ສັນຍານດີ ມື້ທີ 8ແລ້ວ ທີ່ລາວບໍ່ພົບຜູ້ຕິດເຊື້ອໂຄວິດ-19 ເພີ່ມ ແຕ່ມັນມີໂອກາດກັບມາລະບາດໃຫຍ່ໄດ້ທຸກເມື່ອ

ສັນຍານດີ ມື້ທີ 8ແລ້ວ ທີ່ລາວບໍ່ພົບຜູ້ຕິດເຊື້ອໂຄວິດ-19 ເພີ່ມ ແຕ່ມັນມີໂອກາດກັບມາລະບາດໃຫຍ່ໄດ້ທຸກເມື່ອ

20th April 2020 0 By Education

ກະຊວງສາທາລະນະສຸກລາຍງານ ໃນວັນທີ 20 ເມສາ 2020 ບໍ່ພົບຜູ້ຕິດເຊື້ອໂຄວິດ-19 ເພີ່ມ ແຕ່ຂໍໃຫ້ພໍ່ແມ່ປະຊາຊົນຢ່າສະຫຼ້າໃຈ ຕ້ອງພ້ອມກັນສືບຕໍ່ເອົາໃຈໃສ່ຈັດຕັ້ງປະຕິບັດບັນດາມາດຕະການຕ່າງໆທີ່ທາງຄະນະສະເພາະກິດ ແລະ ຄຳສັ່ງເລກທີ 06/ນຍ ວາງອອກຢ່າງເຄັ່ງຄັດ.

ໃນວັນທີ 20 ເມສາ 2020 ທີ່ກະຊວງ ສາທາລະນະສຸກໄດ້ມີພິທີຖະແຫຼງຂ່າວລາຍງານສະພາບການລະບາດຂອງສເຊື້ອໂຄວິດ-19 ໂດຍການໃຫ້ຖະແຫຼງຂອງທ່ານ ຮສ.ດຣ ພູທອນ ເມືອງປາກ ຮອງລັດຖະມົນຕີກະຊວງສາທາລະນະສຸກ, ຜູ້ປະຈຳການຄະນະສະເພາະກິດຄວບຄຸມພະຍາດໂຄວິດ-19 ພ້ອມດ້ວຍຄະນະ ແລະ ພາກສ່ວນກ່ຽວຂ້ອງເຂົ້າຮ່ວມ.

ໃນໂອກາດດັ່ງກ່າວ ທ່ານ ຮສ.ດຣ ພູທອນ ເມືອງປາກ ໃຫ້ຮູ້ວ່າ: ໃນວັນທີ 19 ເມສາ 2020, ໄດ້ເກັບຕົວຢ່າງມາກວດທັງໝົດ 16 ຄົນ, ໃນນັ້ນມີຜູ້ສຳຜັດໃກ້ຊິດ ກັບຜູ້ຕິດເຊື້ອ 7 ຄົນ, ກໍລະນີມີອາການສົງໄສ 9 ຄົນ (ບໍ່ມີແຮງງານລາວທີ່ກັບມາແຕ່ໄທ). ໃນຈໍານວນ 16 ຄົນ ທີ່ມາກວດນັ້ນ ທັງໝົດແມ່ນ ຢູ່ນະຄອນຫຼວງວຽງຈັນ, ທັງນີ້ຜົນກວດທັງໝົດ 16 ກໍລະນີ ບໍ່ພົບເຊື້ອ. ໝາຍຄວາມວ່າໃນວັນທີ 19 ເມສາ 2020 ບໍ່ມີກໍລະນີໃໝ່. ທັງນີ້, ນັບແຕ່ເດືອນມັງກອນ ຮອດ ວັນທີ 18 ເມສາ 2020 ໄດ້ເກັບຕົວຢ່າງມາກວດທັງໝົດ ມີ 1.349 ຄົນ, ກວດພົບເຊື້ອທັງໝົດ 19 ຄົນ (8 ມື້ແລ້ວທີ່ບໍ່ມີຜູ້ຕິດເຊື້ອເພີ່ມ).

ສະເພາະການຕິດຕາມປີ່ນປົວຄົນເຈັບຢູ່ໂຮງໝໍ ປະຈຸບັນຍັງມີຜູ້ຕິດເຊື້ອນອນຢູ່ໂຮງໝໍ 17 ຄົນ, ຈຳນວນ 3 ຄົນຢູ່ໂຮງໝໍແຂວງຫຼວງພະບາງ ເຫັນວ່າມີອາການຄົງຕົວ ຂັ້ນເບົາບາງ ຍັງຕິດຕາມການກວດຫາເຊື້ອເພື່ອຢັ້ງຢືນ. ຈຳນວນ 14 ຄົນຢູ່ໂຮງໝໍມິດຕະພາບ ທັງໝົດເຫັນວ່າ ມີອາການເບົາບາງ ແລະ ຍັງຕິດຕາມການກວດຫາເຊື້ອເພື່ອຢັ້ງຢືນ.

ຂະນະດຽວກັນ ທ່ານ ພອນປະດິດ ສັງໄຊຍະລາດ ຫົວໜ້າສູນລະບາດວິທະຍາ ກ່າວວ່າ: ການບໍ່ມີຜູ້ຕິດເຊື້ອຕິດຕໍ່ກັນເຖິງ 8ມື້ຖືເປັນສັນຍານເຕືອນທີ່ດີ ແລະ ຫາກສືບຕໍ່ໄປຮອດ 1ຖວັນ ຖືວ່າເປັນຜົນສໍາເລັດຂັ້ນທໍາອິດຂອງລາວເຮົາໃນການຕໍ່ສູ້ກັບພະຍາດນີ້. ແຕ່ການທີ່ບໍ່ມີເຊື້ອໃນໄລຍະ 14 ວັນບໍ່ໄດ້ບອກວ່າເຮົາຈະບໍ່ມີການລະບາດໃຫຍ່ ເຊິ່ງຫຼາຍປະເທດມີການເກີດຂຶ້ນ ຫຼື ເອີ້ນວ່າ ເຊເກິນເວບ ຄື້ນມາໃໝ່, ເຊິ່ງສິ່ງນີ້ຍິ່ງເຮັດໃຫ້ເກີດການລະບາດທີ່ໃຫຍ່ກວ່າເກົ່າເຊິ່ງມັນຈະສົ່ງຜົນກະທົບອັນໜັກຕໍ່ເສດຖະກິດຫຼາຍຂຶ້້ນ, ສະນັ້ນ ທຸກຄົນຢ່າສະຫຼ້າໃຈ, ຕ້ອງເຄັ່ງຄັດໃນການຈັດຕັ້ງປະຕິບັດມາດຕະການຕ່າງໆໃຫ້ຫຼາຍຂຶ້ນ ໂດຍສະເພາະແມ່ນການປະຕິບັດຄໍາສັ່ງເລກທີ 06/ນຍ.