ທ່ານ ທອງລຸນ ສີສຸລິດ ລົງຊຸກຍູ້ພື້ນຖານການ ປູກຝັງ-ລ້ຽງສັດ ຢູ່ເມືອງທຸລະຄົມ ແລະ ເມືອງວັງວຽງ

ທ່ານ ທອງລຸນ ສີສຸລິດ ລົງຊຸກຍູ້ພື້ນຖານການ ປູກຝັງ-ລ້ຽງສັດ ຢູ່ເມືອງທຸລະຄົມ ແລະ ເມືອງວັງວຽງ

14th June 2022 0 By Admin

ຂປລ. ດ້ວຍຄວາມເປັນຫ່ວງໃຍຂອງ ສູນກາງພັກ ໂດຍສະເພາະແມ່ນ ສະຫາຍ ເລຂາທິ ການໃຫຍ່ ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ, ຕໍ່ການພັດທະນາເສດຖະກິດ-ສັງຄົມ ແລະ ຍົກລະດັບຄຸນນະພາບຊີວິດການເປັນຢູ່ຂອງປະຊາຊົນ, ສ້າງກຳລັງແຮງໃຫ້ແກ່ເສດຖະກິດແຫ່ງຊາດ, ສະຫາຍ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ພ້ອມດ້ວຍຄະນະໄດ້ລົງຕິດຕາມ, ຊຸກຍູ້ ແລະ ຊີ້ນໍາອົງການປົກຄອງທ້ອງຖິ່ນ ກໍຄື ຜູ້ປະກອບການ ໃນການຜະລິດ-ທຸລະກິດ ຢູ່ແຂວງວຽງຈັນ ໂດຍໄດ້ຮັບການຕ້ອນຮັບຂອງ ສະຫາຍ ດາວເຮືອງ ນັນທະວົງ ຮອງເຈົ້າແຂວງວຽງຈັນ, ມີເຈົ້າເມືອງ ແລະ ພາກສ່ວນກ່ຽວຂ້ອງ ໃຫ້ການຕ້ອນຮັບ.


ໂອກາດນີ້, ສະຫາຍ ທອງລຸນ ສີສຸລິດ ພ້ອມຄະນະ ໄດ້ໄປຢ້ຽມຢາມ ຟາມງົວຊີ້ນ ນ້ຳເພັດຈະ ເລີນຊັບ ໂດຍການຕ້ອນຮັບຂອງ ທ່ານ ໂຕ່ຊີ້ງ ແສງພະຈັນ ປະທານບໍລິສັດນໍ້າເພັດຈະເລີນຊັບເຊິ່ງຟາມດັ່ງກ່າວ ຕັ້ງຢູ່ບ້ານຕານປ່ຽວ ເມືອງທຸລະຄົມ ແຂວງວຽງຈັນ, ສ້າງຕັ້ງຂຶ້ນໃນປີ 2019, ມີເນື້ອທີ່ 12 ເຮັກຕາ, ໃນນີ້ໄດ້ແບ່ງອອກເປັນເນື້ອທີ່ຫ້ອງການສຳນັກງານ, ເຮືອນຮົ່ມປູກຜັກອິນ ຊີແບບໂຮໂດຣໂປນິກ 18 ຫລັງ, ໜອງປາ 8 ໜອງ, ສ່ວນທີ່ຍັງເຫລືອແມ່ນໂຮງເຮືອນເກັບອາຫານສັດ, ຄອກລ້ຽງງົວພໍ່ແມ່ພັນ, ງົວອະນຸບານ, ງົວລຸ້ນ ແລະ ງົວທອມ ເຊິ່ງເປົ້າໝາຍຂອງບໍລິສັດ ນໍ້າເພັດ ຈະເລີນຊັບ ແມ່ນນຳເຂົ້າພັນງົວຊີ້ນສາຍເລືອດ 100% ເພື່ອນຳມາຂະຫຍາຍພັນ, ທອມງົວ ເພື່ອໃຫ້ໄດ້ຊີ້ນງົວຄຸນນະພາບສູງ, ຜະລິດ ແລະ ຈຳໜ່າຍນ້ຳເຊື້ອງົວຊີ້ນພັນດີ; ປັບປຸງພັດທະນາແນວພັນງົວຕານປ່ຽວ1, ພັນງົວທີ່ນຳເຂົ້າມາມີສາຍພັນບຣາມັນ, ແອງກັສ ແລະ ຊາໂຣແລ ສາຍເລືອດ 100%, ພາຍໃນຟາມຈະນໍາໃຊ້ເຕັກໂນໂລຊີ ເພື່ອສ້າງຟາມ ຕາມມາດຖານຂອງອາຊຽນ; ຂະຫຍາຍພັນສັດ ດ້ວຍວິທີການປະສົມພັນທຽມ ແລະ ຝາກໂຕອ່ອນ; ຈັດການຟາມຕາມຫລັກວິຊາການລ້ຽງສັດທີ່ເໝາະສົມ; ປະຕິບັດມາດຕະການດ້ານນິຕິກຳ ແລະ ວິຊາການຢ່າງເຄັ່ງຄັດ.


ບໍລິສັດ ນໍ້າເພັດ ຈະເລີນຊັບ ສ້າງຕັ້ງຟາມລ້ຽງງົວດັ່ງກ່າວຂຶ້ນ ໂດຍໄດ້ວາງວິໄສທັດໄວ້ວ່າ: ບຸກເບີກການຜະລິດງົວຊີ້ນສາຍເລືອດ 100% ຂອງ ສປປ ລາວ ໄປສູ່ມາດຕະຖານສາກົນ, ປັດຈຸບັນ ຟາມລ້ຽງງົວຊີ້ນ ນໍ້າເພັດ ຈະເລີນຊັບ ມີງົວທັງໜົດ 288 ໂຕ, ມູນຄ່າ 21 ຕື້ກີບ ແລະ ມີແຜນເພີ່ມໃຫ້ບັນລຸ 205 ຕື້ກີບ, ເພີ່ມເນື້ອທີ່ຈາກ 12 ເຮັກຕາໃນປັດຈຸບັນ ໃຫ້ບັນລຸ120 ເຮັກຕາ; ເພີ່ມແມ່ພັນ 1.200 ແມ່ ຫລື ສ້າງຝູງງົວ ຈາກທີ່ມີປັດຈຸບັນໃຫ້ບັນລຸ 2.700 ໂຕ, ທອມງົວ ເພື່ອການຜະລິດຊີ້ນງົວຄຸນນະພາບສູງທົດແທນການນຳເຂົ້າ 2.000 ໂຕຕໍ່ປີ, ຈຳໜ່າຍພໍ່ພັນ-ແມ່ພັນງົວທີ່ດີ ບໍ່ຕ່ຳກວ່າ 800 ໂຕຕໍ່ປີ, ຜະລິດ ແລະ ຈຳໜ່າຍນ້ຳເຊື້ອງົວພັນດີ ສະໜອງໃຫ້ແກ່ກະສິກອນທົ່ວປະເທດ ແລະ ຄາດຄະເນຈະສາມາດຜະລິດງົວໃນລະດັບ 29.428 ໂຕ ພາຍໃນ 10 ປີ, ນໍ້າໜັກສັດບໍ່ຕໍ່າກວ່າ 20.500 ໂຕນ, ລວມມູນຄ່າປະມານ 700 ຕື້ກີບ.


ພ້ອມນີ້, ສະຫາຍ ທອງລຸນ ສີສຸລິດ ໄດ້ສະແດງຄວາມຊົມເຊີຍ ແລະ ຍ້ອງຍໍມາຍັງ ບໍລິສັດນໍ້າເພັດຈະເລີນຊັບ ທີ່ຕັດສິນໃຈລົງທຶນເຂົ້າໃສ່ວຽກງານກະສິກຳປູກຝັ່ງ ແລະ ລ້ຽງສັດ ພ້ອມມີວິໄສທັດ ສຳຄັນແມ່ນຄວາມມັກຮັກທີ່ຈະພັດທະນາ ໂດຍສະເພາະການຕັດສິນ ໃຈນຳງົວພັນຊີ້ນສາຍເລືອດ100% ເຂົ້າມາລ້ຽງ ແລະ ຂະຫຍາຍພັນພາຍໃນຟາມ, ພ້ອມນັ້ນ ທັງໄດ້ເນັ້ນ ບໍລິສັດ ເອົາໃຈໃສ່ສົ່ງເສີມປະຊາຊົນທີ່ຢູ່ອ້ອມຂ້າງ ໃຫ້ມີສ່ວນຮ່ວມໃນການປູກຝັງເຊັ່ນ: ການປູກຫຍ້າ, ປູກສາລີ, ປູກຜັກປອດສານພິດ, ເມື່ອການລ້ຽງສັດຂະຫຍາຍຕົວດີ ໃນອະນາຄົດໃຫ້ ບໍລິສັດ ເອົາໃຈໃສ່ສົ່ງອອກຜະລິດຕະພັນຊີ້ນງົວ ເປັນຫລາຍຮູບແບບເພື່ອສ້າງມູນຄ່າເພີ່ມ.

ຈາກນັ້ນ, ກໍໄປຢ້ຽມຢາມຄອບຄົວຕົວແບບປູກໝາກແຕງເມລອນ ຢູ່ບ້ານໄຮ່ຢອນ ເມືອງທຸລະຄົມ ແຂວງວຽງຈັນ ເຊິ່ງເປັນຄອບຄົວຂອງ ທ້າວ ວິໄລພອນ ອິນທະວົົງ ໄດ້ເລີ່ມທົດລອງປູກມາແຕ່ຕົ້ນປີ 2018 ດ້ວຍທຶນຕົວເອງໃຊ້ເງິນ 2 ລ້ານກີບ ແລະ ທົດລອງປູກແບບໃຊ້ໄມ້ໄຜ່ເປັນໂຄງປູກ ແລະ ທ້າຍປີ 2018 ໄດ້ຂາຍໝາກແຕງ 700 ກິໂລ ເມື່ອເຫັນວ່າມີຜົນຕອບຮັບທີ່ດີ, ປີ 2019-2020 ທາງຄອບຄົວຈຶ່ງຕັດສິນໃຈປຸກໂຮງເຮືອນ 8 ຫລັງ ແລະ ປີ 2021 ໄດ້ຂະຫຍາຍໂຮງເຮືອນ ອອກເປັນ 15 ຫລັງ ສະເລ່ຍຫລັງໜຶ່ງມີມູນຄ່າປະມານ 35 ລ້ານກີບ. ສ່ວນການຂາຍຜົນຜະລິດສະເລ່ຍ ເດືອນລະ 2.000 ກິໂລກຣາມ, ຂາຍສົ່ງກິໂລລະ 20.000 ກີບ. ປັດຈຸບັນມີ ປະຊາຊົນພາຍໃນເມືອງຈໍານວນໜຶ່ງ ມາຖອດຖອນບົດຮຽນໃນການປູກໝາກແຕງເມລອນ.

ພາຍຫລັງສຳເລັດການເຄື່ອນໄຫວຢ້ຽມຢາມ ເມືອງທຸລະຄົມ ແລ້ວ, ສະຫາຍ ທອງລຸນ ສີສຸລິດ ພ້ອມຄະນະ ກໍໄດ້ເດີນທາງໄປຢ້ຽມຢາມ ພູເພັດຟາມ ລ້ຽງງົວ, ແບ້ນົມ ແລະມາ ຢູ່ບ້ານວັງໝ້ຽງ ເມືອງວັງວຽງ, ຢ້ຽມຢາມສາງພັກສິນຄ້າ ແລະ ສະຖານີບໍລິການຂົນສົ່ງສິນຄ້າ ທາງລົດໄຟລາວ-ຈີນ ແລະ ສະຖານທີ່ທ່ອງທ່ຽວ ຕາມເສັ້ນທາງວົງແຫວນ ເມືອງວັງວຽງ ຕື່ມອີກ.
ໃນໂອກາດຢ້ຽມຢາມ, ພື້ນຖານການຜະລິດ ຂອງຜູ້ປະກອບການ ແລະ ປະຊາຊົນ ຈໍານວນໜຶ່ງ ຢູ່ເມືອງ ທຸລະຄົມ ແລະ ເມືອງວັງວຽງ ໃນຄັ້ງນີ້, ສະຫາຍ ທອງລຸນ ສີສຸລິດ ໄດ້ເນັ້ນການສ້າງຄວາມເຂັ້ມແຂງ ໃຫ້ແກ່ການຜະລິດພາຍໃນ, ເພື່ອຕອບສະໜອງການຊົມໃຊ້ ຢູ່ພາຍໃນ ແລະ ເປັນສິນຄ້າສົ່ງອອກ ໂດຍສະເພາະແມ່ນດ້ານສະບຽງອາຫານ ກໍຄື ການຮັບໃຊ້ການທ່ອງ ທ່ຽວ ໃນເງື່ອນໄຂເປີດປະເທດ ປະກອບສ່ວນສໍາຄັນ ເຂົ້າໃນການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ-ເງິນຕາ ໃນປັດຈຸບັນ ແລະ ສ້າງຄວາມເຂັ້ມແຂງໃຫ້ແກ່ລະບົບເສດຖະກິດແຫ່ງຊາດໃນຕໍ່ໜ້າ. ພ້ອມນີ້, ສະຫາຍຍັງໄດ້ຮຽກຮ້ອງໃຫ້ອົງການປົດຄອງແຂວງວຽງຈັນ ສືບຕໍ່ຍູ້ແຮງການພັດທະນາເສດຖະກິດ-ສັງຄົມ ທີ່ມີທ່າແຮງຂອງແຂວງ ໃຫ້ຂະຫຍາຍຕົວຢ່າງຕໍ່ເນື່ອງ, ສ້າງເງື່ອນໄຂ, ອຳນວຍຄວາມສະດວກ ໃນການຜະລິດທຸລະກິດ, ການສະໜອງເຕັກນິກ, ທຶນຮອນ ແລະ ຕະຫລາດ ທີ່ໝັ້ນຄົງ ເພື່ອຍົກລະດັບລາຍໄດ້ ແລະ ຄຸນນະພາບຊີວິດ ຂອງປະຊາຊົນແຂວງວຽງຈັນໃຫ້ສູງຂຶ້ນ; ຕ້ອງເອົາໃຈໃສ່ໃຫ້ຜູ້ປະກອບການ ແລະ ປະຊາຊົນ ຮ່ວມສໍາພັນກັນເປັນຕ່ອງໂສ້ ໃນຂະບວນການຜະລິດ-ທຸລະກິດ ຂອງແຂວງວຽງຈັນ ໃຫ້ມີຄວາມໜັກ ແໜ້ນ, ເຂັ້ມແຂງ ຂຶ້ນຢ່າງບໍ່ຢຸດຢັ້ງ.