຸດທະສິນລາວ. ເວລາ 9: 35 ນາທີ ໄດ້ມີການໄຫວ້ພຣະຮັບສິນ ຖວາຍເຄື່ອງປັດໄຈໄທຍະທານແດ່ພຣະສົງ; ເວລາ 10 : 00 ປະທານ ອພສ ແຂວງ ໄດ້ກ່າວສັມໂມທະນີຍະກະຖາ ແລະ ນໍາພາພຣະສົງສາມະເນນໃຫ້ພອນຢາດນໍ້າ; ເວລາ 10 : 35 ແຫ່ໃຈພຣະທາດຂຶ້ນສູ່ດອຍມ່ອນທາດ ແລະ ແຫ່ອ້ອມພຣະທາດ 3 ຮອບ; ເວລາ 11: 00 ພຣະເຖຣານຸເຖຣະ, ການນໍາແຂວງ – ເມືອງ ແລະ ພຸດທະສາສະນິກະຊົນທີ່ເຂົ້າຮ່ວມພິທີ ໄດ້ອະທິຖານໃສ່ພຣະເຈົ້າແສນແຊ່ຈຳຮອງ, ພຣະປະຈໍາວັນເກີດ ແລະ ຂອງມີຄ່າໄວ້ໃນພຣະທາດ ພ້ອມທັງໃສ່ໃຈ ແລະ ຫຼໍ່່ພຣະເຈົ້າທັນໃຈ.