ສຸດເສົ້າ! ທ່ານໝໍເຊື້ອຊາດລາວ ເຮັດໜ້າທີ່ປິ່ນປົວຄົນເຈັບຕິດໂຄວິດ-19 ຢູ່ຝຣັ່ງ ສຸດທ້າຍເສຍຊີວິດຍ້ອນຕິດເຊື້ອ

ສຸດເສົ້າ! ທ່ານໝໍເຊື້ອຊາດລາວ ເຮັດໜ້າທີ່ປິ່ນປົວຄົນເຈັບຕິດໂຄວິດ-19 ຢູ່ຝຣັ່ງ ສຸດທ້າຍເສຍຊີວິດຍ້ອນຕິດເຊື້ອ

19th April 2020 0 By Education

ເປັນເລື່ອງລາວທີ່ສ້າງຄວາມສະເທືອນໃຈໃຫ້ແກ່ຄົນລາວອີກເລື່ອງໜຶ່ງ ແລະ ເປັນການສູນເສຍອັນໜ້າເສຍດາຍຫຼາຍໃຫ້ແກ່ວົງການການແພດທີ່ຕ້ອງສູນເສຍບຸກຄະລາກອນທີ່ເກັ່ງອີກທ່ານໜຶ່ງ ຍ້ອນໂຄວິດ-19 ຈາກການປິ່ນປົວຄົນເຈັບຜູ້ຕິດເຊື້ອພະຍາດດັ່ງກ່າວຢູ່ປະເທດຝຣັ່ງ.

ແນວໃດກໍ່ຕາມ ເຖິງແມ່ນວ່າທ່ານຈະບໍ່ໄດ້ປະຕິບັດໜ້າທີ່ຢູ່ປະເທດລາວເຮົາ ແຕ່ສິ່ງດຽວກັນທີ່ທ່ານໝໍທຸກຄົນມີຄື ການປິ່ນປົວຄົນເຈັບໃຫ້ຫາຍຂາດຈາກພະຍາດໂລຄາຕ່າງໆ ໂດຍສະເພາະແມ່ນມັດຈຸລາດໂຄວິດ, ເຊິ່ງທ່ານໝໍທຸກຂົງເຂດໃນທົ່ວໂລກ ລ້ວນກໍາລັງແບກຫາບພາລະອັນໃຫຍ່ຫຼວງນີ້ ແລະ ພວກເຮົາກໍ່ສູນເສຍພວກເຂົາໄປແລ້ວຈໍານວນບໍ່ໜ້ອຍ ແຕ່ຂໍໃຫ້ທ່ານຈົ່ງພູມໃຈທ່ານຈະຖືກຈົດຈໍາໃນນາມນັກຮົບຊຸດຂາວຜູ້ຕໍສູ້ເພື່ອປະຊາຊົນຕະຫຼອດໄປ.

ທ່ານໝໍ ກາບແກ້ວ ສຸວັນລາສີ ແມ່ນທ່ານໝໍເຊື້ອຊາດລາວ ທີ່ເຖິງແກ່ມໍລະນະກຳແລ້ວ ເມື່ອວັນທີ 14 ເມສາ 2020 ທີ່ຜ່ານມາ ເສຍຊີວິດຢູ່ປະເທດຝຣັ່ງ, ສາເຫດການເສຍຊີວິດແມ່ນຕິດພະຍາດໂຄວິດ-19 ຈາກການປິ່ນປົວຄົນເຈັບຖືເປັນເລື່ອງເສົ້າສະລົດໃຈທີ່ສູນເສຍບຸກຄະລະກອນທີ່ດີ ທາງການແພດ, ຂ່າວເສົ້າສະຫຼົດໃຈດັ່ງກ່າວໄດ້ຖືກປະກາດອອກມາໂດຍຫຼານຊາຍຂອງເພິ່ນ.

ດຣ.ກາບແກ້ວ ເປັນໜຶ່ງໃນແພດລາວທີ່ເກັ່ງ, ມີຄວາມສາມາດ ແລະ ມີຄວາມກະຕືລືລົ້ນ ໃນການປິ່ນປົວຄົນເຈັບຫຼາຍຄົນທີ່ຕິດເຊື້ອໂຄວິດ-19 ຢ່າງເຕັມທີ່ ຫຼັງຈາກທ່ານຫມໍໄດ້ຕິດເຊື້ອໂຄວິດ-19 ເພິ່ນກໍໄດ້ຮັບການປິ່ນປົວຢູ່ທີ່ໂຮງໝໍ ແລະ ໃນເວລາຕໍ່ມາກໍເສຍຊີວິດ.

ນອກຈາກນັ້ນ, ທ່ານກາບແກ້ວຍັງເປັນປະທານພົບປະສັງສັນກັບນາຍແພດລາວ ແລະ ພະນັກງານສາທາລະນະສຸກລາວຄັ້ງທີ 4 ທີ່ນະຄອນປາຣີ ໃນປີ 2019 ນອກຈາກເພິ່ນເປັນແພດໝໍທີ່ດີແລ້ວ ເພິ່ນຍັງເປັນນັກປະພັນເພງລາວ ແລະ ເປັນຜູ້ໜຶ່ງທີ່ລິເລີ່ມເຕົ້າໂຮມແພດລາວຢູ່ປະເທດຝຣັ່ງ ແລະ ມາຈາກປະເທດເຮົາອີກດ້ວຍ.

ດັ່ງທີ່ທຸກຄົນຮູ້ດີວ່າການແຜ່ລະບາດຂອງພະຍາດໂຄວິດ-19 ນັບມື້ນັບຮຸນແຮງຂຶ້ນ ແລະ ສ້າງຜົນກະທົບຕໍ່ຄົນທົ່ວໂລກ, ມີຜູ້ຄົນຈຳນວນຫຼວງຫຼາຍຕິດເຊື້ອ ແລະ ເສຍຊີວິດຍ້ອນໂຄວິດ-19. ໂດຍສະເພາະປະເທດຝຣັ່ງໄດ້ຖືກຈັດເປັນປະເທດອັນດັບທີ 5 ໃນທົ່ວໂລກ ທີ່ມີຜູ້ຕິດເຊື້ອໂຄວິດ-19 ຈຳນວນຫຼາຍ. ໃນສະຖານະການໂຄວິດ-19 ແຜ່ລາມ, ພາກສ່ວນທີ່ຮັບພາລະໜັກໜ່ວງທີ່ສຸດໃນໄລຍະວິກິດການນີ້ ກໍຄືແພດໝໍ ແລະ ບຸກຄະລະກອນສາທາລະນະສຸກ ທີ່ເສຍສະຫຼະ ເພື່ອຫວັງຢຸດຢັ້ງການແພ່ລະບາດຂອງພະຍາດໂຄວິດ-19.

ຂອບໃຈຂໍ້ມູນ ແລະ ພາບ ຈາກ: Kitsada Sat