ຕໍ່ເວລາອີກ ! ດ່ານສາກົນຂົວມິດຕະພາບ 2 ເປີດໂອກາດໃຫ້ແຮງງານລາວກັບຄືນປະເທດ

ຕໍ່ເວລາອີກ ! ດ່ານສາກົນຂົວມິດຕະພາບ 2 ເປີດໂອກາດໃຫ້ແຮງງານລາວກັບຄືນປະເທດ

1st April 2020 0 By Education

ກ່ອນໜ້ານີ້ ໃນຊ່ວງທີ່ເລີ່ມມີການລະບາດຂອງພະຍາດໂຄວິດ-19 ເຂົ້າມາປະເທດໄທ ແລະ ຖືກກັບຊ້ວງທີ່ໃກ້ກັບບຸນສົງການປີໃໝ່ ເຮັດໃຫ້ມີແຮງງານລາວທີ່ຢູ່ຕ່າງປະເທດ ລ້ວນແຕ່ຢາກເດີນທາງກັບເຂົ້າປະເທດ ແຕ່ດ້ວຍວິກິດການລະບາດຂອງພະຍາດດັ່ງກ່າວເຮັດໃຫ້ການເດີນທາງເຂົ້າ-ອອກປະເທດຫຍຸ້ງຍາກ ແຕ່ເພື່ອເປັນການໃຫ້ເຂົາເຈົ້າເຫຼົ່ານັ້ນ ໄດ້ກັບເຂົ້າມາລັດຖະບານກໍ່ໄດ້ມີມາດຕະການໂຍະຍານລົງ, ເຊິ່ງຫຼ້າສຸດ ດ່ານສາກົນຂົວມິດຕະພາບ 2 ສະຫວັນນະເຂດ – ມຸກດາຫານ ຍັງເປີດໂອກາດໃຫ້ແຮງງານລາວກັບຄືນປະເທດ ໂດຍອະນຸຍາດໃຫ້ຂ້າມເປັນ 2 ຊ້ວງຄື: ຊ້ວງເຊົ້າເລີ່ມແຕ່ເວລາ 9 ໂມງ ຫາ 12 ໂມງ ແລະ ຊ້ວງບ່າຍ ແມ່ນເລີ່ມແຕ່ເວລາ 17 ໂມງ ຫາ 18 ໂມງເທົ່ານັ້ນ.

ຕາມການລາຍງານຂອງ ທ່ານ ພັຕ ບຸນເຫຼື່ອມ ໄຊຍະວົງສອນ ຮອງຫົວໜ້າດ່ານຕຳຫຼວດກວດຄົນເຂົ້າເມືອງ ຂົວມິດຕະພາບ 2 ສະຫວັນນະເຂດ-ມຸກດາຫານ ໄດ້ໃຫ້ສຳພາດຕໍ່ຜູ້ສື່ຂ່າວວິທະຍຸກະຈາຍສຽງແຂວງສະຫວັນນະເຂດ ໃນຄັ້ງວັນທີ 31 ມີນາ 2020 ນີ້ວ່າ: ປັດຈຸບັນເຖິງແມ່ນວ່າທາງປະເທດເພື່ອນບ້ານ (ປະເທດໄທ) ຈະປິດການສັນຈອນທາງລົດໂດຍສານລະຫວ່າງປະເທດ ແລະ ອອກແຈ້ງການປິດດ່ານສາກົນຂົວມິດຕະພາບ 2 ຢ່າງເປັນທາງການແລ້ວກໍ່ຕາມ ແຕ່ກໍ່ຍັງມີແຮງງານລາວເປັນຈໍານວນຫຼວງຫຼາຍ ທີ່ຍັງທະຍອຍກັບຄືນປະເທດຢ່າງບໍ່ຂາດສາຍ ໂດຍການເໝົາລົດຕູ້ບຸກຄົນຈາກບາງກອກ ມາຫາດ່ານສາກົນຂົວມິດຕະພາບ 2 ເພື່ອກັບຄືນ ສປປ ລາວ.

ຕໍ່ກັບເຫດການດັ່ງກ່າວທາງເຈົ້າໜ້າທີ່ ທີ່ກ່ຽວຂ້ອງທັງສອງປະເທດຈຶ່ງໄດ້ມີການປະສານສົມທົບ ປຶກສາຫາລືຮ່ວມກັນໃນການເປີດໂອກາດໃຫ້ແຮງງານລາວກັບຄືນປະເທດໃນຊ່ວງໄລຍະທີ່ເກີດມີການລະບາດຂອງເຊື້ອພະຍາດໂຄວິ-19 ເຊິ່ງໄດ້ຕົກລົງອະນຸຍາດໃຫ້ສະເພາະແຮງງານເທົ່ານັ້ນທີ່ສາມາດຂ້າມມາໄດ້ ສ່ວນວ່າບຸກຄົນທົ່ວໄປທີ່ມີເປົ້າໝາຍໄປທ່ຽວ, ໄປຢາມພີ່ນ້ອງ, ໄປຊື້ຂາຍທຳມະແບບປົກກະຕິທົ່ວໄປແມ່ນທາງດ່ານຈະບໍ່ອະນຸຍາດ.

ສໍາລັບໂຕເລກແຮງງານລາວທີ່ຂ້າມເຂົ້າມານັບແຕ່ວັນທີ 20 ຫາ ວັນທີ 31 ມີນາ 2020 ມີທັງໝົດ 22.919 ຄົນ ຕ່າງແຂວງ 1.214 ຄົນ ສະເພາະທີ 31 ມີນາ ມີ 925 ຄົນ,ຍິງ 462 ຄົນ ໃນນັ້ນແມ່ນຍັງບໍ່ພົບກໍລະນີສົງໃສຜູ້ຕິດເຊື້ອໂຄວິດ-19 ຈັກຄົນພົບພຽງແຕ່ຜູ້ເປັນໄຂ້ທໍາມະດາເທົ່ານັ້ນ.

ສຳລັບແຮງງານລາວທີ່ຂ້າມເຂົ້າມາໃນໄລຍະນີ້ທາງດ່ານຈະອະນຸຍາດໃຫ້ຂ້າມເປັນ 2 ຊ້ວງຄື: ຊ້ວງເຊົ້າແມ່ນເລີ່ມແຕ່ເວລາ 9 ໂມງ ຫາ 12 ໂມງ ແລະ ຊ້ວງບ່າຍ ແມ່ນເລີ່ມແຕ່ເວລາ 17 ໂມງ ຫາ 18 ໂມງເທົ່ານັ້ນ.