ລົດໄຟຟ້າໃນລາວ ພວມເພີ່ມຂຶ້ນຕໍ່ເນື່ອງປະຢັດເງິນໃນຖົງໄດ້ຫຼາຍຂຶ້ນ

ລົດໄຟຟ້າໃນລາວ ພວມເພີ່ມຂຶ້ນຕໍ່ເນື່ອງປະຢັດເງິນໃນຖົງໄດ້ຫຼາຍຂຶ້ນ

16th June 2022 0 By Education

ຫາກໍ່ເກີດເຫດໄຟໄໝ້ລົດໄຟຟ້າ ຫຼາຍຄົນອາດຕົກໃຈ ແລະຂາດຄວາມເຊື່ອໝັ້ນໃນລົດໄຟຟ້າ ແຕ່ຢ່າຟ້າວຄິດໄປໄກ ຢ່າເອົາກໍລະນີດຽວມາຕັດສິນບັນຫາລວມຂອງວິທະຍາສາດໜຶ່ງທີ່ພວມເກີດຂຶ້ນໃໝ່ ແລະເປັນທີ່ຕ້ອງການຂອງຄົນທົ່ວໂລກໃນຂະນະນີ້.

ກ່ຽວກັບການໃຊ້ລົດໄຟຟ້າໃນລາວແມ່ນຍັງຄົງເປັນວິໄສທັດຂອງປະເທດລາວ ໃນນາມເປັນແຫຼ່ງທີ່ມີທ່າແຮງຜະລິດກະແສໄຟຟ້າ ແລະບໍ່ໄດ້ເພິ່ງພາພາຍນອກ ລັດຖະບານຢືນຢັນຍັງຈະເດີນໜ້າສົ່ງເສີມການນຳໃຊ້ລົດໄຟຟ້າ ວາງເປົ້າໝາຍຮອດປີ 2025 ໃຫ້ມີຢ່າງໜ້ອຍ 20.000 ຄັນ ຫຼື ເທົ່າກັບ 1% ຂອງຈຳນວນພາຫະນະທີ່ມີຢູ່ທັງໝົເໃນປະເທດລາວ.

ໃນຈຳນວນ 20.000 ຄັນນີ້ແມ່ນໃຫ້ເປັນລົດຈັກ 8.000 ຄັນ, ລົດເມ 160 ຄັນ ແລະໃຫ້ມີບ່ອນສາດສາທາລະນະຢ່າງໜ້ອຍ 50 ຈຸດ ຕາມຍຸດທະສາດການນຳໃຊ້ລົດໄຟຟ້າຮອດປີ 2025.

ທ່ານ ດຣ ດາວວົງ ພອນແກ້ວ ລັດຖະມົນຕີກະຊວງພະລັງງານ ແລະບໍ່ແຮ່ໄດ້ກ່າວຕອບຄຳຊັກຖາມຂອງປະຊາຊົນກໍ່ຄືບັນດາຜູ້ແທນປະຊາຊົນໃນວັນທີ 16 ມິຖຸນານີ້ວ່າ ສຳລັບລົດໄຟຟ້າທີ່ນຳໃຊ້ຢູ່ ສປປ ລາວ ຕາມຕົວເລກທີ່ເກັບກຳໄດ້ແມ່ນມີແລ້ວຈຳນວນ 300 ກວ່າຄັນ ແລະມີທ່າອຽງເພີ່ມຂຶ້ນຢ່າງຕໍ່ເນື່ອງ ອັນເນື່ອງມາຈາກມີຄ້າຍລົດຫຼາຍຄ້າຍໄດ້ນຳເຂົ້າລົດຈຳນວນຫຼາຍມີລາຄາແຕກຕ່າງກັນ ແລະສາມາດປະຢັດເງິນໃນກະເປົາໄດ້ຫຼາຍຂຶ້ນ ຖ້າທຽບໃສ່ລົດທີ່ແລ່ນດ້ວຍນ້ຳມັນ.

ຕາມຂ່າວທີ່ລາຍງານກ່ອນໜ້ານີ້ ໃຫ້ຮູ້ວ່າ,ມາຮອດປັດຈຸບັນ ລົດໄຟຟ້າສະເພາະຂອງຈີນທີ່ມີຂາຍຢູ່ລາວມີຫລາຍກວ່າ 150 ຄັນ ແລະມີຈຸດບໍລິການສາກແລ້ວຫລາຍກວ່າ 50 ຈຸດໃນຂອບເຂດທົ່ວປະເທດລາວ ແລະໃນສະພາບລາຄານໍ້າມັນສູງຂຶ້ນ ຄາດວ່າຄວາມຕ້ອງການຊົມໃຊ້ລົດໄຟຟ້າຢູ່ ສປປ ລາວ ຈະເພີ່ມຂຶ້ນໃນຕໍ່ໜ້າ.