ທີມແພດຈາກຈີນເຕືອນ ໂຄວິດ19 ທຸກຄົນກໍບໍ່ຄວນຖືເບົາບໍ່ດັ່ງນັ້ນອາດຍາກທີ່ຈະຄວບຄຸມ

ທີມແພດຈາກຈີນເຕືອນ ໂຄວິດ19 ທຸກຄົນກໍບໍ່ຄວນຖືເບົາບໍ່ດັ່ງນັ້ນອາດຍາກທີ່ຈະຄວບຄຸມ

3rd April 2020 0 By Education

ບັນດາຊ່ຽວຊານ, ແພດໝໍຈາກ ສປ ຈີນ ຈຳນວນ 12 ທ່ານທີ່ເດີນທາງມາຮອດ ສປປ ລາວໃນວັນທີ 29 ມີນາທີ່ຜ່ານມາ ເພື່ອຊ່ວຍເຫຼືອວຽກງານປ້ອງກັນ ແລະຄວບຄຸມການແຜ່ລະບາດຂອງພະຍາດໂຄວິດ 19 ເຊິ່ງທີມງານດັ່ງກ່າວລ້ວນແຕ່ເປັນຜູ້ທີ່ມີປະສົບການສູງໃນວຽກງານການຕ້ານ ແລະສະກັດກັ້ນພະຍາດໂຄວິດ 19 ຢູ່ທີ່ ສປ ຈີນ ລວມມີ: ການນໍາ, ແພດຜູ້ຊ່ຽວຊານ, ນັກລະບາດວິທະຍາ ແລະພະຍາບານ. ໃນນັ້ນ, ມີຫຼາຍທ່ານເຄີຍປິ່ນປົວຜູ້ທີ່ຕິດເຊື້ອຂັ້ນຮຸນແຮງໃຫ້ຫາຍດີ ຈຶ່ງເປັນໂອກາດສຳຄັນທີ່ຈະນຳໄດ້ເອົາຄວາມຮູ້ ແລະປະສົບການໃນບັ້ນຮົບຕໍ່ສູ້ກັບພະຍາດຮ້າຍມາແບ່ງປັນຢູ່ ສປປ ລາວ.


ໜ້າວຽກຫຼັກຂອງທີມແພດ ແລະຜູ້ຊ່ຽວຊານ ພາຍຫຼັງມາຮອດ ສປປ ລາວ ເຮົາແມ່ນລົງພື້ນທີ່ເພື່ອຕິດຕາມ, ເກັບກຳຂໍ້ມູນ ແລະສຳຫຼວດຕາມຈຸດທີ່ມີຄວາມສ່ຽງຕໍ່ການແຜ່ລະບາດຂອງພະຍາດ ໂດຍສະເພາະກໍແມ່ນບັນດາໂຮງໝໍສູນກາງທີ່ຮັບຮອງຄົນເຈັບຜູ້ຕິດເຊື້ອພະຍາດ ແລະກໍລະນີສົງໄສ ເຊັ່ນ: ໂຮງໝໍ ມິດຕະພາບ, ໂຮງໝໍ 103, ໂຮງໝໍເສດຖາທີຣາດ. ນອກຈາກນັ້ນ, ກໍໄດ້ມີການປະຊຸມປຶກສາຫາລືກັບບັນດາເຈົ້າໜ້າທີ່ທີ່ກ່ຽວຂ້ອງ ເປັນຕົ້ນກໍແມ່ນ ກົມຄວບຄຸມພະຍາດຕິດຕໍ່, ສູນວິເຄາະ ແລະລະບາດວິທະຍາ, ກະຊວງສາທາລະນະສຸກ ພ້ອມທັງຊ່ວຍຈັດລະບົບຂອງໂຮງໝໍບ່ອນຮອງຮັບຄົນເຈັບອີກດ້ວຍ.


ຄະນະແພດດັ່ງກ່າວ ມາເຄື່ອນໄຫວໃຫ້ການຊ່ວຍເຫຼືອ ສປປ ລາວ ເຮົາພາຍໃຕ້ຄຳຂວັນ “ຮ່ວມມືກັນຕ້ານພະຍາດໂຄວິດ19 ຮ່ວມທຸກຮ່ວມຍາກ” ທີມແພດ ແລະຜູ້ຊ່ຽວຊານຈະເຄື່ອນໄຫວວຽກງານຢູ່ ສປປ ລາວ ເປັນເວລາ 14 ວັນ ໃນແຕ່ລະວັນພວກເຂົາໄດ້ປະຕິບັດໜ້າທີ່ຢ່າງຂະຫຍັນຂັນແຂງບໍ່ຕ່ຳກວ່າ 12 ຊົ່ວໂມງ. ໃນນັ້ນ, ລວມມີການລົງພື້ນທີ່ຮ່ວມກັບທີມແພດຝ່າຍລາວ ແລະປະຊຸມປຶກສາຫາລືພາຍໃນທີມເພື່ອແກ້ໄຂບັນຫາທີ່ເກີດຂຶ້ນ.

ທັງໝົດທັງມວນກໍແມ່ນເພື່ອແບ່ງປັນວິຊາສະເພາະໃຫ້ແກ່ທີມແພດຝ່າຍລາວໃຫ້ຫຼາຍທີ່ສຸດເທົ່າທີ່ຈະເຮັດໄດ້ ເຊັ່ນ ການຄັດຕອງຫາຜູ້ຕິດເຊື່ອ, ກວດວິເຄາະເຊື້ອພະຍາດຢູ່ຫ້ອງທົດລອງ, ປິ່ນປົວຄົນເຈັບ, ແນະນຳວິທີປ້ອງກັນຕົນເອງຂອງແພດໝໍຢ່າງລະອຽດ ເຊັ່ນ: ການນຳໃຊ້ເຄື່ອງມື ແລະຊຸດປ້ອງກັນ; ການຈັດການພື້ນທີ່ຕ້ານ ແລະສະກັດກັ້ນການແຜ່ເຊື້ອໃນບໍລິເວນໂຮງໝໍ ແລະອື່ນໆ ທີ່ສຳຄັນກໍແມ່ນຈະຕ້ອງຮີບຮ້ອນສ້າງຄູ່ມືໃນການປ້ອງການກັນ ແລະສະກັດກັ້ນພະຍາດ Covid 19 ທີ່ສາມາດນໍາໃຊ້ຢ່າງແທດເໝາະກັບສະພາບຕົວຈິງ ແລະມີປະສິດທິພາບ.

ດ້ວຍໄລຍະເວລາອັນສັ້ນ. ສະນັ້ນ, ຈຸດປະສົງຂອງການມາປະຕິບັດພາລະກິດໃນຄັ້ງນີ້ບໍ່ແມ່ນການປິ່ນປົວຄົນເຈັບໂດຍກົງ ແຕ່ຄືການຖ່າຍທອດວິຊາການ ແລະປະສົບການແກ່ທີມແພດຝ່າຍລາວເພື່ອນຳໄປໝູນໃຊ້ໃນການປິ່ນປົວຄົນເຈັບ ເຊິ່ງຖືເປັນສິ່ງທີ່ມີຄວາມໝາຍຄວາມສຳຄັນ ແລະເປັນການຍົກລະດັບຄວາມຮູ້ຄວາມສາມາດໃຫ້ແກ່ບຸກຄະລາກອນທາງການແພດຂອງລາວ.

ທ່າມກາງການປະຕິບັດພາລະກິດອັນເລັ່ງດ່ວນ ກໍຍັງມີຫຼາຍຂໍ້ທ້າທາຍທີ່ທີມແພດ ແລະຜູ້ຊ່ຽວຊານທັງ 12 ທ່ານຕ້ອງຮັບມື ເນື່ອງຈາກສະພາບການການແຜ່ລະບາດຂອງພະຍາດຢູ່ທີ່ປະເທດຈີນ ແລະປະເທດລາວມີຄວາມແຕກຕ່າງກັນ. ສະນັ້ນ, ບັນດາມາດຕະການຕ່າງໆຈຳເປັນຕ້ອງມີການດັດປັບໃຫ້ເໝາະສົມ ເຊິ່ງພວກເຂົາຕ້ອງໄດ້ວິເຄາະ ແລະປະເມີນສະຖານະການໃຫ້ຖ່ວງທັນ.

ບັນດາທີມແພດໄດ້ໃຫ້ຄໍາເຫັນວ່າ: ສປປ ລາວຖືເປັນປະເທດທີ່ຄວບຄຸມການແຜ່ລະບາດໄດ້ດີຫາກທຽບໃສ່ກັບຫຼາຍປະເທດໃນພາກພື້ນ ແຕ່ອີງຕາມສະພາບການໃນປັດຈຸບັນນີ້ແມ່ນຢູ່ໃນໄລຍະຫົວລ້ຽວຫົວຕໍ່, ທຸກຄົນກໍບໍ່ຄວນຖືເບົາ ຫຼຶນິ້ງນອນໃຈ, ຕ້ອງໄດ້ເອົາໃຈໃສ່ຕໍ່ຕ້ານ ແລະສະກັດກັ້ນການແຜ່ລະບາດຂອງພະຍາດຢ່າງເຂັ້ມງວດທີ່ສຸດ. ບໍ່ດັ່ງນັ້ນ, ການແຜ່ລະບາດຂອງເຊື້ອອາດຈະລຸກລາມຈົນຍາກທີ່ຈະຄວບຄຸມ.

ຂອບໃຈຂ່າວຈາກ CRI-FM93