ຊົມເຊີຍ! ອີກໜຶ່ງແບບຢ່າງ ການນໍາແຂວງສະຫວັນນະເຂດລົງແຈກຢາຍຜ້າອັດປາກ-ດັງໃຫ້ປະຊາຊົນກັບທີ່

ຊົມເຊີຍ! ອີກໜຶ່ງແບບຢ່າງ ການນໍາແຂວງສະຫວັນນະເຂດລົງແຈກຢາຍຜ້າອັດປາກ-ດັງໃຫ້ປະຊາຊົນກັບທີ່

15th April 2020 0 By Education

ຫາກທ່ານໃດທີ່ຕິດຕາມສື່ສັງຄົມອອນລາຍກໍ່ອາດຈະເຫັນຂ່າວດັ່ງກ່າວໄປແລ້ວບໍ່ຫຼາຍກໍ່ໜ້ອຍ ກ່ຽວກັບການລົງແຈກຜ້າອັດປາກ-ດັງໃຫ້ແກ່ປະຊາຊົນຂອງການນໍາແຂວງສະຫວັນນະເຂດ, ແຕ່ບໍ່ແມ່ນພຽງກໍລະນີດຽວນີ້ເທົ່ານັ້ນ ແອັດມິນເຄີຍນໍາສະເໜີໄປກ່ອນໜ້າແລ້ວແມ່ນເຈົ້າເມືອງ ເມືອງແອດ ທີ່ໄດ້ລົງແຈກຜ້າອັດປາກ-ດັງ ໃຫ້ປະຊາຊົນເຊັ່ນດຽວກັນ, ເຊິ່ງຖືເປັນເລື່ອງລາວດີໆທີ່ເກີດຂຶ້ນໃນສັງຄົມທ່າມກງທີ່ປະເທດພົບວິກິດແບບນີ້.

ໃນຕອນເຊົ້າວັນທີ 12 ເມສາ 2020 ນີ້, ການນໍານະຄອນ ນໍາພາໂດຍທ່ານ ປອ ແສງທອງ ວັງແກ້ວມະນີ ເຈົ້ານະຄອນ ໄກສອນ ພົມວິຫານ,ພ້ອມດ້ວຍຄະນະ ໄດ້ລົງເຄື່ອນໄຫວແຈກຢາຍຜ້າອັດປາກອະນາໄມຟຣີໃຫ້ພໍ່ຄ້າແມ່ຄ້າ ແລະ ປະຊາຊົນ ເພື່ອຕ້ານ-ສະກັດກັ້ນພະຍາດໂຄວິດ-19 ຢູ່ຕະຫລາດສະຫັວນໄຊ.

ການລົງເຄື່ອນໄຫວແຈກຢາຍຜ້າອັດປາກຄັ້ງນີ້ກໍ່ຍ້ອນຄວາມເປັນຫວ່ງເປັນໄຍຂອງຂັ້ນເທິງທີ່ມີຕໍ່ປະຊາຊົນພາຍໃນນະຄອນ ໄກສອນ ພົມວິຫານ ນອກຈາກນັ້ນ ກໍເປັນການຜັນຂະຫຍາຍຕາມຄໍາສັງ-ແຈ້ງການຂອງລັດຖະບານ ແລະ ທິດຊີ້ນໍາຂອງທ່ານ ນາຍົກລັດຖະມົນຕີ ໃຫ້ແຈກຢາຍຜ້າອັດປາກອະນາໄມໃຫ້ປະຊາຊົນເພື່ອຮັບປະກັນຄວາມປອດໄພ ແລະ ສະກັດກັ້ນໂຄວິດ ເຖິງແມ່ນວ່າຜ້າອັດປາກມີບໍ່ຫລາຍ ແຕ່ພວກເຮົາຕັ້ງໃຈປະກອບສ່ວນ ແລະ ສົ່ງເສີມຂະບວນການຕ້່ານພະຍາດໂຄວິດຢ່າງໜັກແໜ້ນ.

ໂອກາດນີ້ ທ່ານເຈົ້ານະຄອນກໍ່ໄດ້ເນັ້ນໜັກໃຫ້ທຸກພາກສ່ວນເອົາໃຈໃສ່ ພ້ອມທັງໃຫ້ມີການໂຄສະນາສຸເຜີຍແຜ່ໃຫ້ປະຊາຊົນໄດ້ເຂົ້າໃຈເຖິງການແຜ່ລະບາດຂອງພະຍາດໂຄວິດ 19 ໄດ້ຢ່າງທົ່ວເຖິງແລະ ໄດ້ຮຽກຮ້ອງໃຫ້ປະຊາຊົນໃນນະຄອນ ຈົ່ງພ້ອມກັນ,ເອົາໃຈໃສ່ປະຕິບັດລະບຽບຢ່າງເຂັ້ມງວດ ທັງນີ້ກໍ່ເພື່ອເປັນການຄວບຄຸມແລະຕ້ານການແຜ່ລະບາດຂອງພະຍາດໂຄວິດ 19 ພ້ອມກັນຜ່ານຜ່າວິກິດການຄັ້ງນີ້ ໃຫ້ລຸລ່ວງໄປດ້ວຍດີ ແລະ ມີຄວາມປອດໄພທຸກໆຄົນ.

ຈາກນັ້ນ ທ່ານ ເຈົ້ານະຄອນ ພ້ອມຄະນະກໍ່ຍັງໄດ້ລົງຕິດຕາມຈຸດກວດກາຂອງເຈົ້າໜ້າທີ ປກຊ-ປກສ ທັງ 03 ຈຸດ ໃນເທດສະບານຂອງນະຄອນ ແລະ ພ້ອມທັງແຈກຢາຍນໍ້າດື່ມແລະ ຜ້າອັດປາກໃຫ້ແກ່ຜູ້ຄົນທີ່ສັນຈອນໃນທ້ອງຖະໜົນ ແລະ ພ້ອມທັງແນະນໍາໃຫ້ຜູ້ຂັບຂີ່ລົດ ຖ້າບໍ່ຈໍາເປັນບໍ່ຄວນອອກແຕ່ບ້ານເຮືອນ ເພື່ອສະກັດກັ້ນພະຍາດລະບາດບໍ່ໃຫ້ມັນເກີດຂຶ້ນ.

ທີ່ມາ: ວິທະຍຸກະຈາຍສຽງແຂວງສະຫວັນນະເຂດ