ຣັດເຊຍ ຫຼຸດປະລິມານສົ່ງແກັສໃຫ້ຢູໂຣບ ອ້າງຂັດຂ້ອງທາງເຕັກນິກ ດຶງລາຄາແກັສໃນຢູໂຣບພຸ່ງທະຍານຂຶ້ນອີກ

ຣັດເຊຍ ຫຼຸດປະລິມານສົ່ງແກັສໃຫ້ຢູໂຣບ ອ້າງຂັດຂ້ອງທາງເຕັກນິກ ດຶງລາຄາແກັສໃນຢູໂຣບພຸ່ງທະຍານຂຶ້ນອີກ

21st June 2022 0 By Admin

ສຳນັກຂ່າວເອເອຟພີລາຍງານວ່າ ບໍລິສັດແກັສປຣອມ (Gazprom) ຂອງຣັດເຊຍໄດ້ປະກາດ ຈະຫຼຸດການສົ່ງອອກປະລິມານແກັສທີ່ສົ່ງໄປຍັງເຢຍລະມັນລົງເຖິງ 60% ຈາກລະດັບລະດັບປັດຈຸບັນ, ໂດຍໃຫ້ເຫດຜົນວ່າ ເນື່ອງຈາກເງື່ອນໄຂທາງເຕັກນິກຂອງທໍ່ລຳລຽງແກັສ Nord Stream 1.

ໂດຍໃນວັນທີ 14 ມິຖຸນາຜ່ານມາ ບໍລິສັດແກັສປຣອມແຈ້ງວ່າ ຈະປັບຫຼຸດການສົ່ງແກັສຈາກລະດັບ 167 ລ້າແມັດກ້ອນຕໍ່ວັນ ລົງມາເຫຼືອ 100 ລ້ານແມັດກ້ອນຕໍ່ວັນ ແຕ່ວັນຕໍ່ມາຄືວັນທີ 15 ມິຖຸນາຜ່ານມາ ບໍລິສັດແກັສປຣອມຂອງຣັດເຊຍປະກາດວ່າ ຈະປັບຫຼຸດປະລິມານການສົ່ງແກັສໄປຍັງເຢຍລະມັນລົງ ເຫຼືອພຽງລະດັບ 67 ລ້ານແມັດກ້ອນຕໍ່ວັນ, ນອກຈາກນີ້ ຍັງຈະປັບຫຼຸດປະລິມານການສົ່ງອອກໄປຍັງອິຕາລີລົງ 15%.


ທັງນີ້ ເຢຍລະມັນ ແລະ ອິຕາລີຕ່າງກໍເພິ່ງພາແກັສທຳມະຊາດຈາກຣັດເຊຍເປັນຫຼັກໂດຍຄິດເປັນ 40% ຂອງການນຳເຂົ້າທັງໝົດ.


ລັດຖະມົນຕີກະຊວງເສດຖະກິດຂອງເຢຍລະມັນກ່າວວ່າ: ການຕັດສິນໃຈຂອງຣັດເຊຍ ບໍ່ແມ່ນເງື່ອນໄຂທາງເຕັກນິກ ແຕ່ຕ້ອງການປັ່ນປ່ວນລາຄາແກັສຫຼາຍກວ່າ. ແນວໃດກໍຕາມ ສະຫະພາບເອີຣົບໄດ້ເດີນໜ້າຊອກຫາແຫຼ່ງພະລັງງານແຫ່ງໃໝ່ ໂດຍໄດ້ເຊັນສັນຍາກັບອິດສະຣາແອນ ແລະ ເອຢິບ ເພື່ອສະໜອງແກັສໃຫ້ແກ່ສະຫະພຢູໂຣບ ແຕ່ກໍຍັງມີປະລິມານທີ່ໜ້ອຍ ແລະ ລາຄາແພງກວ່າ ເມື່ອທຽບຈາກການນຳເຂົ້າຈາກຣັດເຊຍ.


ທັງນີ້ ສຳນັກຂ່າວສະປຸດນິກຂອງຣັດເຊຍລາຍງານວ່າ ການທີ່ບໍລິສັດແກັສປຣອມຫຼຸດປະລິມານການສົ່ງອອກແກັສໄປຍັງເຢຍລະມັນ ແລະ ອິຕາລີ ມີສາເຫດມາຈາກ ບໍລິສັດໄດ້ສົ່ງອຸປະກອນການສົ່ງແກັສໄປສ້ອມແປງທີ່ເຢຍລະມັນ ແຕ່ຈົນເຖິງຂະນະນີ້ ຍັງບໍ່ທັນສ້ອມແປງສຳເລັດເທື່ອ ເຮັດໃຫ້ເຄື່ອງຈັກຈ່າຍແກັສຢູ່ສະຖານີໂປຣໂຕມາຢາ ສາມາດຈ່າຍແກັສໄດ້ພຽງ 100 ລ້ານແມັດກ້ອນຕໍ່ວັນ ເມື່ອທຽບກັບ 167 ລ້ານແມັດກ້ອນຕໍ່ວັນ.


ຫຼັງຈາກຄຳປະກາດດັ່ງກ່າວອອກມາ ເຮັດໃຫ້ລາຄາແກັສໃນເອີຣົບປັບຂຶ້ນທັນທີ 11-15% ເປັນ 1.000 ໂດລາຕໍ່ 1.000 ແມັດກ້ອນ. ຂະນະທີ່ຄ່າໄຟຟ້າໃນເອີຣົບກໍປັບຂຶ້ນເປັນ 99 ເອີໂຣຕໍ່ເມກາວັດໂມງ.