ແອັບເປີ້ລ ອິ້ງ ຄົກບັນລັງ ຖືກຊາອຸດິອາຣາມໂຄ ແຊງຂຶ້ນເປັນບໍລິສັດທີ່ມີມູນຄ່າຕະຫຼາດສູງສຸດຂອງໂລກ

ແອັບເປີ້ລ ອິ້ງ ຄົກບັນລັງ ຖືກຊາອຸດິອາຣາມໂຄ ແຊງຂຶ້ນເປັນບໍລິສັດທີ່ມີມູນຄ່າຕະຫຼາດສູງສຸດຂອງໂລກ

13th May 2022 0 By Admin

ບໍລິສັດຊາອຸດິອາຣາມໂຄ ເຊິ່ງເປັນບໍລິສັດນ້ຳມັນລາຍໃຫຍ່ຂອງຊາອຸດິອາຣາເບຍ ໄດ້ກ້າວຂຶ້ນເປັນບໍລິສັດທີ່ມີມູນຄ່າທາງຕະຫຼາດສູງທີ່ສຸດໃນໂລກ ແຊງໜ້າບໍລິສັດແອັບເປີ້ລ ອິ້ງ ໃນວັນທີ 11 ພຶດສະພາຜ່ານມາ.

ໂດຍມູນຄ່າຕະຫຼາດຂອງບໍລິສັດຊາອຸດິອາຣາມໂຄຢູ່ທີ່ 2,43 ລ້ານລ້ານໂດລາ ຂະນະທີ່ມູນຄ່າທາງຕະຫຼາດຂອງບໍລິສັດແອັບເປີ້ລຫຼຸດລົງຫຼາຍກວວ່າ 5% ມາຢູ່ໃນລະດັບ 2,37 ລ້ານລ້ານໂດລາ.


ທັງນີ້ ບໍລິສັດຊາອຸດິອາຣາມໂຄໄດ້ປະໂຫຍດຈາກລາຄານ້ຳມັນໃນຕະຫຼາດໂລກເພີ່ມຂຶ້ນຢ່າງຕໍ່ເນື່ອງ ໂດຍຫຼ້າສຸດສັນຍານ້ຳມັນດິບ ເວສເທັກຊັສ (WTI) ງວດສົ່ງມອບເດືອນມິຖຸນາ ເພີ່ມຂຶ້ນ 6% ປິດທີ່ 105,71 ໂດລາຕໍ່ບາເຣວ.


ນັບແຕ່ຕົ້ນປີ 2022 ເປັນຕົ້ນມາ ລາຄາຫຸ້ນຂອງບໍລິສັດຊາອຸດິອາຣາມໂຄເພີ່ມຂຶ້ນ 27%. ຂະນະທີ່ຫຸ້ນຂອງບໍລິສັດແອັບເປີ້ລຫຼຸດລົງ 5,18% ເນື່ອງຈາກຄວາມກັງວົນທີ່ວ່າ ທະນາຄານກາງສະຫະລັດອາດຈະປັບຂຶ້ນອັດຕາດອກເບ້ຍອີກ ເພື່ອຄວບຄຸມເງິນເຟີ້ ເຊິ່ງໄດ້ສ້າງແຮງກົດດັນຕໍ່ກຸ່ມບໍລິສັດເຕັກໂນໂລຊີທີ່ມີຄວາມອ່ອນໄຫວຕໍ່ອັດຕາດອກເບ້ຍ.