ຕົວເລກທີ່ຮູ້ແລ້ວຫົດຫູ່ຫົວໃຈ! ຍອດຜູ້ຕິດເຊື້ອໂຄວິດ-19ທົ່ວໂລກ ບັນລຸ 1ລ້ານຄົນແລ້ວ

ຕົວເລກທີ່ຮູ້ແລ້ວຫົດຫູ່ຫົວໃຈ! ຍອດຜູ້ຕິດເຊື້ອໂຄວິດ-19ທົ່ວໂລກ ບັນລຸ 1ລ້ານຄົນແລ້ວ

3rd April 2020 0 By Education

ນັບວ່າເປັນຕົວເລກທີ່ບໍ່ມີໃຜພຶງປະສົງໃຫ້ມັນອອກມາຫຼາຍຂະໜາດນີ້ ແຕ່ກໍ່ບໍ່ສາມາດເຮັດຫຍັງມັນໄດ້ ເນື່ອງຈາກປັດຈຸບັນຕົວເລກຜູ້ຕິດເຊື້ອໂຄວິດ-19 ໃນທົ່ວໂລກບັນລຸ 1ລ້ານຄົນແລ້ວ. ດັ່ງນັ້ນ, ມັນບໍ່ແມ່ນເລື່ອງທີ່ຈະຖືເບົາອີກຕໍ່ໄປ ທຸກຄົນຕ້ອງເປັນເຈົ້າການນໍາກັນເພື່ອປ້ອງກັນການຕິດເຊື້ອ ຫຼື ແຜ່ເຊື້ອອັນຈະເຮັດໃຫ້ຍອດຜູ້ຕິດເຊື້ອແຜ່ຂະຫຍາຍເປັນວົງກ້ວາງອອກອີກ.

ສຳນັກຂ່າວຕ່າງປະເທດລາຍງານ ເມື່ອວັນທີ່ 2 ເມສາ 2020 ວ່າສູນຂໍ້ມູນກ່ຽວກັບເຊື້ອໄວຣັດໂຄໂຣນາ ຫລືໂຄວິດ-19 ຂອງມະຫາວິທະຍາໄລຈອນ ຮ໊ອບກິນສລາຍງານສະຖິຕິກ່ຽວກັບການແຜ່ລະບາດຂອງ ໂຄວິດ-19 ນັບຕັ້ງແຕ່ພົບຜູ້ຕິດເຊື້ອຄົນທຳອິດໃນຈີນເມື່ອເດືອນທັນວາປີຜ່ານມາຈົນເຖິງຊ່ວງແລງຂອງວັນພະຫັດ (2 ເມສາ) ຕາມເວລາທ້ອງຖິ່ນຂອງອາເມຣິກາ ຈຳນວນຜູ້ຕິດເຊື້ອສະສົມທົ່ວໂລກເພີ່ມເປັນຫລາຍກວ່າ 1 ລ້ານຄົນ ໄດ້ຮັບການປິ່ນປົວດີແລ້ວ 210.000 ຄົນ ແຕ່ເສຍຊີວິດລວມກັນຫລາຍກວ່າ 52.000 ຄົນ.

ທັງນີ້ ອາເມຣິກາເປັນປະເທດຊື່ງມີຜູ້ຕິດເຊື້ອສະສົມຫລາຍທີ່ສຸດຄືຢ່າງນ້ອຍ 242.182 ຄົນ ປິ່ນປົວດີແລ້ວ 8.991 ຄົນ ເສຍຊີວິດແລ້ວຢ່າງຫນ້ອຍ 5.850 ຄົນ ຮອງລົງມາຄືອິຕາລີມີຜູ້ຕິດເຊື້ອສະສົມຢ່າງຫນ້ອຍ 115.242 ຄົນ ປິ່ນປົວດີແລ້ວ 18.278 ຄົນ ເສຍຊີວິດຢ່າງຫນ້ອຍ 13.915 ຄົນ ຕາມດ້ວຍສະເປນຊື່ງມີຜູ້ຕິດເຊື້ອສະສົມຢ່າງນ້ອຍ 112.065 ຄົນ ປິ່ນປົວດີແລ້ວ 26.743 ຄົນ ແລະເສຍຊີວິດແລ້ວຢ່າງຫນ້ອຍ 10.348 ຄົນ ເຢຍລະມັນມີຜູ້ຕິດເຊື້ອສະສົມຢ່າງນ້ອຍ 84.788 ຄົນ ປິ່ນປົວແລ້ວ 22.440 ຄົນ ແລະເສຍຊີວິດແລ້ວຢ່າງຫນ້ອຍ 1.107 ຄົນ ແລະຈີນມີຜູ້ຕິດເຊື້ອສະສົມຢ່າງຫນ້ອຍ 82.432 ຄົນ ປົວດີແລ້ວ 76.565 ຄົນ ແລະເສຍຊີວິດຢ່າງຫນ້ອຍ 3.322 ຄົນ

ດ້ານປະເທດໃນອາຊີຕາເວັນອອກສ່ຽງໃຕ້ (ອາຊຽນ) ຊື່ງພົບຜູ້ຕິດເຊື້ອສະສົມຫລາຍທີ່ສຸດຄືມາເລເຊຍ ຢ່າງຫນ້ອຍ 3.116 ຄົນ ປົວດີແລ້ວ 767 ຄົນ ເສຍຊີວິດຢ່າງນ້ອຍ 50 ຄົນ ຮອງລົງມາຄືຟີລິບປິນ ມີຜູ້ຕິດເຊື້ອສະສົມຢ່າງຫນ້ອຍ 2.633 ຄົນ ປົວດີແລ້ວ 51 ຄົນ ແລະເສຍຊີວິດຢ່າງຫນ້ອຍ 107 ຄົນ ຕາມດ້ວຍໄທມີຜູ້ຕິດເຊື້ອສະສົມຢ່າງນ້ອຍ 1.875 ຄົນ ປົວດີແລ້ວ 505 ຄົນ ເສຍຊີວິດຢ່າງນ້ອຍ 15 ຄົນ ແລະອິນໂດເນເຊຍມີຜູ້ຕິດເຊື້ອສະສົມຢ່າງນ້ອຍ 1.790 ຄົນ ປົວດີແລ້ວ 112 ຄົນ ແລະເສຍຊີວິດຢ່າງນ້ອຍ 170 ຄົນ