ຊົມເຊີຍ! ເຈົ້າໜ້າທີ່ເມືອງສິງ ເຮັດແທ້ທໍາຈິງ ລົງພື້ນທີ່ກັກຕົວຜູ້ລະເມີດລັກລອບຕັ້ງວົງຊຸມນຸມດື່ມສິ່ງມືນເມົາ

ຊົມເຊີຍ! ເຈົ້າໜ້າທີ່ເມືອງສິງ ເຮັດແທ້ທໍາຈິງ ລົງພື້ນທີ່ກັກຕົວຜູ້ລະເມີດລັກລອບຕັ້ງວົງຊຸມນຸມດື່ມສິ່ງມືນເມົາ

16th April 2020 0 By Education

ຊົມເຊີຍໃນການປະຕິບັດໜ້າທີ່ຂອງເຈົ້າໜ້າທີ່ທຸກພາກສ່ວນໃນການເອົາໃຈໃສ່ລົງຕິດຕາມກວດກາການຈັດຕັ້ງປະຕິບັດຄໍາສັ່ງເລກທີ 06/ນຍ ຂອງປະຊາຊົນໃຫ້ເປັນລະບຽບຮຽບຮ້ອຍ ເພື່ອສະກັດກັ້ນ ແລະ ຄວບຄຸມການລະບາດຂອງພະຍາດໂຄວິດ-19. ໂດຍຫຼ້າສຸດເຈົ້າໜ້າທີ່ເມືອງສິງ ແຂວງຫຼວງນໍ້າທາ ລົງມ້າງພ້ອມກັກຕົວກຸ່ຄົນຈໍານວນໜຶ່ງທີ່ລະເມີດຄໍາສັ່ງດັ່ງກ່າວ ດ້ວຍການລັກລອບເຂົ້າປ່າຕັ້ງວົງດື່ມສິ່ງມຶນເມົາ.

ຕອນບ່າຍຂອງວັນທີ 15 ເມສາ 2020 ປກສ ເມືອງສິງ ໄດ້ລົງແກ້ໄຂພາກສ່ວນທີລະເມີດ ແລະ ບໍ່ປະຕິບັດຕາມ ຄຳສັ່ງຂອງນາຍົກລັດຖະມົນຕີ ເລກທີ 06/ນຍ ແລະ ຕາມການຊີ້ນຳຂອງຄະນະປະຈຳພັກເມືອງໆສິງ ສະນັ້ນກອງບັນຊາ ການ ປກສ ເມືອງສິງຈຶ່ງໄດ້ແຕ່ງຕັ້ງອ້າຍນ້ອງລົງໄປກວດກາສະຖານທີຕາມສວນນ້ຳຫຍ້າ ຈຸດທີມີຄົນໄປຫຼິ້ນກິນ ດື່ມ ສິ່ງມືນເມົາ ເຫຼົ້າ, ເບຍ ຊຸມແຊວກັນ ນຳພາໂດຍສະຫາຍ ພັນຕີ ແອ໋ສະຫວັນ ທິບພະຍອດແກ້ວ ຮອງພະແນກ ສັນ ຕິບານ ປກສ ເມືອງສິງ ພ້ອມດ້ວຍທິມງານ, ຜ່ານການລົງກວດກາຕົວຈິງພົບເຫັນຜູ້ທີລະເມີດຊຸມແຊວດື່ມ ເຫຼົ້າ, ເບຍ ທັງ ໝົດ 01 ຈຸດ, ມີ 03 ວົງ ຢູ່ຫ່າງກັນປະມານ 50 ແມັດ ເທິງບ້ານ ສົບອິໃໝ່ ລວມທັງໝົດມີ 41 ຄົນ, ຍິງ 17 ຄົນ, ໃນນີ້ຢູ່ບ້ານ ສົບອິໃໝ່ ມີ 20 ຄົນ, ຍິງ 08 ຄົນ, ບ້ານ ຊຽງຍືນ 19 ຄົນ, ຍິງ 08 ຄົນ ແລະ ບ້ານ ຫົວຂົວ 02 ຄົນ, ຍິງ 01 ຄົນ.

ດັ່ງນັ້ນ, ທາງເຈົ້າໜ້າທີພວກເຮົາຈຶ່ງໄດ້ກັກຕົວຜູ້ທີລະເມີດທັງໝົດ ມາກອງບັນຊາການ ປກສ ເມືອງສິງ ເພື່ອອະທິບາຍຄຳສັ່ງ, ແຈ້ງການ ແລະ ລະບຽບການຕ່າງໆ ໃນຊ່ວງໄລຍະບຸນປີໃໝ່ລາວ ເພື່ອໃຫ້ຮັບຮູ້ ແລະ ເຂົ້າໃຈ ບໍ່ໃຫ້ລະເມີດອີກໃນຄັ້ງຕໍ່ໄປ ແລະ ຜູ້ທີໄດ້ລະເມີດໃນຄັ້ງນີ້ທາງເຈົ້າໜ້າທີພວກເຮົາໄດ້ປະສານສົມທົບກັບຫ້ອງການສາທາລະນະສຸກເມືອງ ມາກວດກາອຸນຫະພູມ ພົບວ່າມີ 02 ຄົນມີອຸນຫະພູມສູງກ່ວາ 38 ອົງສາ ສະນັ້ນທາງເຈົ້າໜ້າທີພວກເຮົາຈຶ່ງໄດ້ ສ້າງບົດບັນ ທຶກສຶກສາອົມຮົມກ່າວເຕື່ອນຜູ້ທີລະເມີດຄຳສັ່ງຂອງນາຍົກລັດຖະມົນຕີ ເລກທີ 06/ນຍ ຈຳນວນ 41 ຄົນ, ຍິງ 17 ຄົນ ແລະ ໄດ້ມອບໃຫ້ທາງອົງການຈັດຕັ້ງບ້ານແຕ່ລະບ້ານ ຮັບເອົາລູກບ້ານຂອງຕົນເອງເພື່ອໄປກັກກັນເຂົ້າສູນ ຂອງແຕ່ລະບ້ານ ແລະ ຕິດຕາມອາການເຊື້ອພະຍາດ ໂຄວິດ 19 ເປັນເວລາ 14 ວັນ.

ແນວໃດກໍ່ຕາມ ຮຽກຮ້ອງໃຫ້ທຸກພາກສ່ວນຈົ່ງພ້ອມໃຈກັນປະຕິບັດຄໍາສັ່ງເລກທີ 6 ຢ່າງເຂັ້ມງວດ ເພາະບໍ່ແມ່ນເຮັດເພື່ອຄົນອື່ນ ມັນຄືການເຮັດເພື່ອຕົນເອງ, ເພື່ອຄົນທີ່ທ່ານຮັກ ເພື່ອໃຫ້ຫ່າງໄກຈາກເຊື້ອພະຍາດນີ້ ແລະ ພ້ອມໃຈກັນຂ້າມຜ່ານວິກິດການນີ້ໄປນໍາກັນ.