ດ່ວນ! ສະຫວັນນະເຂດພົບກໍລະນີສົງໄສຕິດໂຄວິດ-19 ຄົນທໍາອິດ

ດ່ວນ! ສະຫວັນນະເຂດພົບກໍລະນີສົງໄສຕິດໂຄວິດ-19 ຄົນທໍາອິດ

17th March 2020 0 By Education

ການລະບາດຂອງໂຄວິດ-19 ນັບມື້ຍິ່ງຮຸນແຮງຂຶ້ນ ເຮັດໃຫ້ຫຼາຍປະເທດຕ້ອງສຸມໃສ່ມາດຕະການປ້ອງກັນ, ຄວບຄຸມ ແລະ ແກ້ໄຂຢ່າງເຄັ່ງຄັດ, ສະເພາະລາວເຮົາເອງ ເຖິງແມ່ນວ່າຍັງບໍ່ມີກໍລະນີຕິດເຊື້ອດັ່ງກ່າວ ແຕ່ໃນເຊົ້າມື້ນີ້ ກວດພົບ 1ຄົນ ຜູ້ມີອາການຖືກກັບນິຍາມຂອງພະຍາດນີ້ ທີ່ສະຫວັນນະເຂດ ເຊິ່ງຜູ້ກ່ຽວເດີນທາງມາຈາກໄທ.

ໃນຕອນເຊົ້າວັນທີ 17 ມີນາ 2020, ຫນ່ວຍງານຄວບຄຸມພະຍາດຕິດຕໍ່ປະຈໍາດ່ານສາກົນຂົວມິດຕະພາບລາວ-ໄທແຫ່ງທີ 2 ແຂວງສະຫວັນນະເຂດ-ແຂວງມຸກດາຫານ ປະເທດໄທ ໄດ້ກວດພົບຜູ້ຕ້ອງສົງໄສຕິດເຊື້ອພະຍາດໂຄວິດ-19 ເປັນຄົນທໍາອິດຂອງແຂວງ, ເປັນເພດຍິງ ອາຍຸ 28 ປີທີ່ເດີນທາງມາຈາກປະເທດໄທ.

ທ່ານໝໍ ຖາວອນ ທຸມມະສອນ, ຫົວຫນ້າຫນ່ວຍງານຄວບຄຸມພະຍາດຕິດຕໍ່ປະຈຳດ່ານສາກົນຂົວທິດຕະພາບລາວ-ໄທ ແຫ່ງທີ 2 ໃຫ້ຮູ້ວ່າ: ຜູ້ຕ້ອງສົງໃສຕິດເຊື້ອພະຍາດໂຄວິດ-19 ທີ່ກວດພົບນີ້ ແມ່ນເຮັດວຽກເປັນແມ່ເຮືອນຢູ່ນະຄອນ ຫລວງບາງກອກຂອງໄທ.

ກ່ອນເດີນທາງກັບມາບ້ານເກີດທີ່ແຂວງສະຫວັນນະເຂດ, ຜູ້ກ່ຽວແມ່ນມີອາການໄຂ້ມາໄດ້ 2-3ວັນແລ້ວ. ຈາກນັ້ນ, ນາຍຈ້າງກໍ່ໄດ້ອະນຸຍາດໃຫ້ລາວເດີນທາງກັບບ້ານ. ຜ່ານການກວດຕົວຈິງຂອງເຈົ້າຫນ້າທີ່ກ່ຽວຂ້ອງປະຈໍາດ່ານເຫັນວ່າ ຜູ້ກ່ຽວມີອາການໄຂ້ສູງ ເຖິງ 38,5 ອົງສາ, ພ້ອມທັງ ມີອາການໄອ ແລະ ຈາມ ເຊີ່ງນອນຢູ່ໃນນິຍາມຂອງການເປັນພະຍາດໂຄວິດ-19.

ປັດຈຸບັນ, ຜູ້ກ່ຽວຖືກກັກຕົວໄວ້ທີ່ຈຸດຄວບຄວມຂອງພະແນກສາທາລະ ນະສຸກແຂວງທີ່ຈັດກຽມໄວ້ ໂດຍຈະຖືກກັກຕົວເປັນເວລາ 14 ວັນ ພ້ອມທັງຈະໄດ້ກວດວ່າຜູ້ກ່ຽວແມ່ນຕິດເຊື້ອພະຍາດດັ່ງກ່າວນີ້ແທ້ ຫລືບໍ່.

ທີ່ມາ: ວິທະຍຸກະຈາຍສຽງແຫ່ງຊາດລາວ