13 ເມສາ! ບໍ່ພົບຜູ້ຕິດເຊື້ອ ໂຄວິດ-19 ເພີ່ມ ແຕ່ສາທາຮຽກຮ້ອງຢ່າຖືເບົາຕໍ່ການປະຕິບັດຄໍາສັ່ງເລກທີ 06/ນຍ ເດັດຂາດ

13 ເມສາ! ບໍ່ພົບຜູ້ຕິດເຊື້ອ ໂຄວິດ-19 ເພີ່ມ ແຕ່ສາທາຮຽກຮ້ອງຢ່າຖືເບົາຕໍ່ການປະຕິບັດຄໍາສັ່ງເລກທີ 06/ນຍ ເດັດຂາດ

13th April 2020 0 By Education

ນັບວ່າເປັນຂ່າວດີຕ້ອນຮັບບຸນປີໃໝ່ລາວມື້ທໍາອິດ 13 ເມສາ 2020 ສາທາແຈ້ງຂ່າວດີ ບໍ່ພົບຜູ້ຕິດເຊື້ອໂຄວິດ-19 ເພີ່ມ ເຮັດໃຫ້ຍອດລວມຜູ້ຕິດເຊື້ອຍັງຢູ່ທີ່ 19 ກໍລະນີ. ແຕ່ສາທາກໍ່ເຕືອນໃຫ້ປະຕິບັດຕາມຄໍາສັ່ງ ນາຍົກຢ່າງເຄັ່ງຄັດ, ທັງນີ້ກໍ່ເພື່ອຈໍາກັດພະຍາດບໍ່ໃຫ້ແຜ່ລາມອອກສູ່ວົງກວ້າງຖ້າເຮົາຈໍາກັດບໍລິເວນແຕ່ຫົວທີ່ໄດ້ ຜູ້ຕິດເຊື້ອກໍ່ບໍ່ສົງເຊື້ອໃຫ້ຜູ້ອື່ນ.

ວັນທີ 13 ເມສາ 2020 ທີ່ກະຊວງສາທາລະນະສຸກ ໄດ້ຈັດພິທີຖະແຫຼງຂ່າວລາຍງານສະພາບການລະບາດຂອງພະຍາດໂຄວິດ-19 ໃນ ສປປ ລາວ ໂດຍມີ ທ່ານ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ພ້ອມຄະນະ ແລະ ສື່ມວນຊົນຈາກຫຼາຍພາກສ່ວນເຂົ້າຮ່ວມ.

ທ່ານ ຣັດຕະນະໄຊ ເພັດສຸວັນ ໃຫ້ຮູ້ວ່າ: ໃນວັນທີ 12 ເມສາ 2020, ໄດ້ ເກັບຕົວຢ່າງມາກວດທັງໝົດ 35 ຄົນ, ໃນນັ້ນ ມີຜູ້ສຳຜັດໃກ້ຊິດ ກັບຜູ້ຕິດເຊື້ອ 17 ຄົນ, ກໍລະນີມີອາການສົງໄສ 18 ຄົນ ເຊິ່ງມີ ແຮງງານລາວ ທີ່ກັບມາແຕ່ໄທ 01 ຄົນ, ໃນຈຳນວນ 35 ຄົນທີ່ມາກວດນັ້ນ ມີ ນະຄອນຫຼວງວຽງຈັນ 31 ຄົນ ແລະ ຕ່າງແຂວງ 04 ຄົນ; ຜົນກວດທັງໝົດ 35 ຄົນ ແມ່ນບໍ່ພົບເຊື້ອ.

ດັ່ງນັ້ນ, ນັບແຕ່ເດືອນມັງກອນ ຮອດ ວັນທີ 12 ເມສາ 2020 ໄດ້ເກັບຕົວຢ່າງມາກວດ ທັງໝົດ ມີ 1.186 ຄົນ, ກວດພົບເຊື້ອທັງໝົດ 19 ຄົນ (ມື້ນີ້ ຜົນກວດບໍ່ພົບເຊື້ອ) ແລະ ທັງໝົດ 19 ຄົນ ແມ່ນນອນປິ່ນປົວຕິດຕາມ ຢູ່ໂຮງໝໍ. ສ່ວນຈໍານວນຜູ້ສໍາຜັດໃກ້ຊິດທັງໝົດ ທີ່ໄດ້ຕິດຕາມ ແຕ່ວັນທີ 23 ມີນາ – 12 ເມສາ 2020 ມີ ທັງໝົດ 458 ຄົນ, ໝົດກໍານົດຕິດຕາມ ທັງໝົດ 379 ຄົນ, ຍັງສືບຕໍ່ຕິດຕາມທັງໝົດ 79 ຄົນ.

ແນວໃດກໍຕາມຕໍ່ກັບປະເດັນທີ່ຮຽກຮ້ອງໃຫ້ປະຊາຊົນໃນທົ່ວປະເທດຫຼີກເວັ້ນການຫຼິ້ນບຸນປີໃໝ່ລາວຕາມແບບທີ່ຜ່ານມານັ້ນ ສາທາໃຫ້ເຫດຜົນວ່າ: ສາເຫດບໍ່ໃຫ້ຫຼິ້ນນໍ້າ ຍ້ອນ ມີເຊື້ອປົນມານໍານໍ້າເວລາຫົດນໍ້າກັນ ເຮັດໃຫ້ມີການໃກ້ຊິດກັນ ແລະ ມີການເວົ້າ, ໄອ, ຈາມ ເຊິ່ງເຮັດໃຫ້ເຊຶ້ອຕົກຢູ່ນໍ້າ ແລະ ສາມາດມີອາຍຸໄດ້ເຖິງ 4-10 ວັນ.