ກອງພັນ426 (ຕີພິເສດ) ຈັດຕັ້ງຍິງລູກປືນແທ້ໃຫ້ທະຫານໃໝ່

ກອງພັນ426 (ຕີພິເສດ) ຈັດຕັ້ງຍິງລູກປືນແທ້ໃຫ້ທະຫານໃໝ່

14th May 2022 0 By Admin

ວັນທີ 04 ພຶດສະພາ 2022 ນີ້, ກອງພັນ 426 (ຕີພິເສດ) ທີ່ຂຶ້ນກັບກອງພົນທະຫານຮາບທີ 4 ໄດ້ຈັດຕັ້ງຍິງລູກປືນແທ້ໃຫ້ທະຫານໃໝ່ ປະຈຳປີ 2022 ຂຶ້ນ, ຢູ່ທີ່ສະໜາມຍິງປືນຂອງສູນຝືກທະຫານຮາບທີ 4 ໂດຍ ພາຍໃຕ້ການເປັນປະທານ ຂອງສະຫາຍ ຮ້ອຍເອກ ຄຳຕາ ພັນທະວົງ ຊ່ວຍວຽກພະແນກອົບຮົມ, ມີຄະນະພັກ – ຄະນະບັນຊາ, ພະນັກງານຄູ – ອາຈານ ພ້ອມດ້ວຍອ້າຍນ້ອງທະຫານໃໝ່ເຂົ້າຮ່ວມຢ່າງພ້ອມພຽງ.


ສະຫາຍ ຮ້ອຍຕີ ເສີດ ຄູນສຸວັນ ໄດ້ຂຶ້ນຜ່ານແຜນການຍິງລູກປືນແທ້ ໃຫ້ທະຫານໃໝ່ ປະຈໍາປີ 2022 ໂດຍໄດ້ປະຕິບັດຕາມແຜນການທີ່ຂັ້ນເທິງໄດ້ກຳນົດໃຫ້ ເຊິ່ງມີອ້າຍນ້ອງທະຫານໃໝ່ເຂົ້າຮ່ວມທັງໝົດ 30 ສະຫາຍ, ທັງນີ້ ກໍ່ເພື່ອເປັນການກວດກາຕີລາຄາຄືນກ່ຽວກັບຄວາມຮັບຮູ້ຂອງທະຫານໃໝ່, ທັງເປັນການຕີລາຄາຜົນໄດ້ຮັບໃນການສິດສອນຂອງຄູ – ອາຈານ ແລະ ກວດກາລະດັບຄວາມຮູ້ຄວາມສາມາດໃນການຈັດຕັ້ງປະຕິບັດ, ການຝຶກແອບຮໍ່າຮຽນຕະຫຼອດໄລຍະ 90 ວັນ ຕາມຫຼັກສູດໃນການອົບຮົມ.

ການຈັດຕັ້ງຍິງລູກປືນແທ້ໃນຄັ້ງນີ້ແມ່ນໄດ້ມີຜົນສຳເລັດຢ່າງຈົບງາມ, ມີຄວາມປອດໄພ 100% ສາມາດຕີລາຄາຜົນໄດ້ຮັບບັນລຸໄດ້ 80% ຂອງຈຳນວນນັກຮຽນທັງໝົດ, ໃນນີ້ແມ່ນໄດ້ສະແດງໃຫ້ເຫັນເຖິງຄວາມເອົາໃຈໃສ່ໃນການຊີ້ນຳ – ນໍາພາ ໃກ້ຊິດຕິດແທດຂອງຜູ້ບັນຊາ ແລະ ຄູ – ອາຈານ ທີ່ໄດ້ເປັນເຈົ້າການໃນການສິດສອນຖ່າຍທອດຄວາມຮູ້ຄວາມສາມາດໃຫ້ແກ່ນັກຮຽນ, ແຕ່ລະສະຫາຍແມ່ນໄດ້ເອົາໃຈໃສ່ຕໍ່ການສຶກສາຮໍ່າຮຽນ, ສາມາດຮັບຮູ້ເຂົ້້າໃຈຕໍ່ບົດຮຽນໄດ້ເປັນຢ່າງດີ, ປະຕິບັດຂໍ້ກຳນົດກົດລະບຽບຕ່າງໆຂອງກອງທັບ ກໍ່ຄືກົມກອງວາງອອກຢ່າງເຂັ້ມງວດ ຈື່ງສາມາດເຮັດໃຫ້ການປະຕິບັດຄັ້ງນີ້ເຕັມໄປດ້ວຍຄວາມຟົດຟື້ນ ແລະ ໄດ້ຮັບຜົນດີ.


ສະຫາຍ ຮ້ອຍເອກ ຄຳຕາ ພັນທະວົງ ໄດ້ໂອ້ລົມຕໍ່ຄະນະຮັບຜິກຊອບ ພ້ອມດ້ວຍຄູອາຈານ ແລະອ້າຍນ້ອງທະຫານໃໝ່ ກ່ອນອື່ນສະຫາຍໄດ້ສະແດງຄວາມຍ້ອງຍໍຊົມເຊີຍຕໍ່ຜົນສຳເລັດຕະຫຼອດໄລຍະຝຶກແອບຮ່ຳຮຽນຜ່ານມາ, ພ້ອມນັ້ນກໍ່ໄດ້ຮຽກຮ້ອງໃຫ້ທະຫານໃໝ່ ຫລັງຈາກສຳເລັດໃນການຝຶກແອບໄລຍະສັ້ນນີ້ແລ້ວ ຈົ່ງນຳເອົາໄປຈັດຕັ້ງປະຕິບັດຢູ່ກົມກອງໃຫ້ໜັກແໜ້ນ ເອົາໃຈໃສ່ປະຕິບັດທຸກມະຕິຄໍາສັ່ງຂອງການຈັດຕັ້ງທຸກຂັ້ນ, ປະຕິບັດຂໍ້ກຳນົດກົດລະບຽບຂອງກອງທັບໃຫ້ເຂັ້ມງວດ, ອົດທົນຜ່ານຜ່າຄວາມຫຍຸ້ງຍາກ, ອຸປະສັກຕ່າງໆ, ພ້ອມກັນນຳເອົາເນື້ອໃນບົດຮຽນດັ່ງກ່າວໄປໝູນໃຊ້ຢູ່ໃນກົມກອງໃຫ້ເກີດດອກອອກຜົນ.

ທີ່ມາ:Media Laos