ຄໍາມ່ວນຊີ້ແຈງແລ້ວ! ເຫດຄົນໄທຕິດເຊື້ອໂຄວິດ-19 ແລ້ວເດີນທາງເຂົ້າມາໃນແຂວງ

ຄໍາມ່ວນຊີ້ແຈງແລ້ວ! ເຫດຄົນໄທຕິດເຊື້ອໂຄວິດ-19 ແລ້ວເດີນທາງເຂົ້າມາໃນແຂວງ

19th March 2020 0 By Education

ຈາກກ່ອນໜ້ານີ້ເປັນກະແສໃຫຍ່ໂຕ ເຫດສະຖານກົງສູນໃຫຍ່ແຫ່ງຣາຊະອານາຈັກໄທ ປະຈຳແຂວງສະຫວັນນະເຂດ ແຈ້ງກ່ຽວກັບກໍລະນີຄົນລາວທີ່ມີການພົວພັນກັບຄົນໄທຜູ້ຕິດເຊື້ອໂຄວິດ-19 ຜູ້ເດີນທາງເຂົ້າມາແຂວງຄຳມ່ວນ ຜ່ານດ່ານຂົວມິດຕະພາບ 3 ຄຳມ່ວນ-ນະຄອນພະນົມ  ເຊິ່ງສ້າງຄວາມແຕກຕື່ນແກ່ສັງຄົມຢ່າງໃຫຍ່ຫຼວງ, ຫຼ້າສຸດກຸ່ມຄົນເຫຼົ່ານັ້ນແມ່ນຢູ່ໃນການຕິດຕາມຂອງແພດ-ໝໍ ແລະ ປັດຈຸບັນນີ້ ຄໍາມ່ວນຍັງບໍ່ມີຜູ້ຕິດເຊື້ອພະຍາດດັ່ງກ່າວ.

ທ່ານ ບຸນມີ ພິມມະສອນ ຮອງເຈົ້າແຂວງຄຳມ່ວນ ທັງເປັນຫົວໜ້າຄະນະສະເພາະກິດຄວບຄຸມ ແລະ ສະກັດກັ້ນການລະບາດຂອງພະຍາດອັກເສບປອດສາຍພັນໃໝ່ ໂຄວິດ-19 ຂັ້ນແຂວງ ໄດ້ຖະແຫລງຂ່າວຕໍ່ສື່ມວນຊົນໃນຕອນແລງວັນທີ 18 ມີນາ 2020 ກ່ຽວກັບກໍລະນີຂອງຄົນໄທ ທີ່ຕິດເຊື້ອໂຄວິດ-19 ທີ່ໄດ້ເດີນທາງເຂົ້າມາແຂວງຄໍາມ່ວນ ໃນວັນທີ 12 ມີນາ 2020 ຕາມແຈ້ງການຂອງສະຖານກົງສູນໃຫຍ່ຣາຊະອານາຈັກໄທ ປະຈຳແຂວງສະຫວັນນະເຂດນັ້ນ ທຸກພາກສ່ວນກ່ຽວຂ້ອງຂອງແຂວງ ກໍໄດ້ຮີບຮ້ອນຕິດຕາມກວດກາ ໂດຍສະເພາະບຸກຄົນທີ່ຢູ່ໃນຮ້ານອາຫານຈຳນວນ 2 ແຫ່ງ ທີ່ຜູ້ຕິດເຊື້ອໄດ້ເຂົ້າໄປໃຊ້ບໍລິການ ເຊິ່ງພະນັກງານແພດ-ໝໍ ໄດ້ລົງໄປການດວກກາ ແຕ່ຍັງບໍ່ພົບກໍລະນີທີ່ເຂົ້າເຄືອຄ່າຍຕິດເຊື້ອໂຄວິດ-19. ແຕ່ເຖິງຢ່າງໃດກໍຕາມ ບັນດາບຸກຄົນທີ່ຢູ່ໃນເປົ້າໝາຍ ແມ່ນຈະໄດ້ສືບຕໍ່ຕິດຕາມກວດກາຈົນຄົບ 14 ວັນ.

ທ່ານ ບຸນມີ ພິມມະສອນ ໄດ້ໃຫ້ຮູ້ອີກວ່າ: ສະພາບການລະບາດຂອງພະຍາດໂຄວິດ-19 ແມ່ນມີຄວາມຮຸນແຮງ ແລະ ແຜ່ລາມໄປໃນຫລາຍປະເທດ. ເຖິງວ່າຢູ່ໃນ ສປປ ລາວ ກໍຄື ແຂວງຄໍາມ່ວນ ຍັງບໍ່ທັນມີກໍລະນີຕິດເຊື້ອ ແຕ່ວ່າມີຄວາມສ່ຽງສູງເນື່ອງຈາກບັນດາປະເທດອ້ອມຂ້າງໄດ້ພົບຜູ້ຕິດເຊື້ອເພີ່ມຂຶ້ນ ໂດຍໄດ້ມີການໄປ-ມາຫາສູ່ ເຂົ້າ-ອອກຜ່ານດ່ານສາກົນໃນແຕ່ລະວັນ. ສຳລັບການເຝົ້າລະວັງຕໍ່ພະຍາດດັ່ງກ່າວ ແມ່ນໄດ້ແຕ່ງຕັ້ງພະນັກງານແພດ-ໝໍ ລົງປະຈຳແຕ່ລະດ່ານສາກົນ ໂດຍມີເຄື່ອງກວດອຸນຫະພູມ ເພື່ອກວດກາຄົນທີ່ມີການເຄື່ອນໄຫວເຂົ້າ-ອອກໃນແຕ່ລະວັນ, ພ້ອມນັ້ນກໍໄດ້ອອກແຈ້ງການໃຫ້ປິດຊົ່ວຄາວດ່ານທ້ອງຖິ່ນ ແລະ ດ່ານປະເພນີຈຳນວນ 4 ແຫ່ງ ເພື່ອສະກັດກັ້ນການແຜ່ລະບາດຂອງພະຍາດດັ່ງກ່າວ.

ສຳລັບແຜນການຮັບມືໃນຕໍ່ໜ້າ ແມ່ນຈະໄດ້ເພີ່ມຈຳນວນພະນັກງານແພດ-ໝໍ ພ້ອມທັງເພີ່ມອຸປະກອນການກວດກາ ລົງປະຈຳໃນແຕ່ລະດ່ານສາກົນ ເພື່ອໃຫ້ມີຄວາມສະດວກໃນການປະຕິບັດ ແລະ ເຂັ້ມງວດໃນການກວດກາຂຶ້ນຕື່ມ, ພ້ອມທັງຮຽກຮ້ອງໃຫ້ທຸກພາກສ່ວນ ຈົ່ງອຳນວຍຄວາມສະດວກ ແລະ ໃຫ້ການຮ່ວມມືແກ່ເຈົ້າໜ້າທີ່ກ່ຽວຂ້ອງ ເພື່ອຮັບປະກັນຢັບຢັ້ງການແຜ່ລະບາດຂອງພະຍາດດັ່ງກ່າວ.

ທີ່ມາ: ຂ່າວສານປະເທດລາວ