ຣັດເຊຍ ເຕືອນຟິນແລນ ຈະຖືກມາດຕະການຕອບໂຕ້ ຫຼັງຈະຕັດສິນໃຈສະໝັກເຂົ້ານາໂຕ້ ພ້ອມຊີ້ຈະສ້າງຄວາມເສຍຫາຍຮ້າຍແຮງຕໍ່ສະຖຽນລະພາບ ແລະ ຄວາມໝັ້ນຄົງຂອງເອີຣົບເໜືອທັງໝົດ

ຣັດເຊຍ ເຕືອນຟິນແລນ ຈະຖືກມາດຕະການຕອບໂຕ້ ຫຼັງຈະຕັດສິນໃຈສະໝັກເຂົ້ານາໂຕ້ ພ້ອມຊີ້ຈະສ້າງຄວາມເສຍຫາຍຮ້າຍແຮງຕໍ່ສະຖຽນລະພາບ ແລະ ຄວາມໝັ້ນຄົງຂອງເອີຣົບເໜືອທັງໝົດ

15th May 2022 0 By Admin

ຣັດເຊຍ ເຕືອນຟິນແລນຈະຖືກມາດຕະການຕອບໂຕ້ ຫຼັງຟິນແລນ ຈະຕັດສິນໃຈສະໝັກສະມາຊິກນາໂຕ້ ພ້ອມຊີ້ການຕັດສິນໃຈຂອງຟິນແລນຈະສ້າງຄວາມເສຍຫາຍຮ້າຍແຮງຕໍ່ສະຖຽນລະພາບ ແລະ ຄວາມໝັ້ນຄົງຂອງເອີຣົບເໜືອທັງໝົດ.


ກະຊວງການຕ່າງປະເທດຣັດເຊຍອອກຖະແຫຼງວ່າ ຣັດເຊຍຖືກບີບໃຫ້ຕ້ອງໃຊ້ມາດຕະການຕອບໂຕ້ຟິນແລນ ທັງມາດຕະການດ້ານ ເຕັກນິກທາງການທະຫານ ແລະ ມາດຕະການໃນລັກສະນະອື່ນໆ ເພື່ອກຳຈັດໄພຄຸກຄາມຕໍ່ຄວາມໝັ້ນຄົງແຫ່ງຊາດຂອງຣັດເຊຍ ທີ່ເປັນຜົນກະທົບມາຈາກຄວາມເຄື່ອນໄຫວຂອງຟິນແລນ ຫຼັງຈາກຟິນແລນປະກາດຈະຕັດສິນໃຈສະໝັກເປັນສະມາຊິກອົງການນາໂຕ ໃນອີກບໍ່ພໍທໍ່ໃດວັນຂ້າງໜ້ານີ້.


ແຕ່ຖະແຫຼງການຂອງກະຊວງຕ່າງປະເທດຣັດເຊຍບໍ່ໄດ້ລະບຸຊັດເຈນວ່າ ມາດຕະການຕອບໂຕ້ຟິນແລນ ຈະເປັນມາດຕະການໃດແດ່, ຖະແຫຼງການຂອງລັດເຊຍລະບຸຕື່ມວ່າ ຄວາມເຄື່ອນໄຫວຂອງຟິນແລນ ດັ່ງກ່າວ ນັບເປັນການປ່ຽນແປງຄັ້ງໃຫຍ່ ເຖິງລະດັບຮາກຖານໃນນະໂຍບາຍຕ່າງປະເທດຂອງຟິນແລນ ແລະ ສ້າງຄວາມເສຍຫາຍຢ່າງຮ້າຍແຮງຕໍ່ຄວາມສຳພັນທະວິພາຄີຂອງ 2 ປະເທດ ລວມທັງສ້າງຄວາມເສຍຫາຍ ຮ້າຍແຮງຕໍ່ການຮັກສາສະຖຽນລະພາບ ແລະ ຄວາມໝັ້ນຄົງຂອງເອີຣົບເໜືອນຳອີກ.

ດ້ານ ທ່ານ ດີມິທຣີ ເປສຄອຟ ໂຄສົກລັດຖະບານລັດເຊຍ ລະບຸວ່າ ການຕອບໂຕ້ຟິນແລນ ຈະຂຶ້ນຢູ່ກັບວ່າຂະບວນການຂະຫຍາຍຕົວນີ້ຈະໄປສິ້ນສຸດຢູ່ທີ່ໃດ ແລະ ຂອບເຂດຂອງໂຄງສ້າງພື້ນຖານດ້ານການທະຫານທີ່ອາດເກີດຂຶ້ນ ຈະເຄື່ອນເຂົ້າໃກ້ຊາຍແດນຂອງລັດເຊຍຫຼາຍໜ້ອຍພຽງໃດ. ຟິນແລນມີຊາຍແດນຕິດກັບຣັດເຊຍ ເຊິ່ງເປັນປະທດເພື່ອນບ້ານທາງຕາເວັນອອກຂອງຟິນແລນ ຍາວ1.300ກິໂລແມັດ.


ຄາດວ່າຟິນແລນ ຈະປະກາດການຕັດສິນໃຈສະໝັກເຂົ້າເປັນສະມາຊິກອົງການນາໂຕ້ໃນວັນທີ15 ພຶດສະພາ2022 ໂດຍລໍຖ້າໃຫ້ລັດຖະສະພາຟິນແລນລົງມະຕີກ່ອນ.