ອັດຕາແລກປ່ຽນຍັງໜັກໜ້າ… ສູ່ລະດັບ13.226ກີບຕໍ່1ໂດລາສະຫະລັດ, ສ່ວນລາຄາຄຳຜັນຜວນໜັກ ວັນດຽວປັບລົງ1ລ້ານກວ່າກີບ

ອັດຕາແລກປ່ຽນຍັງໜັກໜ້າ… ສູ່ລະດັບ13.226ກີບຕໍ່1ໂດລາສະຫະລັດ, ສ່ວນລາຄາຄຳຜັນຜວນໜັກ ວັນດຽວປັບລົງ1ລ້ານກວ່າກີບ

13th May 2022 0 By Admin

ອັດຕາແລກປ່ຽນເງິນກີບໄດ້ສືບຕໍ່ອ່ອນຄ່າເມື່ອທຽບກັບເງິນບາດ ໂດຍໃນວັນທີ 13 ພຶດສະພາ 2022 ອີງຕາມອັດຕາແລກປ່ຽນຂອງທະນາຄານການຄ້າຕ່າງປະເທດລາວ ເງິນບາດຂາຍອອກທີ່ 419,92 ກີບຕໍ່ບາດ ຈາກລະດັບ349,73ກີບບາດໃນວັນທີ4 ມັງກອນ2022.


ຂະນະທີ່ອັດຕາແລກປ່ຽນລະຫວ່າງກີບກັບໂດລາສະຫະລັດວັນທີ 13 ພຶດສະພາ 2022 ຂາຍອອກທີ 13.226ກີບຕໍ່ໂດລາສະຫະລັດ, ທຽບໃສ່ 4 ມັງກອນ2022 ທີ່ລະດັບ 11.229ກີບຕໍ່ໂດລາສະຫະລັດ.


ໃນຂະນະທີ່ລາຄາຄຳຮູບປະພັນ ອ້າງອີງຮ້ານຄຳພູວົງເປີດຕະຫຼາດວັນທີ 13 ພຶດສະພາ 2022 ເປີດຕະຫຼາດຂາຍອອກທີ່ 13.829.000 ກີບຕໍ່ບາດ ເຊິ່ງເປັນການປັບລົງຫຼາຍກວ່າ1ລ້ານກີບຕໍ່1ບາດ ເມື່ອທຽບໃສ່ລາຄາສູງສຸດຂອງວັນທີ12 ພຶດສະພາທີ່ລະດັບ15.039.000ກີບຕໍ່1ບາດ.

ທ່ານ ຈັນທະວົງ ພະມີສິດ ຜູ້ອຳນວຍການຮ້ານຄຳພູວົງ ໂພສໃນເພສບຸກສ່ວນຕົວວ່າ: ຄຳປະເທດລາວໂດດລົງຢ່າງຮຸນແຮງ ກວ່າ 1 ລ້ານກີບໃນ 1 ບາດຈາກແຮງກົດດັນຈາກການແຂງຄ່າຂຶ້ນຂອງໂດລາ ທ່າມກາງຄວາມກັງວົນເລື່ອງເງິນເຟີ້ໃນອາເມຣິກາ ເຮັດໃຫ້ທະນາຄານກາງອາເມຣິກາ ຫຼື Fed ຈະເລັ່ງເພິ່ມອັດຕາດອກເບ້ຍ.

ສ່ວນລາຄຳພາຍໃນປະເທດກໍໄດ້ຮັບແຮງກົດດັນຈາກການປະຊຸມຂອງພາກລັດທີ່ຈະມີການຄວບຄຸມອັດຕາແລກປ່ຽນກັບບັນດາຮ້ານຄ້ານອກ ເຮັດໃຫ້ອັດຕາແລກປ່ຽນປັບໂຕລົງຢ່າງຮຸນແຮງ ແລະສົ່ງຜົນໃຫ້ລາຄາຄຳປັບໂຕລົງ. ພ້ອມແນະນຳໃຫ້ຄ່ອຍໆຊື້ສະສົມຈະເປັນວິທີການລົງທຶນທີ່ດີ ແລະປ້ອງກັນຄວາມສ່ຽງເລື່ອງຂອງການຜັນຜວນໄດ້.