ຈຸດປ່ຽນຄັ້ງໃຫຍ່! ລັດຖະສະພາຢູໂຣບ ລົງມະຕິສະໜັບສະໜູນ ຢຸດຂາຍລົດກິນນໍ້າມັນ ພາຍໃນປີ2035

ຈຸດປ່ຽນຄັ້ງໃຫຍ່! ລັດຖະສະພາຢູໂຣບ ລົງມະຕິສະໜັບສະໜູນ ຢຸດຂາຍລົດກິນນໍ້າມັນ ພາຍໃນປີ2035

10th June 2022 0 By Admin

ສຳນັກຂ່າວ ຊີເອັນເອັນ ລາຍງານວ່າ: ໃນວັນທີ 8 ມິຖຸນາ 2022 ສະມາຊິກ ລັດຖະສະພາຢູໂຣບ ໄດ້ລົງມະຕິເຫັນດີຫ້າມຂາຍລົດຍົນໃໝ່ທີ່ກິນນໍ້າມັນ(ເຄື່ອງຈັກສັນດາບ)ພາຍໃນປີ2035 ໃນສິ່ງທີ່ຕະເປັນໜຶ່ງໃນກົດໝາຍທີ່ໜັກແໜ້ນທີ່ສຸດຂອງໂລກ ສຳລັບການເລີກໃຊ້ລົດຍົນນໍ້າມັນແອັດຊັງຢ່າງຄ່ອຍເປັນຄ່ອຍໄປ ຫາກໄດ້ຮັບອະນຸມັດຈາກຄະນະມົນຕີຢູໂຣບ.

ໃນຂະນະທີ່ມາດຕະການນີ້ຍັງຕ້ອງຖົກຖຽງກັນໃນຄະນະມົນຕີຢູໂຣບ ແລະ ຜ່ານເປັນກົດໝ!ຍ ແຕ່ຜົນໂຫວດຂອງສະມາຊິກລັດຖະສະພາຢູໂຣບຖືກເບິ່ງໃນຖານະກ້າວຍ່າງທີ່ສຳຄັນທີ່ສຸດໃນຂະບວນການດັ່ງກ່າວ ຫາກເຫັນດີໂດຍສົມບູນອາດໝາຍເຖິງຍອດຂາຍທີ່ຫຼຸດລົງຂອງລົກຍົນໄຮບຣີດແລະການປ່ຽນຜ່ານຢ່າງວ່ອງໄວ ສູ່ລົດຍົນໄຟຟ້າເຕັມຮູບແບບ.
ກຸ່ມຂວາກາງຂອງລັດຖະສະພາຢູໂຣບ ສົ່ງສຽງສະໜັບສະໜູນຫ້າມຂາຍລົດຍົນໃໝ່ເຄື່ອງຈັກສັນດາບແບບ100% ໃນປີ2035 ແຕ່ສະມາຊິກບາງສ່ວນຮຽກຮ້ອງໃຫ້ຫ້າມປະມານ90%ກໍພໍ ເຊິ່ງໝາຍຄວາມວ່າ1ໃນ10 ຂອງລົດໃໝ່ທີ່ວາງຈຳໜ່າຍຍັງສາມາດເປັນລົດເຄື່ອງຈັກສັນດາບ.

ທ່ານ ປີເຕີ ລີເຊ ສສ ເຢຍລະມັນ ບອກກັບຜູ້ສື່ຂ່າວກ່ອນໜ້ານີ້ວ່າ ກຸ່ມຂວາກາງ EPPຂອງເຂົາບໍ່ສະໜັບສະໜູນການຫ້າມແບບ100% ພ້ອມລະບຸວ່າ ລົດຍົນເຄື່ອງຈັກສັນດາບຍັງຄວນໄດ້ຮັບອະນຸຍາດໃຫ້ໃຊ້ຕໍ່ໄປແລະເທັກໂນໂລຊີກ່ຽວກັບເຊື້ອໄຟສັງເຄາະຄາບອນຕໍ່າໜ້າຈະດີຂຶ້ນແລ້ວໃນຊ່ວງເວລານັ້ນ.


ເຂົາລະບຸວ່າມີຄວາມເປັນໄປໄດ້ວ່າໃນອະນາຄົດ ລົດຍົນເຄື່ອງຈັກສັນດາບທີ່ໃຊ້ເຊື້ອໄຟສັງເຄາະຈະໄດ້ຮັບຄວາມສົນໃຈຫຼາຍກວ່າລົດຍົນໄຟຟ້າ ເນື່ອງຈາກລົດຍົນເຄື່ອງຈັກສັນດາບ ມີຄວາມເປັນຈິງຫຼາຍກວ່າ ສຳລັບປະເທດກຳລັງພັດທະນາໃນອາຟຣິກາ ແລະ ອາຊີ.


ອຸດສາຫະກຳລົດຍົນມີບົດບາດສຳຄັນໃນເສດຖະກິດ ຢູໂຣບ ຄິດເປັນອັດຕາສ່ວນ70% ຂອງຈີດີພີ ແລະສະໜັບສະໜູນການຈ້າງງານ14,6ລ້ານຄົນ ຢ່າງໃດກໍຕາມການຂົນສົ່ງເປັນພຽງພາກດຽວທີ່ມີການປ່ອຍກ໊າຊເຮືອນແກ້ວ ເພີ່ມໝາຍຂຶ້ນແລະລົດຍົນໃນທ້ອງຖະໜົນຄິດເປັນອັດຕາສ່ວນ21%ຂອງມົນລະພິດຄາບອນໄດອອກໄຊ ໃນປີ2017.