ອົງການອາຫານ ແລະ ການກະເສດແຫ່ງ ສະຫະປະຊາຊາດ ເຕືອນ ລາຄາເຂົ້າ ອາດປັບຂຶ້ນຕາມລາຄາອາຫານ

ອົງການອາຫານ ແລະ ການກະເສດແຫ່ງ ສະຫະປະຊາຊາດ ເຕືອນ ລາຄາເຂົ້າ ອາດປັບຂຶ້ນຕາມລາຄາອາຫານ

15th June 2022 0 By Admin

ອົງການອາຫານ ແລະ ການກະເສດແຫ່ງ ສະຫະປະຊາຊາດ (FAO) ເປີດເຜີຍວ່າ ການທີ່ລາຄາອາຫານທົ່ວໂລກປັບຂຶ້ນໃນ 2-3 ເດືອນຜ່ານມາ ອາດເຮັດໃຫ້ລາຄາເຂົ້າ ເຊິ່ງເປັນອາຫານຫຼັກຂອງຄົນອາຊີປັບຂຶ້ນໄປຕາມໆກັນ.


ອົງການ ອາຫານ ແລະ ການກະເສດ ລະບຸວ່າ ລາຄາອາຫານ ບໍ່ວ່າຈະເປັນເຂົ້າສາລີ, ພືດພັນທັນຍາຫານຕ່າງໆ ຕະຫຼອດຮອດນ້ຳມັນພືດ ໄດ້ປັບຂຶ້ນສູງ ເຊິ່ງເກີດຈາກຫຼາຍປັດໄຈ ລວມທັງລາຄາປຸ໋ຍ (ຝຸ່ງວິທະຍາສາດ), ລາຄາພະລັງງານ ແລະ ການທີ່ຫຼາຍປະເທດໂຈະການສົ່ງອອກທັນຍາພືດທີ່ເປັນສ່ວນປະກອບການປຸງແຕ່ງອາຫານ ໄດ້ເຮັດໃຫ້ລາຄາອາຫານທົ່ວໂລກເພີ່ມນຂຶ້ນ. ດັ່ງນັ້ນ ລາຄາເຂົ້າ ອາດເປັນສິນຄ້າຊະນິດຕໍ່ໄປທີ່ປັບຂຶ້ນ ໂດຍດັດສະນີຂອງອົງການ FAO ໃນເດືອນພຶດສະພາ ບົ່ງຊີ້ວ່າ ລາຄາເຂົ້າໄດ້ປັບຂຶ້ນ 5 ເດືອນຕິດຕໍ່ກັນແລ້ວ ແລະ ຈຸລະດັບສູງສຸດໃນຮອບ 12 ເດືອນ.


ທ່ານ ນາງ ໂຊນັລ ວາມາ ຫົວໜ້ານັກເສດຖະສາດຂອງທະນາຄານໂມນູຣະຂອງຍີ່ປຸ່ນ ເປີດເຜີຍວ່າ ເຖິງວ່າການຜະລິດເຂົ້າຍັງອຸດົມສົມບູນ ແຕ່ການເພີ່ມຂຶ້ນຂອງລາຄາເຂົ້າສາລີ ແລະ ຕົ້ນທຶນການຜະລິດກະສິກຳທີ່ເພີ່ມຂຶ້ນ ອາດຈະເຮັດໃຫ້ລາຄາເຂົ້າປັບຂຶ້ນໄປຕາມໆກັນ, ແຕ່ຄວາມສ່ຽງທີ່ລາຄາເຂົ້າເພີ່ມຂຶ້ນສູງນັ້ນ ຍັງຢູ່ໃນລະດັບຕ່ຳ ເນື່ອງຈາກເຂົ້າທົ່ວໂລກມີພຽງພໍສຳລັບການບໍລິໂພກ, ອີກຢ່າງໜຶ່ງການເກັບກ່ຽວຜົນຜະລິດໃນລະດູແລ້ງປີນີ້ ຢູ່ອິນເດຍ ແລະ ອີກຫຼາຍປະເທດທີ່ຜະລິດເຂົ້າຄາດວ່າ ຈະໄດ້ຮັບຜົນຜະລິດສູງ.


ທັງນີ້ ຄວາມຂັດແຍ່ງລະຫວ່າງຣັດເຊຍ ແລະ ອູແກຣນ ໄດ້ຍູ້ດັນໃຫ້ລຄາເຂົ້າສາລີເພີ່ມສູງຂຶ້ນ ເນື່ອງຈາກທັງສອງປະເທດເປັນຜູ້ຜະລິດເຂົ້າສາລີລາຍໃຫຍ່ຂອງໂລກ, ນອກຈາກນີ້ ຍັງເຮັດໃຫ້ການສົ່ງອອກທັນຍາພືດຊະນິດຕ່າງໆ ໜ້ອຍລົງ ເຮັດໃຫ້ລາຄາເຂົ້າສາລີເພີ່ມຂຶ້ນເຖິງ 50% ນັບແຕ່ຕົ້ນເດືອນມີນາເປັນຕົ້ນມາ.