ດ່ວນ! 8ເມສາ ພົບຜູ້ຕິດເຊື້ອໂຄວິດ-19 ໃນລາວເພີ່ມອີກ 1ຄົນ ຍອດລວມແລ້ວ 15ຄົນ

ດ່ວນ! 8ເມສາ ພົບຜູ້ຕິດເຊື້ອໂຄວິດ-19 ໃນລາວເພີ່ມອີກ 1ຄົນ ຍອດລວມແລ້ວ 15ຄົນ

8th April 2020 0 By Education

ສາທາຖະແຫຼງວັນທີ 8 ເມສາ 2020 ພົບຜູ້ຕິດເຊື້ອໂຄວິດ-19 ເພີ່ມອີກ 1ຄົນ ເປັນເພດຍິງ ອາຍຸ 20ປີ ເດີນທາງມາຈາກປະເທດອັງກິດພ້ອມກັບກໍລະນີທີ 12 ເຮັດໃຫ້ມາຮອດປັດຈຸບັນຍອດຜູ້ຕິດເຊື້ອທັງໝົດມີ 15 ກໍລະນີ.

ໃນວັນທີ 8 ເມສາ 2020 ທີ່ກະຊວງສາທາລະນະສຸກ, ຄະນະສະເພາະກິດ ປ້ອງກັນ, ຄວບຄຸມ ແລະ ແກ້ໄຂ ການແຜ່ລະບາດຂອງພະຍາດ ໂຄວິດ-19 ຖະແຫຼງຂ່າວ ໂດຍທ່ານ ຮສ. ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ ໂດຍມີສື່ມວນຊົນຈາກຫຼາຍພາກສ່ວນເຂົ້າຮ່ວມ.

ທ່ານ ຮສ.ດຣ ພູທອນ ເມືອງປາກ ໃຫ້ຮູ້ວ່າ: ສະພາບການຄວບຄຸມ ແລະ ປ້ອງກັນການລະບາດຂອງເຊື້ອພະຍາດໂຄວິດ-19 ໃນວັນທີ 7 ເມສາ 2020  ພວກເຮົາໄດ້ເກັບຕົວຢ່າງກວດຫາເຊື້ອກໍລະນີສົງໄສທັງໝົດ 36 ກໍລະນີ, ໃນນັ້ນ ຢູ່ນະຄອນຫຼວງວຽງຈັນ 28 ກໍລະນີ ແລະ ຕ່າງແຂວງ 8 ກໍລະນີ. ຜ່ານຜົນກວດພົບຜູ້ຕິດເຊື້ອເພີ່ມ 1 ຄົນ ເປັນເພດຍິງ, ອາຍຸ 20 ປີ, ສັນຊາດລາວ ເປັນນັກສຶກສາລາວ ທີ່ເດີນທາງມາຈາກປະເທດອັງກິດ ໂດຍເດີນທາງມາພ້ອມກັນກັບຜູ້ຕິດເຊື້ອກໍລະນີທີ 12  ປັດຈຸບັນຢູ່ບ້ານຈອມມະນີ ເມືອງໄຊເສດຖາ ນະຄອນຫຼວງວຽງຈັນ.

ມາຮອດວັນທີ 8 ເມສາ 2020 ຍອດຜູ້ຕິດເຊື້ອພະຍາດໂຄວິດ-19 ໃນ ສປປ ລາວ ລວມທັງໝົດ 15 ຄົນ, ໃນນັ້ນ: ຢູ່ແຂວງຫຼວງພະບາງ 3 ຄົນ, ຢູ່ນະຄອນຫຼວງວຽງຈັນ 12 ຄົນ ເຊິ່ງເປັນຊາວຕ່າງປະເທດ (ປະເທດປາປົວນີວກິເນຍ) ທີ່ເຮັດວຽກຢູ່ລາວ 1 ຄົນ.

ຂອບໃຈຮູບພາບ: ຂ່າວເສດຖະກິດການຄ້າ