ເປີດນໍາໃຊ້ສາຍສົ່ງໄຟຟ້າແຮງສູງ 115 ກິໂລໂວນ ຈາກສະຖານີຕົ້ນເຜີ້ງ ແຂວງບໍ່ແກ້ວ ຫາ ແຂວງ ທ່າຂີ້ເຫຼັກ ປະເທດ ມຽນມາ

ເປີດນໍາໃຊ້ສາຍສົ່ງໄຟຟ້າແຮງສູງ 115 ກິໂລໂວນ ຈາກສະຖານີຕົ້ນເຜີ້ງ ແຂວງບໍ່ແກ້ວ ຫາ ແຂວງ ທ່າຂີ້ເຫຼັກ ປະເທດ ມຽນມາ

4th June 2022 0 By Admin

ພິທີເປີດນໍາໃຊ້ສາຍສົ່ງໄຟຟ້າແຮງສູງ 115 ກິໂລໂວນ ຈາກສະຖານີຕົ້ນເຜີ້ງ ແຂວງ ບໍ່ແກ້ວ ຫາ ແຂວງ ທ່າຂີ້ເຫຼັກປະເທດ ມຽນມາ ໄດ້ຈັດຂື້ນ ໃນຕອນເຊົ້າ ວັນທີ 28 ພຶດສະພາ 2022, ທີ່ສະຖານີໄຟຟ້າເມືອງ ຕົ້ນເຜິ້ງ.

ໃຫ້ກຽດເຂົ້າຮ່ວມຝ່າຍລາວ ມີ ທ່ານ ເຄື່ອນເພັດ ວົງຈັນ ຮອງເຈົ້າແຂວງບໍ່ແກ້ວ, ທ່ານ ຄໍາໂສ້ ກຸໂພຄໍາ ວ່າການຫົວໜ້າ ຫ້ອງການ ກະຊວງພະລັງງານ – ບໍ່ແຮ່, ທ່ານ ຈັນທະບູນ ສຸກອາລຸນ ຜູ້ອໍານວຍການໃຫຍ່ ລັດວິສາຫະກິດໄຟຟ້າລາວ, ທ່ານ ວົງສຸກໃຈ ສີສະແຫວງສຸກ ຜູ້ອໍານວຍການບໍລິສັດແມ່ຂອງ ຄອນກຣີດ ແອນ ມາເຕີຣຽນ ຈໍາກັດ. ຝ່າຍມຽນມາ ມີ ທ່ານ U Aung Myint Han ອຳນວຍການບໍລິສັດ Eatern ShinLon ພ້ອມດ້ວຍຄະນະ, ມີ ບັນດາການນໍາຂອງເມືອງ, ພາກສ່ວນກ່ຽວຂ້ອງ, ອຳນາດການປົກຄອງບ້ານ ແລະ ແຂກຖືກເຊິນ ເຂົ້າຮ່ວມ.


ໂຄງການສາຍສົ່ງໄຟຟ້າແຮງສູງ 115 ກິໂລໂວນ ຈາກສະຖານີຕົ້ນເຜີ້ງ ແຂວງບໍ່ແກ້ວ ຫາ ທ່າຂີ້ເຫຼັກ ປະເທດມຽນມາ ເປັນການເຊື່ອມຕໍ່ສາຍສົ່ງເພື່ອສົ່ງອອກໄຟຟ້າ ຕາມສັນຍາຊື້ – ຂາຍ ພະລັງງານໄຟຟ້າ ລະຫວ່າງ ລັດວິສາຫະກິດໄຟຟ້າລາວ ແລະ ບໍລິສັດ MCM ເຊິ່ງໂຄງການດັ່ງກ່າວເປັນການລົງທຶນຂອງ ບໍລິສັດ MCM ເປັນຜູ້ ຮັບເໝົາກໍ່ສ້າງ ແລະ ພັດທະນາ, ເປັນໂຄງການກໍ່ສ້າງ ສາຍສົ່ງ 115 ກິໂລໂວນ ວົງຈອນດຽວ, ມີຄວາມຍາວ 14,9 Km, ມີຕົ້ນເສົາທັງໝົດ 55 ເສົາ, ເຊິ່ງ 52 ຕົ້ນຢູ່ຝັ່ງລາວ ແລະ 2 ຕົ້ນຢູ່ຝັ່ງປະເທດ ມຽນມາ, ເຊິ່ງກໍາລັງໄຟຟ້າ ທີ່ສົ່ງອອກຕາມແຜນ ແມ່ນ 30 ເມກາວັດ, ເປັນໂຄງການທໍາອິດລະຫວ່າງ 2 ປະເທດ ລາວ ແລະ ມຽນມາ, ທີ່ໄດ້ເຊືອມສາຍສົ່ງໃນລະດັບແຮງດັນ 115 ກິໂລໂວນ ແລະ ຊື້ – ຂາຍ ໄຟຟ້າຮ່ວມກັນ ເຊິ່ງເປັນແຜນຍຸດທະສາດອັນໜຶ່ງຂອງລັດຖະບານ ໃນການຮ່ວມມືທາງດ້ານພະລັງງານຂອງສອງປະເທດ, ເປັນການເຊື່ອມຄວາມສໍາພັນໄມຕີ ໃຫ້ແໜ້ນແຟ້ນຍິ່ງຂື້ນ ແລະ ສ້າງຜົນປະໂຫຍດໃຫ້ແກ່ປະເທດຊາດ.


ໂອກາດນີ້, ບັນດາການນໍາ ແລະ ຄະນະອຳນວຍການບໍລິສັດຝ່າຍມຽນມ້າ ກໍ່ໄດ້ຂຶ້ນຕັດແຖບຜ້າ, ລັ່ນ ຄ້ອງເກົ້າບາດເພື່ອເປີດນໍາໃຊ້ສາຍສົ່ງໄຟຟ້າແຮງສູງ 115 ກິໂລໂວນ ຈາກສະຖານີຕົ້ນເຜີ້ງ ແຂວງບໍ່ແກ້ວ ຫາ ແຂວງ ທ່າຂີ້ເຫຼັກປະເຫຼັກ ປະເທດມຽນມ້າ ຢ່າງເປັນທາງການ. ພາຍຫຼັງສຳເລັດພິທີບັນດາການນໍາ ແລະ ພາກສ່ວນກ່ຽວຂ້ອງ ຍັງໄດ້ໄປກວດກາສາຍສົ່ງຈາກບ້ານຫ້ວຍເຜິ້ງ ເມືອງ ຕົ້ນເຜິ້ງ ຫາ ແຂວງ ທ່າຂີ້ເຫຼັກ ປະເທດມຽນມ້າ ອີກດ້ວຍ.

.

ທີ່ມາ: ໜັງສືພິມບໍ່ແກ້ວ