ກຸ່ມນາໂຕ້ ຈັດການຊ້ອມຮົບປະຈຳປີຢູ່ທະເລບອນຕິກ   ເພີ່ມທະວີຄວາມເຄັ່ງຕຶງກັບຣັດເຊຍຍິງຂຶ້ນ

ກຸ່ມນາໂຕ້ ຈັດການຊ້ອມຮົບປະຈຳປີຢູ່ທະເລບອນຕິກ ເພີ່ມທະວີຄວາມເຄັ່ງຕຶງກັບຣັດເຊຍຍິງຂຶ້ນ

8th June 2022 0 By Admin

ຕາມຂ່າວ ຊີອາໄອໃຫ້ຮູ້ວ່າ: ວັນທີ 5 ມິຖຸນາ 2022, ກຸ່ມນາໂຕ້ໄດ້ຈັດການຊ້ອມຮົບປະຈຳປີຢູ່ທະເລບອນຕິກ, ກຳປັ່ນຮົບປະມານ 40 ລຳທີ່ມາຈາກ 16 ປະເທດໄດ້ເດີນເຮືອເຂົ້າສູ່ທະເລບອນຕິກໂດຍຜ່ານທ່າກ່ຳປັ່ນສະຕອກໂຮມຂອງປະເທດສະວີເດັນ.

ກອງທັບສະວີເດັນ ໄດ້ລະບຸໃນຖະແຫຼງການສະບັບໜຶ່ງວ່າ: ການຊ້ອມຮົບປີນີ້ໄດ້ໃສ່ລະຫັດວ່າ: “ການເຄື່ອນໄຫວຢູ່ທະເລບອນຕິກ” ໂດຍຈະຈັດຂຶ້ນຢູ່ພາກໃຕ້ຂອງທະເລບອນຕິກ ແລະຈະດຳເນີນໄປຈົນຮອດວັນທີ 17 ມິຖຸນານີ້.

ໃນຖະແຫຼງການສະບັບໜຶ່ງທີ່ກະຊວງປ້ອງກັນປະເທດອາເມຣິກາເປີດເຜີຍກ່ອນໜ້ານີ້ໄດ້ລະບຸວ່າ: ການຊ້ອມຮົບເທື່ອນີ້ແມ່ນນຳໂດຍກອງທັບເຮືອທີ 6 ຂອງອາເມຣິກາ ແລະຈະປະຕິບັດການດ້ວຍກຳລັງໂຈມຕີຂອງກຸ່ມນາໂຕ້  ເພື່ອ “ເພີ່ມທະວີກຳລັງເຕົ້າໂຮມກັນແລະຄວາມສາມາດສູ້ຮົບຂອງປະເທດສະມາຊິກນາໂຕແລະປະເທດພັນທະມິດຂອງກຸ່ມນາໂຕ.”

ຂະນະທີ່ຣັດເຊຍ ໄດ້ເຝົ້າຕິດຕາມການຊ້ອມຮົບຄັ້ງນີ້ຢ່າງໃກ້ຊິດ ທ່າມກາງຄວາມຂັດແຍ່ງກັບຊາດຕາເວັນຕົກ ໂດຍສະເພາະປະເທດສະມາຊິກນາໂຕ້ເພີ່ມທະວີຂຶ້ນ.