ຮູ້ໄວ້ກ່ອນ ! ມາດຕະການຈັດຕັ້ງປະຕິບັດສໍາລັບຜູ້ເດີນທາງເຂົ້າມາ ສ ປປ ລາວ

ຮູ້ໄວ້ກ່ອນ ! ມາດຕະການຈັດຕັ້ງປະຕິບັດສໍາລັບຜູ້ເດີນທາງເຂົ້າມາ ສ ປປ ລາວ

17th March 2020 0 By Entertain

ດັ່ງທີ່ຫຼາຍໆທ່ານຮູ້ວ່າປັດຈຸບັນຍັງຄົງມີການແຜ່ເຊື້ອຂອງພະຍາດອັກເສບປອດເພີ່ມຂຶ້ນເລື້ອຍໆຢູ່ປະເທດອ້ອມຂ້າງລາວເຮົາ, ເຖິງວ່າລາວເຮົາຈະຍັງບໍ່ພົບຜູ້ຕິດເຊື້ອ ແຕ່ກໍຖືເປັນປະເທດທີ່ມີຄວາມສ່ຽງຫຼາຍທີ່ສຸດເນື່ອງຈາກວ່າມີຄົນເຂົ້າ-ອອກປະເທດເຮົາເປັນຕົ້ນ ນັກລົງທຶນ, ພະນັກງານຊ່ຽວຊານ, ກໍາະກອນໂຄງການກໍ່ສ້າງ, ນັກຮຽນ, ນັກສຶກສາ, ຊາວຄ້າຂາຍ.

.
ເພື່ອເປັນການຫຼຸດຜ່ອນຄວາມສ່ຽງທີ່ອາດຈະເກີດການຕິດເຊື້ອ ແລະ ແຜ່ລະບາດຂອງ Covid-19 ເຂົ້າມາສູ່ ສ ປປ ລາວ, ຄະນະສະເພາະກິດເພື່ອປ້ອງກັນ, ຄວບຄຸມ, ແລະ ແກ້ໄຂການລະບາດຂອງພະຍາດຈຶ່ງໄດ້ອອກແຈ້ງມາດຕະການຈັດຕັ້ງປະຕິບັດສໍາລັບຜູ້ເດີນທາງເຂົ້າມາ ສ ປປ ລາວ ແຈ້ງການສະບັບເລກທີ 012/ສພກ. ລົງວັນທີ 16 ມີນາ 2020 ດັ່ງນີ້:


1 ທຸກຄົນທີ່ເຂົ້າມາ ສ ປປ ລາວ, ທີ່ມີອາການ ໄຂ້ , ໄອ ຫຼື ຫາຍໃຈຍາກ ແລະ ມີປະຫວັດເດີນທາງມາຈາກເຂດທີ່ມີການລະບາດຂອງ Covid-19, ຜູ້ຫຼືມີປະຫວັດສໍາຜັດກັບຜູ້ຕິດເຊື້ອ Covid-19 ຕ້ອງປະຕິບັດມາດຕະການ ແຍກປ່ຽວຢູ່ໂຮງໝໍ ເພື່ອຢັ້ງຢືນການບົ່ງມະຕິ.
ການແຍກປ່ຽວກໍລະນີສົງໄສຢູ່ນະຄອນຫຼວງວຽງຈັນ ແມ່ນຢູ່ ໂຮງໝໍ ມິດຕະພາບ, ໂຮງໝໍມະໂຫສົດ, ໂຮງໝໍເສດຖາທິຣາດ ແລະ ໂຮງໝໍສູນກາງ 103 ກອງທັບ ແລະ ການແຍກປ່ຽວກໍລະນີສົງໄສບັນດາແຂວງ ແມ່ນຢູ່ບັນດາຢູ່ໂຮງໝໍແຂວງ.

.
2 ທຸກຄົນທີ່ເດີນທາງເຂົ້າມາ ສປປ ລາວ, ທີ່ມີອາການເຂົ້າກັບເງື່ອນໄຂດັ່ງລຸ່ມນີ້ ຕ້ອງປະຕິບັດມາດຕະການຈໍາກັດບໍລິເວນຢູ່ສະຖານທີ່ພັກເຊົາຂອງຕົນເອງພາຍໃນ 14 ວັນ (Self -quarantine).

.

ເງື່ອນໄຂທີ 1: ສໍາລັບປະເທດທີ່ບໍ່ມີຊາຍແດນຕິດຈອດກັນ ສປປ ລາວ
ທຸກຄົນທີ່ເດີນທາງເຂົ້າມາ ສປປ ລາວ ທີ່ບໍ່ມີອາການສະແດງ, ແຕ່ມາຈາກປະເທດທີ່ມີລາຍງານການລະບາດຂອງ COVID-19 ຫລາຍກວ່າ 100 ກໍລະນີ.


ເງື່ອນໄຂທີ 2: ສໍາລັບປະເທດທີ່ມີຊາຍແດນຕິດຈອດກັບ ສປປ ລາວ
ທຸກຄົນທີ່ເດີນທາງມາຈາກແຂວງທີ່ບໍ່ມີຊາຍແດນຕິດຈອດກັບ ສປປ ລາວ ແຕ່ມີລາຍງານການລະບາດ ຂອງcoVID-19 ຫຼາຍກວ່າ 10 ກໍລະນີ ຫຼື ແຂວງທີ່ມີຊາຍແດນຕິດກັບ ສປປ ລາວ ແຕ່ມີລາຍງານການລະບາດພະຍາດ COVID-19 ຫຼາຍກວ່າ 3 ກໍລະນີຂື້ນໄປ.

ເງື່ອນໄຂທີ 3: ບຸກຄົນໃດທີ່ມຶການສໍາຜັດໃກ້ຊິດກັບຜູ້ທີ່ຖືກຢັ້ງຢືນການຕິດເຊື້ອ COVID-19 ພາຍ ໃນ 14 ວັນ .


3 ທຸກຄົນທີ່ເດີນທາງເຂົ້າ ສປປ ລາວ ທີ່ບໍ່ມີອາການ ແລະ ບໍ່ເຂົ້າກັບເງື່ອນໄຂມາດຕະການແຍກປ່ຽວ, ມາດຕະການຈໍາກັດບໍລິເວນ ແມ່ນໃຫ້ປະຕິບັດ ມາດຕະການຕິດຕາມຕົນເອງ 14 ວັນ ດັ່ງ ລຸ່ມນີ້:

ການຕິດຕາມຕົນເອງ (self-Innonitoring: ແມ່ນການຕິດຕາມສຸຂະພາບ ແລະ ອາການຂອງຕົນເອງໃນໄລຍະເວລາ 14 ວັນ ຫຼັງເດີນທາງມາຈາກປະເທດ ທີ່ມີການລະບາດຂອງພະຍາດ COVID-19, ຕ້ອງຕິດຕາມອາການ ໄຂ້, ໄອ ຫຼື ຫາຍໃຈຍາກ ຂອງຕົນເອງ ທຸກມື້, ຮັກສາສຸຂະພາບຂອງຕົນໃຫ້ແຂງແຮງ, ລ້າງມືໃຫ້ສະອາດເລື້ອຍໆ, ປະຕິບັດມາລະຍາດການໄອຈາມ.


ໃນໄລຍະຕິດຕາມອາການ ຜູ້ກ່ຽວສາມາດອອກໄປເຮັດກິດຈະກໍາປະຈໍາວັນໄດ້ ໂດຍແນະນໍາໃຫ້ໃສ່ຜ້າອັດປາກດັງ, ຖ້າມີອາການ ໄຂ້, ໄອ ຫຼື ຫາຍໃຈຍາກ, ໃຫ້ຕິດຕໍ່ສາຍດ່ວນ 166 ຫຼື 020-5406 6777 ທັນທີ ເພື່ອຂໍຄໍາແນະນໍາສິ່ງທີ່ຄວນປະຕິບັດຂັ້ນຕໍ່ໄປ.

.

ຂໍ້ແນະນໍາໃນການຈໍາກັດບໍລິເວນຢູ່ສະຖານທີ່ພັກເຊົາຂອງຕົນເອງ (Self-quarantine); ແມ່ນການຈໍາກັດການອອກໄປເຄື່ອນໄຫວກິດຈະກໍາຢູ່ນອກສະຖານທີ່ພັກເຊົ້າ, ຕ້ອງຕິດຕາມອາການ ໄຂ້, ໄອ ຫຼື ຫາຍໃຈຍາກ ຂອງຕົນເອງທຸກມື້, ຮັກສາສຸຂະພາບຂອງຕົ້ນໃຫ້ແຂງແຮງ, ລ້າງໃຫ້ສະອາດເລື້ອຍໆ.


ປະຕິບັດມາລະຍາດການໄອຈາມ. ຜູ້ກ່ຽວຕ້ອງຢູ່ແຕ່ໃນສະຖານທີ່ພັກເຊົາຂອງຕົນ ໂດຍບໍ່ໃຫ້ມີການສໍາຜັດ ຫຼື ໃກ້ຊິດກັບຄົນອື່ນ, ຄອບຄົວ ຫຼື ຜູ້ປະກອບການ ຕ້ອງອໍານວຍຄວາມສະດວກ ໃນການຈັດຫາອາຫານການກິນ ແລະ ສິ່ງທີ່ຈໍາເປັນອື່ນໆໃຫ້ແກ່ບຸກຄົນທີ່ຖືກຈໍາກັດບໍລິເວນ.

.

ຖ້າຫາກມີອາການ ໄຂ້, ໄອ ຫຼື ຫາຍໃຈຍາກ ແມ່ນໃຫ້ຕິດຕໍ່ສາຍດ່ວນ 166 ຫຼື 020-3406 6777 ທັນທີ, ເພື່ອຂໍຄໍາແນະນໍາສິ່ງທີ່ຄວນປະຕິບັດຂັ້ນຕໍ່ໄປ.