ທະນາຄານກາງເອີຣົບ ປະກາດປັບຂຶ້ນອັດຕາດອກເບ້ຍ ຄັ້ງທຳອິດໃນຮອບ 11 ປີ ສະກັດເງິນເຟີ້

ທະນາຄານກາງເອີຣົບ ປະກາດປັບຂຶ້ນອັດຕາດອກເບ້ຍ ຄັ້ງທຳອິດໃນຮອບ 11 ປີ ສະກັດເງິນເຟີ້

11th June 2022 0 By Admin

ທະນາຄານກາງສະຫະພາບເອີຣົບ ຫລື ອີຊີບີ (ECB) ປະກາດປັບຂຶ້ນອັດຕາດອກເບ້ຍນະໂຍບາຍ 0,25% ເຊິ່ງເປັນຄັ້ງທຳອິດໃນຮອບ 11 ປີ ໂດຍຈະມີຜົນຕັ້ງແຕ່ເດືອນກໍລະກົດເປັນຕົ້ນໄປ ເພື່ອຄວບຄຸມອັດຕາເງິນເຟີ້ທີ່ກຳລັງເພີ່ມຂຶ້ນນັບມື້ໃນຂະນະນີ້.

ໃນຖະແຫຼງການຂອງອີຊີບີ ລະະບຸວ່າ ອັດຕາເງິນຟີ້ເພີ່ມສູງຂຶ້ນ ຖືວ່າເປັນຄວາມທ້າທາຍ ສຳລັບສະຫະພາບເອີຣົບ ແລະ ອີຊີບີ ຈະເຮັດໃຫ້ແນ່ໃຈວ່າ ອັດຕາເງິນເຟີ້ຈະກັບມາສູ່ເປົ້າໝາຍໄລຍະກາງທີ່ 2% ແຕ່ຂະນະນີ້ ຄາດວ່າ ອັດຕາເງິນເຟີ້ຂອງສະຫະພາບເອີຣົບຢູ່ທີ່ປະມານ 8,1%.

ທ່ານ ນາງ ຄຣິສຕິນ ລາກາດ ປະທານ ອີຊີບີ ເປີດເຜີຍວ່າ: ການປັບຂຶ້ນອັດຕາດອກເບ້ຍ ມັນບໍ່ແມ່ນຄວາມຕ້ອງການຂອງ ອີຊີບີ ແຕ່ຫຼັງຈາກທີ່ລາຄາພະລັງງານເພີ່ມຂຶ້ນ 40% ເມື່ອທຽບໃສ່ຊ່ວງດຽວກັນຂອງປີຜ່ານມາ, ຂະນະທີ່ລາຄາອາຫານເພີ່ມຂຶ້ນ 7,5% ໃນເດືອນພຶດສະພາ  ແຕ່ຍອມຮັບວ່າ ການປັບຂຶ້ນອັດຕາດອກເບ້ຍ ອາດຈະບໍ່ສົ່ງຜົນໃຫ້ອັດຕາເງິນເຟີ້ຫຼຸດລົງມາທັນທີ.

ທັງນີ້ ອີຊີບີ ປະກາດປັບຂຶ້ນອັດຕາດອກເບ້ຍ 0,25% ໃນເດືອນກໍລະກົດ ແລະ ຄາດວ່າ ຈະປັບຂຶ້ນອີກຄັ້ງໃນທ້າຍປີນີ້ ໂດຍປັດຈຸບັນອັດຕາດອກເບ້ຍນະໂຍບາຍຂອງ ອີຊີບີ  ຢູ່ທີ່ -0,50%. ຂະນະທີ່ ອີຊີບີ ຄາດວ່າ ອັດຕາເງິນເຟີ້ຂອງສະຫະພາບເອີຣົບປີນີ້ ຈະຢູ່ໃນລະດັບ 6,8% ກ່ອນຈະຫຼຸດລົງເປັນ 3,5% ແລະ 2,1% ໃນປີ 2023 ແລະ 2024 ຕາມລຳດັບ.