ກົມເຕັກໂນໂລຊີ ດິຈິຕ໋ອນ ຈັດສຳມະນາ ການນຳໃຊ້ເຕັກໂນໂລຊີດິຈິຕ໋ອນໃນຍຸກ 4.0 ເຂົ້າໃນການພັດທະນາເສດຖະກິດສັງຄົມ

ກົມເຕັກໂນໂລຊີດິຈິຕ໋ອນ (ກຕດ), ກະຊວງວິທະຍາສາດ ແລະ ເຕັກໂນໂລຊີ ໄດ້ຈັດກອງປະຊຸມສຳມະນາ ໃນຫົວຂໍ້ “ສະພາບການພັດທະນາ ແລະ ການນໍາໃຊ້ເຕັກໂນໂລຊີດິຈິຕ໋ອນ ໃນຍຸກ 4.0 ເຂົ້າໃນການພັດທະນາເສດຖະກິດສັງຄົມຂອງ ສປປ ລາວ ແລະ ເຜີຍແຜ່ການນຳໃຊ້ບັນດາຊອບແວຣ ຂອງໂຄງການຄົ້ນຄວ້າວິທະຍາສາດ” ທີ່ຫ້ອງວ່າການແຂວງວຽງຈັນ ໂດຍໃຫ້ກຽດເຂົ້າຮ່ວມເປັນຄະນະປະທານຂອງທ່ານ ແກ້ວນະຄອນ ໄຊສຸລຽນ, ຫົວໜ້າກົມເຕັກໂນໂລຊີດິຈິຕ໋ອນ; ທ່ານ ບົວພັນ ສີວົງໄຊ, ຮອງຫົວໜ້າຫ້ອງວ່າການແຂວງວຽງຈັນ ແລະ ທ່ານ ພົມມະລາ ນັນທະວົງ, ຫົວໜ້າພະແນກວິທະຍາສາດ ແລະ ເຕັກໂນໂລຊີແຂວງວຽງຈັນ ເມື່ອບໍ່ດົນມານີ້.

ຈຸດປະສົງຂອງກອງປະຊຸມສຳມະນາຄັ້ງນີ້ ແມ່ນເພື່ອເຜີຍແຜ່ ແລະ ສ້າງຄວາມເຂົ້າໃຈໃຫ້ຜູ້ເຂົ້າຮ່ວມເຫັນໄດ້ກ່ຽວກັບບົດບາດ, ຄວາມໝາຍຄວາມສໍາຄັນ ແລະ ທິດທາງແນວໂນ້ມ ການພັດທະນາ-ການນຳໃຊ້ເຕັກໂນໂລຊີດິຈິຕ໋ອນ ເຂົ້າໃນການພັດທະນາເສດຖະກິດ-ສັງຄົມ, ການຜະລິດ ແລະ ນໍາໃຊ້ເຂົ້າໃນການດໍາລົງຊີວິດປະຈໍາວັນຂອງຄົນເຮົາ ທັງເປັນການຍົກສູງປະສິດທິພາບຂອງການປະຕິບັດວຽກງານ ໂດຍການນໍາໃຊ້ລະບົບ ເຕັກໂນໂລຊີດິຈິຕ໋ອນ ເຂົ້າໃນການຄຸ້ມຄອງ-ບໍລິຫານລັດ ໃນຍຸກອຸດສາຫະກໍາ 4.0 ນີ້.

ໃນກອງປະຊຸມສຳມະນາດັ່ງກ່າວ, ຜູ້ເຂົ້າຮ່ວມ ໄດ້ຮັບຟັງການນຳສະເໜີ ແລະ ບັນຍາຍຈາກນັກວິທະຍາກອນທີ່ມີບົດຮຽນ ແລະ ປະສົບການຈາກກົມເຕັກໂນໂລຊີດິຈິຕ໋ອນ ກ່ຽວກັບ ການຄຸ້ມຄອງ-ບໍລິຫານລັດແບບດິຈິຕ໋ອນ. ວິທະຍາກອນ ຍັງໄດ້ສະເໜີກ່ຽວກັບການພັດທະນາ ແລະ ການນຳໃຊ້ເຕັກໂນໂລຊີດິຈິຕ໋ອນ ເຂົ້າໃນການຜະລິດ, ການຄ້າ ແລະ ບໍລິການສັງຄົມ ເຊັ່ນ: ລະບົບອິນເຕີເນັດແຫ່ງຊັບພະສີ່ງ (loT: Internet of Thing), ຖານຂໍ້ມູນມະຫາສານ (Big Data), ລະບົບຄັງຂໍ້ມູນ (Cloud Computing), ປັນຍາປະດິດ (AI: Artificial Intelligence) ແລະ ລະບົບຖານຂໍ້ມູນຜູກພັນ (Block Chain).

ຜູ້ເຂົ້າຮ່ວມ ໄດ້ຮັບຟັງການນໍາສະເໜີ ສູນຂໍ້ມູນດິຈິຕ໋ອນ (DATA CENTER) ຂອງກະຊວງວິທະຍາສາດ ແລະ ເຕັກໂນໂລຊີ ຊຶ່ງເປັນພື້ນຖານໂຄງລ່າງທີ່ສໍາຄັນໃນການພັດທະນາອຸດສະຫະກຳດິຈິຕ໋ອນຂອງລາວ. ການສ້າງຕັ້ງສູນດັ່ງກ່າວ ເປັນການປະກອບສ່ວນທີ່ສຳຄັນຂອງການຫັນເປັນອຸດສະຫະກຳ.

ຜູ້ເຂົ້າຮ່ວມ ຍັງໄດ້ຮັບຟັງການນຳສະເໜີບັນດາຊອບແວຣຕ່າງໆ ທີ່ທາງກົມໄດ້ຄົ້ນຄວ້າ ແລະ ພັດທະນາຂື້ນມາ ເຊັ່ນ: ລະບົບກອງປະຊຸມທາງໄກ, ລະບົບຄຸ້ມຄອງຊັບສິນ, ລະບົບຄຸ້ມຄອງພະນັກງານ, ລະບົບນັບຄະແນນສຽງ, ລະບົບເອກະສານຂາເຂົ້າ-ຂາອອກ ແລະ ອື່ນໆ ເປັນຕົ້ນ.

ໂອກາດດຽວກັນນີ້, ກຕດ ໄດ້ມອບຄອມພິວເຕີ ໃຫ້ພະແນກວິທະຍາສາດ ແລະ ເຕັກໂນໂລຊີ(ພວຕ) ແຂວງວຽງຈັນ ເພື່ອຮັບໃຊ້ເຂົ້າໃນການປະຕິບັດວຽກງານ.
ເຂົ້າຮ່ວມກອງປະຊຸມສຳມະນາຄັ້ງນີ້ ມີຈຳນວນ 150 ທ່ານ, ຍິງ 47 ທ່ານ ຊຶ່ງໃນຈໍານວນນີ້ມີຜູ້ຕາງໜ້າຈາກ ພວຕ ນະຄອນຫຼວງວຽງຈັນ, ບັນດາພະແນກການ 18 ພະແນກ ອ້ອມຂ້າງແຂວງ ແລະ ບັນດາຫ້ອງການເມືອງ 4 ຕົວເມືອງ.

ພາບ ແລະ ຂ່າວ: ກົມເຕັກໂນໂລຊີດິຈິຕ໋ອນ