ແຂວງຫຼວງພະບາງ ປຶກສາຫາລື, ສຳຫຼວດ, ອອກແບບ ແລະຈັດສັນ ແຫຼ່ງທ່ອງທ່ຽວຫໍພິພິທະພັນແຫ່ງຊາດຫຼວງພະບາງ ໃຫ້ກາຍເປັນແຫຼງທ່ອງທ່ຽວລະດັບ 5 ດາວ

ແຂວງຫຼວງພະບາງ ປຶກສາຫາລື, ສຳຫຼວດ, ອອກແບບ ແລະຈັດສັນ ແຫຼ່ງທ່ອງທ່ຽວຫໍພິພິທະພັນແຫ່ງຊາດຫຼວງພະບາງ ໃຫ້ກາຍເປັນແຫຼງທ່ອງທ່ຽວລະດັບ 5 ດາວ

26th May 2022 0 By Admin

ກອງປະຊຸມປຶກສາຫາລື, ສຳຫຼວດ, ຈັດສັນ ແລະອອກແບບ ແຫຼ່ງທ່ອງທ່ຽວຫໍພິພິທະພັນແຫ່ງຊາດຫຼວງພະບາງ ໄດ້ຈັດຂຶ້ນໃນວັນທີ 26 ພຶດສະພາ 2022 ຢູ່ຫ້ອງປະຊຸມ ທ່ອງທ່ຽວພະແນກຖວທແຂວງຫຼວງພະບາງ ໂດຍການເປັນປະທານ ຂອງທ່ານ ສີສະຫວາດ ຍີ່ລັດໄຈ ຮອງຫົວໜ້າ ພະແນກຖວທແຂວງ ,ມີຫົວໜ້າພະແນກສຳຫຼວດ, ອອກແບບ ແລະຈັດສັນແຫຼ່ງທ່ອງທ່ຽວ ກົມພັດທະນາການທ່ອງທ່ຽວ, ພາກສ່ວນທີ່ກ່ຽວຂ້ອງ ແລະວິຊາການອອກແບບເຂົ້າຮ່ວມ.

ກອງປະຊຸມ ແມ່ນໄດ້ຮັບຟັງຈຸດປະສົງ ຂອງການລົງສຳຫຼວດ, ຈັດສັນ ແລະອອບແບບສະຖານທີ່ທ່ອງທ່ຽວຫໍພິພິທະພັນແຫ່ງຊາດຫຼວງພະບາງ ຂອງທີມງານ ສຳຫຼວດ, ອອກແບບ ແລະຈັດສັນແຫຼ່ງທ່ອງທ່ຽວ ກົມພັດທະນາການທ່ອງທ່ຽວ, ໂດຍສະເໜີຈຸດປະສົງໃຫ້ຜູ້ເຂົ້າຮ່ວມຮັບຟັງວ່າ: ເປັນການສຳຫຼວດເກັບກຳຂໍ້ມູນ ທາງດ້ານກາຍະພາບພາຍໃນຂອບເຂດຫໍພິພິທະພັນແຫ່ງຊາດຫຼວງພະບາງ ເພື່ອເປັນຂໍ້ມູນພື້ນຖານໃນການວາງແນວຄວາມຄິດ, ເພື່ອປັບປຸງສິ່ງອຳນວຍຄວາມສະດວກ ແລະພູມີທັດໃນສະຖານທີ່ທ່ອງທ່ຽວຫໍພິພິທະພັນແຫ່ງຊາດຫຼວງພະບາງ ໃຫ້ມີຄວາມເປັນລະບົບຈົບງາມ ທັງເປັນການດຶງດູດນັກທ່ອງທ່ຽວ ໃຫ້ເຂົ້າມາທ່ຽວຊົມຫໍພິພິທະພັນແຫ່ງຊາດຫຼວງພະບາງຫຼາຍຂຶ້ນ.

ໂດຍໄດ້ວາງໂຄງການປັບປຸງພື້ນຖານໂຄງລ່າງຄື: ໂຄງການກໍ່ສ້າງ ແລະສ້ອມແປງບັນດາຕຶກອາຄານບໍລິເວນຫໍພິພິທະພັນ, ໂຄງການບູລະນະປະຕິສັງຂອນຍອດຊໍ່ຟ້າຂອງຫໍຄຳ, ໂຄງການບູລະນະປະຕິສັງຂອນຕິດຄຳປີວຫໍພຣະບາງ ແລະຫໍຄໍາ ແລະໂຄງການບູລະນະປະຕິສັງຂອນເຮືອພະທີນັ່ງ.

ຈາກນັ້ນກໍ່ໄດ້ຮັບຊົມພາບສາມມິຕິໃນການອອກແບບໂດຍລວມ ພາຍໃນຂອບເຂດຫໍພິພິທະພັນ ເຊິ່ງສະແດງໃຫ້ເຫັນໃນການແບ່ງໂຊນ, ການປັບປຸງຕຶກອາຄານຕ່າງໆ ເປັນຫ້ອງວາງສະແດງ, ຫ້ອງອາຫານ, ຫ້ອງປະຊຸມ, ຫ້ອງຮັບແຂກ, ສວນສາທາລະນະ ແລະອື່ນໆ, ໂດຍມີວິໄສທັດໄວ້ວ່າ: “ ປັບປຸງສະ ຖານທີ່ທ່ອງທ່ຽວຫໍພິພິທະພັນແຫ່ງຊາດຫຼວງພະບາງເປັນຈຸດໝາຍປາຍທາງການທ່ອງທ່ຽວທາງດ້ານວັດທະນະທໍາ ທີ່ຕິດພັນກັບປະຫວັດສາດ, ປັບປຸງສິ່ງອໍານວຍຄວາມສະດວກດ້ານການທ່ອງທ່ຽວ ເພື່ອຮອງຮັບການບໍລິການທີ່ມີຄຸນນະພາບ ຄຽງຄູ່ກັບການປົກປັກຮັກສາ, ພັດທະນາໃຫ້ຍືນຍົງ ແລະຄົງຄຸນຄ່າດ້ານມໍລະດົກ”.

ພ້ອມດຽວກັນນີ້ກໍ່ເປີດໂອກາດ ໃຫ້ຜູ້ເຂົ້າຮ່ວມປະກອບຄຳຄິດຄຳເຫັນ ຢ່າງກົງໄປກົງມາ ແລະເປັນກັນເອງໃສ່ຮ່າງການອອກແບບ ເພື່ອເຮັດໃຫ້ການອອກແບບມີຄວາມໂລ່ງລຽນ, ບໍ່ຂັດກັບມໍລະດົກ ແລະວັດທະນະທໍາຂອງລາວເຮົາ. ເຮັດໃຫ້ຂອບເຂດຫໍພິພິທະພັນແຫ່ງຊາດຫຼວງພະບາງ ການເປັນແຫຼ່ງທ່ອງທ່ຽວລະດັບ5 ດາວ ແລະຍືນຍົງໃນອະນາຄົດ.

ພາບ-ຂ່່າວໂດຍ: ດາວອນ ມະນີວັນ