ຄວາມ​ຈິງ​ຈາກ​ຜູ້​ຕິດ​ເຊື້ອ​ໂຄວິດ​ລາຍ​ທີ 2 “ຂ້ອຍບໍ່ໄດ້ມີເຈດຕະນາ ຫລື ຢາກເປັນຜູ້ຕິດເຊື້ອໂຄວິດເລີຍ ຂ້ອຍໄດ້ລະວັງໂຕເອງຫລາຍທີ່ສຸດ”

ຄວາມ​ຈິງ​ຈາກ​ຜູ້​ຕິດ​ເຊື້ອ​ໂຄວິດ​ລາຍ​ທີ 2 “ຂ້ອຍບໍ່ໄດ້ມີເຈດຕະນາ ຫລື ຢາກເປັນຜູ້ຕິດເຊື້ອໂຄວິດເລີຍ ຂ້ອຍໄດ້ລະວັງໂຕເອງຫລາຍທີ່ສຸດ”

4th April 2020 0 By Entertain

ຜູ່ຕິດເຊື້ອ ກໍລະນີ ທີ່ 2 ພະນັກງານ ໂຮງແຮມ ແຫ່ງ​ໜຶ່ງ ຊີ້ແຈ້ງເລື່ອງລາວ ! ຂໍໃຫ້ຫາຍດີໄວໆ

.

ສະບາຍດີ, ກ່ອນອື່ນຫມົດຂ້າພະເຈົ້າຢາກອອກມາຂໍໂທດຈາກໃຈຂອງຂ້ອຍເອງ, ຂ້ອຍເອງຮູ້ສຶກເສຍໃຈຫລາຍຫລັງຈາກທີ່ໄດ້ຮັບຮູ້ວ່າຕົວເອງໄດ້ຕິດເຊື້ອ, ຄວາມຮູ້ສຶກ ແລະ ຈິດໃຈໃນມື້ນັ້ນ ມັນທໍລະມານ, ສະຕິບໍ່ຢູ່ກັບເນື້ອກັບໂຕ ຢູ່ດີໆນ້ຳກະໄຫລບໍ່ຍຸດ ຈົນເມື່ອຍໄຫ້ ແລະ ຕັ້ງສະຕິ ຢຸດຖາມໂຕເອງບໍ່ໄດ້ເລີຍວ່າເປັນຫຍັງຕ້ອງແມ່ນຂ້ອຍ. ຂ້ອຍຢາກບອກວ່າຂ້ອຍບໍ່ໄດ້ມີເຈດຕະນາ ຫລື ຢາກເປັນຜູ້ຕິດເຊື້ອໂຄວິດເລີຍ, ຂ້ອຍໄດ້ລະວັງໂຕເອງຫລາຍທີ່ສຸດ ແຕ່ສຸດທ້າຍຂ້ອຍກໍບໍ່ລອດຈາກການຕິດເຊື້ອໄວຣັສຕົວນີ້,

ແລະຄືທີ່ຫລາຍຄົນສົງໄສເຫດຜົນທີ່ປິດເຟດບຸກໄປຊ່ວງຫນຶ່ງ, ບໍ່ແມ່ນຂ້ອຍປິດຫນີຍ້ອນຢ້ານຫຍັງ ແຕ່ການທີ່ຂ້ອຍປິດເຟດບຸກ ຍ້ອນຖືກຄົນກຸ່ມຫນຶ່ງມາກັອບຮູບຂອງຂ້ອຍ ລະໄປໂພດໃນທາງບໍ່ດີ, ຮູບສ່ວນໃຫຍ່ແມ່ນຮູບເກົ່າແລ້ວໄດ້ນຳໄປເວົ້າໄປຂຽນໃນທາງທີ່ບໍ່ດີ ແລະ ພາດພິງຄົນອື່ນ ຄົນທີ່ຂ້ອຍຮັກ ແລະ ຮັກຂ້ອຍ ໄປໃນທາງເສຍຫາຍ ແລະ ບໍ່ມີມູນຄວາມຈິງ.

.

ດັ່ງນັ້ນ, ຂ້ອຍຂໍໂອກາດ ແລະ ໃຊ້ພື້ນທີ່ນ້ອຍໆໃນເຟດບຸກຂອງຂ້ອຍຊີ້ແຈງ ແລະ ອະທິບາຍ ເພື່ອຈະເປັນປະໂຫຍດໃຫ້ແກ່ຫລາຍໆຄົນດັ່ງນີ້:

– ຂ້ອຍໄດ້ເດີນທາງໄປສຳມະນາຢູ່ບາງກອກ ຫລື ກຸງເທບແຕ່ວັນທີ່ 3 ຫາ ວັນທີ 9 ມີນາ (ກ່ອນໄປ, ທາງເຮົາໄດ້ຕິດຕໍ່ສອບຖາມຜູ້ຈັດງານຕະຫລອດວ່າ ຈະມີການຍົກເລີກ ຫລື ມີການເລື່ອນງານອອກໄປບໍ່, ເພາະທຳອິດທາງເຮົາຈະຍົກເລີກການເດີນທາງທັນທີຖ້າງານມີການຍົກເລີກ, ທາງຜູ້ຈັດງານເພິ່ນຢືນຢັນວ່າ ງານຍັງຄົງສືບຕໍ່ຈັດ ແລະ ຕອນນັ້ນທາງໄທເພິ່ນຍັງບໍ່ທັນມີການປະກາດເຂົ້າຂັ້ນວິກິດກ່ຽວກັບໂຄວິດ ແລະ ທາງເຮົາກໍສອບຖາມກ່ຽວກັບການຮັບມື ແລະ ຄວາມປອດໄພຂອງແຂກກ່ອນເຂົ້າງານ, ຜູ້ຈັດງານຢືນຢັນກ່ຽວກັບຂະບວນການດ້ານຄວາມປອດໄພ ແລະ ວິທີຮັບມືກັບຄົນມາງານຕາມມາດຕະຖານສາກົນ – ມີບ່ອນວັດອຸນຫະພູມ, ຈຸດບໍລິການລ້າງມື, ຈຸດກອງຄົນເຂົ້າອອກ) ເພື່ອຢັ້ງຢືນຖຶງຄວາມປອດໄພຂອງທຸກຄົນທີ່ເຂົ້າຮ່ວມງານຢ່າງເຄັ່ງຄັດ.


– ທຸກມື້ທີ່ຂ້ອຍຢູ່ກຸງເທບ, ຂ້ອຍໄດ້ພະຍາຍາມປ້ອງກັນໂຕເອງໃຫ້ດີທີ່ສຸດ, ຂ້ອຍໄດ້ໃສ່ຜ້າປິດປາກ ແລະ ລ້າງມືທຸກໆ 20 ນາທີຈົນມືແຫ້ງ ແລະ ລອກ (ນີ້ບໍ່ແມ່ນປະເດັນ, ແຕ່ຢາກໃຫ້ເຂົ້າໃຈວ່າຂ້ອຍໃສ່ໃຈຫລາຍ ແລະ ບໍ່ໄດ້ປ່ອຍປະລະເລີຍ, ເພາະຂ້ອຍກາຢາກຫລີກຫລ່ຽງຄວາມສ່ຽງທີ່ໃນການຕິດເຊື້ອໃຫ້ຫລາຍທີ່ສຸດ)

.

ວັນທີ່ 10ຫລັງຈາກມາຮອດລາວ, ຕາມກົດລະບຽບຂອງບໍລິສັດ ແລະ ຄວາມສະບາຍໃຈຂອງໂຕເອງນຳ, ທາງຂ້ອຍໄດ້ເດີນທາງໄປກວດສຸຂະພາບຢູ່ໂຮງຫມໍ 150ຕຽງເພື່ອຄອນເຟີມວ່າຂ້ອຍບໍ່ມີເຊື້ອໂຄວິດ, ຂ້ອຍໄດ້ເລົ່າໃຫ້ໝໍຟັງວ່າຂ້ອຍຫາແຕ່ເດີນທາງກັບມາຈາກບາງກອກ ແລະ ຕ້ອງການກວດ ໂຄວິດ ກ່ອນກັບໄປເຮັດວຽກເພື່ອຢັ້ງຢືນວ່າຂ້ອຍບໍ່ມີເຊື້ອກ່ອນ ຈິງຈະກັບໄປເຮັດວຽກຳງໄດ້, ແລະ ທ່ານຫມໍໄດ້ຕອບວ່າ, ເພິ່ນບໍ່ສາມາດກວດໃຫ້ໄດ້, ເຊິ່ງເພິ່ນຈະສາມາດກວດໃຫ້ໄດ້ສະເພາະຄົນທີ່ກັບມາຈາກປະເທດກຸ່ມສ່ຽງເທົ່ານັ້ນ ເຊັ່ນວ່າ: ຈີນ, ຮອງກົງ, ເກົາຫລີ, ອີຕາລີ, ຝຣັ່ງ ແລະ ມື້ນັ້ນ, ທາງໂຮງໝໍພຽງແຕ່ວັດແທກອຸນຫະພູມຂອງຂ້ອຍ ແລະ ເພິ່ນກໍໃຫ້ກັບ ເພາະຈັ່ງໃດເພິ່ນກໍ່ບໍ່ສາມາດກວດໃຫ້ໄດ້ ເພາະເງື່ອນໄຂບໍ່ຄົບ (ຕາມທີ່ເປັນຂ່າວວ່າທາງ ໂຮງໝໍແນະນຳໃຫ້ຂ້ອຍກັກໂຕເອງ14ວັນແມ່ນບໍ່ມີມູນຄວາມຈິງ, ເພາະຕອນນັ້ນຍັງບໍ່ມີຂໍ້ແນະນຳສຳລັບການກັກໂຕເອງສຳລັບການເດີນທາງຈາກຕ່າງປະເທດໄທເທື່ອ ), ແຕ່ນີ້ກໍ່ແມ່ນສິ່ງທີ່ຂ້ອຍປະຕິບັດຫລັງຈາກກັບມາ,

1 Health Declaration – ຂ້ອຍໄດ້ກອກຂໍ້ມູນເພື່ອຢືນຢັນກັບຫ້ອງການໂຕເອງ ວ່າໂຕເອງມີສຸຂະພາບປົກກະຕິ ແລະ ບໍ່ມີອາການທີ່ກ່ຽວກັບການຕິດເຊື້ອ ເຊັ່ນ: (ບໍ່ມີໄອ, ໄຂ້, ເຈັບຫົວ, ຫາຍໃຈຍາກ ຫລືມີນຳມູກ)

.
2 ຕາມທີ່ໄດ້ກ່າວມາທາງເທິງ, ຕອນນັ້ນຍັງບໍ່ມີ ໃບແຈ້ງການກ່ຽວກັບ Quarantine ຈາກທາງລັດຖະບານເຮົາເທື່ອ, ຂ້ອຍກໍ່ໄດ້ເຮັດວຽກຢູ່ບ້ານ ຫລື ເອີ້ນວ່າ work from home ແລະ ເຂົ້າອອບຟິດເປັນຄັ້ງຄາວໃນຍາມຈຳເປັນ (ທຸກຄັ້ງທີ່ເຂົ້າໄປຈະມີຜ້າປິດປາກ ແລະ ເຈວລ້າງມືຕິດໂຕ).

3 ມີການກວດເຊັກອຸນຫະພູມໂຕເອງທຸກມື້ ເພື່ອກວດໂຕເອງວ່າມີໄຂ້ບໍ່


4 ການອອກໄປເຈິຫມູ່ຄູ່ ຫລື ໄປທ່ຽວແມ່ນເກືອບຈະບໍ່ມີ, ສ່ວນໃຫຍ່ແມ່ນເຈິບາງຄົນທີ່ເປັນເພື່ອນຮ່ວມງານຫລັງຈາກເຮັດປະຊຸມ ຜ່ານທາງອອນລາຍແລ້ວ (VDO Call) ແລະ ຫມູ່ຂອງແຟນຂ້ອຍເອງ 1 ຄັ້ງ ແລະ ຂ້ອຍຢາກຂໍໂທດຈາກໃຈຂອງຂ້ອຍອີ່ຫລີ, ເພາະຂ້ອຍບໍ່ຮູ້ ແລະ ເສຍໃຈຫລາຍກັບເຫດການນີ້ ແລະ ຂ້ອຍເອງທໍລະມານຫລາຍ ແລະ ພາວະນາຂໍໃຫ້ມັນຜ່ານໄປໄດ້ດີ.

.

ຄືກັນກັບຫມູ່ຂອງຂ້ອຍເຄສທີ3 ທີ່ຕົວລາວ ຫລັງຈາກກັບຈາກປະເທດສຸ່ມສ່ຽງກໍຄືປະເທດຝຣັ່ງ ແລະດ້ວຍຄວາມທີ່ລາວກໍ່ມິອາການໄອຈິ່ງໄປກວດຫາເຊື້ອພະຍາດໃນວັນທີ 17 ມີນາ 2020 ແຕ່ຜົນກວດພ້ອມທັງມີໃບຢັ້ງຢືນຈາກແພດໃນວັນທີ18 ມີນາ 2020 ອອກມາແລ້ວວ່າບໍ່ພົບເຊື້ອ.

ໃນວັນທີ 19 ມີນາ 2020, ຕອນເວລາປະມານ 5 ໂມງແລງ, ຂ້ອຍໄດ້ໄປເຈິຫມູ່ຜູ້ກໍລະນີທີ 3 ຕາມຄຳຊວນຂອງໝູ່ທີ່ຊວນກິນເຂົ້າ,

.

ກ່ອນລາວຈະເຈິກັບຂ້ອຍ, ລາວໄດ້ເຈິກັບພະນັກງານ DHL (ຜູ້ຕິດເຊື້ອ ກໍລະນີທີ8) ເພື່ອສົ່ງພັດສະດຸບາງຢ່າງ ໃນຕອນເຊົ້າ ແລະ ພະນັກງານຄົນນີ້ເອງ ກໍ່ແມ່ນຜູ້ຕິດເຊື້ອເຊັ່ນດຽວກັນ, ເຊິ່ງຖ້າເບິ່ງຕາມທາມລາຍແລ້ວ, ເປັນໄປໄດ້ຫວາ ວ່າຫມູ່ຂອງຂ້ອຍ ຈະຕິດເຊື້ອຈາກຂ້ອຍ? (ເພາະຂ້ອຍກັບລາວບໍ່ໄດ້ເຈິກັນເທື່ອ, ນີ້ກໍຫມາຍຄວາມວ່າ ລາວອາດຈະມີເຊື້ອມາກ່ອນ ແຕ່ກວດບໍ່ເຈິໃນຄັ້ງທຳອິດ) ແລະ ເປັນໄປບໍ່ໄດ້ຢ່າງຍິ່ງທີ່ລາວຈະຕິດເຊື້ອຈາກຂ້ອຍ ແລະ ໄປແພ່ເຊື້ອໃຫ້ ພະນັກງານDHL (ຢ້ຳອີກບາດ1, ຫມູ່ຂ້ອຍກໍລະນີທີ 3 ເຈິນຳ ພະນັກງານ DHL ຕອນເຊົ້າ ແລະ ລາວເຈິນຳຂ້ອຍຕອນແລງ, ເຊິ່ງເປັນໄປບໍ່ໄດ້ທີ່ລາວຈະຕິດຈາກຂ້ອຍກ່ອນ, ເພາະວ່າພະນັກງານDHLເຈິນຳລາວຕອນເຊົ້າກໍຕິດເຊື້ອເຊັ່ນດຽວກັນ)

ແຕ່ໃນຂະນະດຽວກັນທາງຄອບຄົວຄົນທີ່ໃກ້ຊິດຂ້ອຍທີ່ສຸດກໍ່ຄືພໍ່ຂອງຂ້ອຍ ແລະ ແຟນຂ້ອຍ ເຊິ່ງພວກເຮົາໃຊ້ຊີວິດຮ່ວມກັນທຸກມື້ຈົນຮອດວັນທີ່ 23 ລາວກໍ່ໄດ້ເຂົ້າກວດເຊັ່ນກັນ ແລະ ຜົນອອກມາເປັນລົບ ແລະ ໃນເວລາດຽວກັນ ເພື່ອນຮ່ວມງານຂອງຂ້ອຍທີ່ເປັນຄົນໄທທີ່ໄປຮ່ວມງານນຳກັນ ໄດ້ເດີນທາງໄປກວດ ເຊັ່ນກັນ ແລະ ຜົນກວດຂອງພວກເຂົາ ແມ່ນລົບທັງຫມົດ ແລະ ປະຈຸບັນທຸກຄົນກໍຍັງສືບຕໍ່ກັກໂຕອີກ14ມື້

ທີ່ຂຽນຖິງກໍລະນີທີ3ນີ້, ຂ້ອຍຮູ້ສຶກບໍ່ສະບາຍໃຈທີ່ຖືກກ່າວຫາວ່າຍ້ອນພົວພັນນຳຂ້ອຍ, ລາວອາດຈະຕິດເຊື້ອມາແຕ່ຝຣັ່ງ, ພຽງແຕ່ຫາເຊື້ອຄັ້ງທຳອິດບໍ່ເຈິ ແລະ ຂ້ອຍອາດຈະໂຊກຮ້າຍທີ່ໄດ້ຮັບເຊື້ອມາຕໍ່ ແລະ ຂ້ອຍບໍ່ໂທດໃຜຫມົດ ເພາະຂ້ອຍກາເປັນຄົນຮັບເຊື້ອ ແລະ ຮູ້ວ່າມັນທໍລະມານຊ່ຳໃດທີ່ເປັນຄົນຖືເຊື້ອນີ້ ແລະ ຂ້ອຍເຊື່ອວ່າບໍ່ໃຜຢາກນຳເຊື້ອມາແຜ່ໃຫ້ຄົນໄກ້ໂຕ ຫລື ຄົນທີ່ຮັກດອກ.

ສຸດທ້າຍນີ້, ຂ້າພະເຈົ້າຢາກໃຫ້ທຸກຄົນ ມີສະຕິ ແລະ ບໍປະຫມາດ ເລື່ອງກ່ຽວກັບ ໂລກໂຄວິດ 19, ຢາກໃຫ້ທຸກຄົນປະຕິບັດຕາມຄຳແນະນຳຂອງພັກລັດ ຢ່າງເຄັ່ງຄັດ ເພາະວ່າໂລກນີ້ ເປັນໂລກທີ່ແນມບໍ່ເຫັນ ຫລື ບໍ່ມີອາການເລີຍ. ເພາະວ່າການພົບປະກັນຫລາຍກວ່າ 2 ຄົນຂື້ນໄປຫມາຍເຖິງວ່າ ມັນຈະມີຄວາມສ່ຽງຕໍໂຕເຈົ້າເອງ ແລະ ສາມາດຕິດເຊື້ອໂດຍບໍຮູ້ໂຕເລີຍ ແລະ ເຈົ້າອາດຈະເອົາເຊື້ອໄປແພ່ຕໍ່ໂດຍທີ່ເຈົ້າບໍ່ໄດ້ເຈດຕະນາ ຫລື ຕັ້ງໃຈໃຫ້ຄົນອື່ນ.

ສຳລັບຂ້ອຍເອງ, ຂ້ອຍຍັງສືບຕໍ່ຮັກສາປິ່ນປົວ ແລະ ແພດຫມໍໄດ້ຕິດຕາມອາການຂອງຂ້ອຍ ຢ່າງໄກ້ຊິດ ແລະ ເຄັ່ງຄັດ. ຫວັງວ່າຂ້ອຍຈະເຊົາ ແລະ ມີອາການດີຂຶ້ນໄວໆນີ້.