ບົດຮຽນລາຄາແພງ! ຢາກເຮັດດີເພື່ອສັງຄົມ ແຕ່ບໍ່ມີລະບົບການຈັດການທີ່ດີ ກັບກາຍເປັນດາບສອງຄົມທໍາຮ້າຍຄົນອື່ນໂດຍບໍ່ຮູ້ໂຕ

ບົດຮຽນລາຄາແພງ! ຢາກເຮັດດີເພື່ອສັງຄົມ ແຕ່ບໍ່ມີລະບົບການຈັດການທີ່ດີ ກັບກາຍເປັນດາບສອງຄົມທໍາຮ້າຍຄົນອື່ນໂດຍບໍ່ຮູ້ໂຕ

15th April 2020 0 By Education

ເຊື່ອວ່າຫຼາຍທ່ານຈະຮັບຮູ້ ແລະ ເຫັນພາບກ່ຽວກັບການແຈກຢາຍເຄື່ອງຂອງຊ່ວຍເຫຼືອ ເປັນເຂົ້າສານອາຫານແຫ້ງໃຫ້ແກ່ປະຊາຊົນເພື່ອບັນເທົາທຸກຊ່ວຍກັນໃນຍາມຍາກ ແຕ່ຄວາມປາຖະໜາດີນັ້ນ ກັບກາຍເປັນດາບສອງຄົມ ກັບມາທໍາຮ້າຍຜູ້ໃຈບຸນ ໂດຍຖືກວິຈານໄປຕ່າງໆນາໆ ວ່າມັນອາດກາຍເປັນການສ້າງຄວາມສ່ຽງເຮັດໃຫ້ປະຊາຊົນມີໂອກາດຕິດເຊື້ອໂຄວິດ-19 ໄດ້ງ່າຍຂຶ້ນ ເນື່ອງຈາກສະພາບທີ່ປາກົດໃນສື່ອອນລາຍຂອງຕອນເຊົ້າວັນທີ 15 ເມສາ 2020 ທີ່ບໍລິສັດເຊົ່າສິນເຊື່ອແຫ່ງໜຶ່ງນັ້ນ ແອອັດໄປດ້ວຍຜູ້ຄົນຈໍານວນຫຼາຍທີ່ມາລໍຖ້າຮັບເຄື່ອງຊ່ວຍເຫຼືອ ເຊິ່ງມັນຂັດຕໍ່ຄໍາສັ່ງຂອງນາຍົກລັດຖະມົນຕີແຫ່ງ ສປປ ລາວ ສະບັບເລບກທີ 06/ນຍ.

ຕໍ່ກັບກໍລະນີດັ່ງກ່າວ ຜູ້ໃຈບຸນບໍລິສັດເຊົ່າສິນເຊື່ອແຫ່ງນີ້ ກໍ່ໄດ້ອອກມາຂໍໂທດສັງຄົມຕໍ່ກັບປະເດັນການແຈກຢາຍເຄື່ອງອັນກໍ່ໃຫ້ເກີດການໂຮມຊຸມນຸມຈໍານວນຫຼາຍນັ້ນວ່າ: ຂໍສະແດງຄວາມຂໍໂທດຕໍ່ລັດຖະບານ ທີ່ໄດ້ຈັດກິດຈະກຳດັ່ງກ່າວ ໂດຍທີ່ບໍ່ຄິດວ່າຈະມີປະຊາຊົນ ຫລັ່ງໄຫລກັນເຂົ້າມາຫລາຍປານນີ້.

ແນວໃດກໍ່ຕາມ ແອັດມິນຂໍຊົມເຊີຍໃນຄວາມມີນໍ້າໃຈຂອງບໍລິສັດເຊົ່າສິນເຊື່ອແຫ່ງນີ້ທີ່ຕ້ອງການຊ່ວຍເຫຼືອເພື່ອນຮ່ວມຊາດໃນຍາມພົບວິກິດ, ເຊິ່ງແນ່ນອນວ່າໃນສະພາບເສດຖະກິດແບບນີ້ ມີຈໍານວນຄົນບໍ່ຫຼາຍປານໃດທີ່ຈະຄິດຢາກຊ່ວຍເຫຼືອ ຫຼື ແບ່ງປັນໃຫ້ຄົນອື່ນ ເຊິ່ງສິ່ງນີ້ຖືເປັນສິ່ງທີ່ໜ້າຍ້ອງຍໍສັນລະເສີນ. ແຕ່ວິກິດທີ່ປະເທດເຮົາພວມປະເຊີນຢູ່ນີ້ ຄືການຕໍ່ສູ້ກັບການລະບາດຂອງພະຍາດໂຄວິດ-19 ແລະ ລັດຖະບານກໍ່ໄດ້ມີມາດຕະການອັນເຂັ້ມງວດໃນການຄວບຄຸມການລະບາດຂອງພະຍາດດັ່ງກ່າວ ເຊິ່ງໜຶ່ງໃນມາດຕະການນັ້ນແມ່ນການຫ້າມໂຮມຊຸມນຸມ ຫຼື ຈັດກິດຈະກໍາຕ່າງໆ ທີ່ມີຜູ້ຄົນຈໍານວນຫຼາຍເຂົ້າຮ່ວມ ເນື່ອງຈາກມັນສ່ຽງຕໍ່ການຕິດເຊື້ອ ຫຼື ແຜ່ເຊື້ອ.

ແຕ່ສະພາບການແຈກຢາຍເຄື່ອງຂອງໃນເຊົ້າມື້ນີ້ ກັບກົງກັນຂ້າມ ມີຜູ້ຄົນຫຼັ່ງໄຫຼເຂົ້າໄປຢ່າງຫຼວງຫຼາຍ ແລະ ແອອັດ ເຮັດໃຫ້ເກີດມີສຽງວິພາກວິຈານຈາກສັງຄົມວ່າມັນບໍ່ສົມຄວນເກີດຂຶ້ນເປັນຢ່າງຍິ່ງ. ແນວໃດກໍຕາມ ຈາກເຫດການດັ່ງກ່າວ ເຮັດໃຫ້ເຫັນໄດ້ຫຼາຍຢ່າງທີ່ຈະສາມາດຖອດຖອນບົດຮຽນໄດ້ ໃຫ້ແກ່ຜູ້ອື່ນ ຫາກມີຄວາມຄິດຢາກຊ່ວຍເຫຼືອ, ຢາກແບ່ງປັນ ຕ້ອງມີລະບົບການຈັດການທີ່ດີ ແລະ ຮັບຜິດຊອບຕໍ່ສັງຄົມໃຫ້ຫຼາຍຂຶ້ນ ແລະ ທີ່ສໍາຄັນສິ່ງເຫຼົ່ານັ້ນ ຕ້ອງບໍ່ຂັດຕໍ່ຄໍາສັ່ງສັ່ງ ຫຼື ນະໂຍບາຍຂອງລັດຖະບານ.