ໂບວິລັກ ຄວ້າຫຼຽນເງິນໃຫ້ທັບນັກລາລາວ ຈາກເປຕັງຊຸດຕິ້ງຍິງ ຫຼັງພາດທ່າຖືກຄູ່ແຂ່ງມຽນມາແຊງຊະນະ 44-27 ຄະແນນ

ໂບວິລັກ ຄວ້າຫຼຽນເງິນໃຫ້ທັບນັກລາລາວ ຈາກເປຕັງຊຸດຕິ້ງຍິງ ຫຼັງພາດທ່າຖືກຄູ່ແຂ່ງມຽນມາແຊງຊະນະ 44-27 ຄະແນນ

13th May 2022 0 By Admin

ໜັງສືພິມສຶກສາ-ກິລາລາຍວັນ ລາຍງານວ່າ: ຮ້ອຍຕີ ນາງ ໂບວິລັກ ເທບພະກັນ ຫຼຶ ນ້ອງກີກ ນັກກິລາເປຕັງທີມຊາດລາວ ປະເພດຊຸດຕິ້ງຍິງ ລົງແຂ່ງຂັນໃນຮອບຊີງຊະນະເລີດ ຫຼື ຮອບຊີງຫຼຽນຄຳ ສາມາດອອກຕົວໄດ້ດີໃນຕົ້ນເກມຕີຖືກເປົ້າໝາຍໄດ້ແຕ້ມຂຶ້ນນຳຫ່າງເຖິງ 10 ຄະແນນ ແຕ່ໜ້າເສຍດາຍມາພາດເຖິງ 7 ລ່ອງ ຖືກ ນັກກິລາ ມຽນມາ ໂຊຄວາມແມ້ນເກັບແຕ້ມແຊງເອົາຊະນະ ຂາດຮອຍ 44-27 ຄະແນນ ຄວ້າຫຼຽນຄຳ ໄປຄອງ, ສ່ວນ ໂບວິລັກ ໄດ້ພຽງຫຼຽນເງິນ.


ການແຂ່ງຂັນກິລາເປຕັງ ຮ່າໂນ້ຍ ເກມ ທີ່ ສສ ຫວຽດນາມ ຄັ້ງນີ້ ມີການຊີງໄຊກັນທັງໝົດ 8ລາຍການ ປະກອບມີ ຊຸດຕິ້ງຍິງ, ຊຸດຕິ້ງຊາຍ, ທີມຄູ່ຍິງ, ທີມຄູ່ຊາຍ, ທີມຄູ່ປະສົມ, ທີມຊຸດຍິງ 2 ຊາຍ 1, ທີມຊຸດຍິງ ແລະ ທີມຊຸດຊາຍ, ໃນນັ້ນມີພຽງ 6 ຊາດ ໃນຂົງເຂດ ອາຊຽນ ເຂົ້າຮ່ວມຊີງໄຊ ຄື: ໄທ, ມາເລເຊຍ, ມຽນມາ, ກຳປູເຈຍ, ລາວ ແລະ ເຈົ້າພາບ ຫວຽດນາມ ກິລາດັ່ງກ່າວ ດຳເນີນແຂ່ງຂັນລະຫວ່າງວັນທີ 13-19 ພຶດສະພາ 2022 ສຳລັບລາວ ກໍສົ່ງ ນັກກິລາຮ່ວມຊີງໄຊຄົບ 8ລາຍການ.


ການແຂ່ງຂັນກິລາດັ່ງກ່າວ ທີ່ແຂ່ງຂັນມື້ທຳອິດ ຈັດຂຶ້ນໃນວັນທີ 13 ພຶດສະພານີ້ ທີ່ສະໜາມກິລາ ຮ່າໂນ້ຍ ເນເຊິນນອລ ສະປອດ ເທນນິ້ງ ເຊັນເຕີ ຂ້າງສະໜາມແຫ່ງຊາດ ມີດິງ ຊຶ່ງນຳໃຊ້ ພິທີເປີດ-ປິດ ຮ່າໂນ້ຍ ເກມ ແລະ ມີການຊີງໄຊ 2 ລາຍການ ຈາກປະເພດຊຸດຕິ້ງຍິງ ແລະ ຊຸດຕິ້ງຊາຍ ໂດຍທ່ານ ແສງພອນ ພົນອາມາດ ຫົວໜ້າກົມກີລາລະດັບສູງ ທັງເປັນຫົວໜ້າຄະນະທັບນັກກີລາລາວ ຮ່ວມໃຫ້ກຳລັງໃຈ.

ຜ່ານການແຂ່ງຂັນຜົນປະກົດວ່າ: ນັກກີລາທັງສອງຮຸ່ນຂອງລາວ ກໍຄື ທ້າວ ສີສົມພອນ ສັນນະຈອນ ຕົກຮອບທຳອິດ ຍັງເຫຼືອແຕ່ ຮ້ອຍຕີ ນາງ ໂບວິລັກ ເທບພະກັນ ຜ່ານເຂົ້າຮອບຮອງຊະນະເລີດ ກ່ອນຈະເສຍໃຫ້ ນັກກິລາ ມຽນມາ ນາງ ກິນ ເຈີຣີ ເທັສ ດ້ວຍຄະແນນ 44-27 ຄະແນນ ເຮັດໃຫ້ ໂບວິລັກ ໄດ້ພຽງຫຼຽນເງິນ ແລະ ເປັນຫຼຽນເງິນທຳອິດໃຫ້ແກ່ທັບນັກກະລາລາວ.

ສ່ວນຫຼຽນທອງ ຮ່ວມ ແມ່ນຕົກເປັນຂອງ ນັກກິລາກຳປູເຈຍ ແລະ ຫວຽດນາມ. ສ່ວນຫຼຽນຄຳ ຊຸດຕີ້ງຊາຍ ຕົກເປັນຂອງໄທ, ຫຼຽນເງິນ ຫວຽດນາມ ແລະ ຫຼຽນທອງຮ່ວມ ແມ່ນ ມຽນມາ ແລະ ກຳປູເຈຍ.

ຂ່າວໂດຍ: ສົງການ ພັນແພງດີ