ຈັບໜັກ! ອັດຕາເງິນຟີ້ໃນອັງກິດ ເພີ່ມຂຶ້ນສູງສຸດໃນຮອບ 40 ປີ ຈາກລາຄາພະລັງງານທີ່ພຸ່ງທະຍານ

ຈັບໜັກ! ອັດຕາເງິນຟີ້ໃນອັງກິດ ເພີ່ມຂຶ້ນສູງສຸດໃນຮອບ 40 ປີ ຈາກລາຄາພະລັງງານທີ່ພຸ່ງທະຍານ

19th May 2022 0 By Admin

ສຳນັກງານສະຖິຕິແຫ່ງຊາດຂອງອັງກິດເປີດເຜີຍວ່າ ດັດສະນີລາຄາຜູ້ບໍລິໂພກ (CPI) ໃນເດືອນເມສາ 2022 ເພີ່ມຂຶ້ນ 9% ເມື່ອທຽບກັບຊ່ວງດຽວກັນຂອງປີຜ່ານມາ ແລະ ເພີ່ມຂຶ້ນຈາກເດືອນມີນາ ທີ່ຢູ່ໃນລະດັບ 7% ຖືວ່າສູງສຸດໃນຮອບ 40 ປີ ຫຼື ນັບແຕ່ປີ 1982 ເປັນຕົ້ນມາ.


ທັງນີ້ ພາກຄົວເຮືອນໃນອັງກິດຕ້ອງຈ່າຍຄ່າແກັສ ແລະ ໄຟຟ້າເພີ່ມຂຶ້ນສູງເຖິງ 54% ໃນເດືອນເມສາຜ່ານມາ ຫຼັງຈາກທາງການຂອງອັງກິດຂະຫຍາຍເພດານລາຄາພະລັງງານໃຫ້ສອດຄ່ອງກັບລາຄາຂາຍສົ່ງທີ່ປັບຂຶ້ນ, ທັງນີ້ ລາຄາອາຫານ ແລະ ພະລັງງານໃນອັງກິດປັບຂຶ້ນຢ່າງຕໍ່ເນື່ອງ ນັບແຕ່ປະເທດຕາເວັນຕົກອອກມາດຕະການຂວ້ຳບາດຕໍ່ຣັດເຊຍ.


ອັດຕາເງິນເຟີ້ເພີ່ມຂຶ້ນສູງໄດ້ສ້າງແຮງກົດດັນໃຫ້ລັດຖະບານອັງກິດ ອອກມາດຕະການເພື່ອຊ່ວຍເຫຼືອປະຊາຊົນຜູ້ມີລາຍຮັບຕ່ຳ, ນັກເສດຖະສາດຄາດການວ່າ ວິກິດການຄັ້ງນີ້ ຈະເຮັດໃຫ້ມາດຖານຊີວິດການເປັນຢູ່ຂອງຊາວອັງກິດຫຼຸດລົງຕ່ຳທີ່ສຸດ ນັບແຕ່ປີ 1950 ເປັນຕົ້ນມາ.


ແນວໃດກໍຕາມ ລັດຖະບານອັງກິດ ກຳລັງເລັ່ງອອກນະໂຍບາຍອຸດໜູນຄ່າພະລັງງານ ສຳລັບຜູ້ທີ່ມີລາຍໄດ້ຕ່ຳ ແລະ ກຳລັງພິຈາລະນາເພີ່ມພາສີອາກອນກັບບໍລິສັດພະລັງງານທີ່ມີກຳໄລສູງຈາກການເພີ່ມຂຶ້ນຂອງລາຄາພະລັງງານ, ນອກຈາກນີ້ ອາດຈະພິຈາລະນາຫຼຸດພາສີໃຫ້ແກ່ປະຊາຊົນຜູ້ມີລາຍໄດ້ຕ່ຳຕື່ມອີກ.