ຂໍນະໂຍບາຍຊ່ວຍເຫຼືອຜູ້ເຊົ່າເຮືອນຢູ່! ມີແຜນສະເໜີຕໍ່ກອງປະຊຸມປະຈໍາເດືອນຂອງລັດຖະບານມື້ອື່ນນີ້

ຂໍນະໂຍບາຍຊ່ວຍເຫຼືອຜູ້ເຊົ່າເຮືອນຢູ່! ມີແຜນສະເໜີຕໍ່ກອງປະຊຸມປະຈໍາເດືອນຂອງລັດຖະບານມື້ອື່ນນີ້

22nd April 2020 0 By Education

ໃນຍາມວິກິດແບບນີ້ ແນ່ນອນວ່າທຸກພາກສ່ວນລ້ວນໄດ້ຮັບຜົນກະທົບ ແຕ່ສໍາລັບກຸ່ມຄົນທີ່ຫາເຊົ້າກິນຄໍ່າ ມີລາຍໄດ້ໜ້ອຍ ຫາຮັບຈ້າງລາຍວັນ ແຖມຍັງຢູ່ເຮືອນເຊົ່າເຂົ້າຊື້ ມັນຍິ່ງເປັນການຊໍ້າເຕີມຄວາມທຸກຍາກແກ່ເຂົາເຈົ້າ. ດັ່ງນັ້ນ ຍ້ອນເຫັນໄດ້ຄວາມຫຍຸ້ງຍາກດັ່ງກ່າວ  ແຮງງານ ແລະ ສະຫວັດດີການສັງຄົມ ໄດ້ສະເໜີຕໍ່ກອງປະຊຸມເພື່ອແກ້ໄຂ ຜົນກະທົບຈາກການລະບາດພະຍາດອັກເສບປອດ ຈາກເຊື້ອຈຸລະໂລກສາຍພັນໃໝ່ ໂຄວິດ-19 ຕໍ່ເສດຖະກິດລາວ ເພື່ອໃຫ້ລັດຖະບານມີມາດຕະການຊ່ວຍເຫຼືອຜູ້ເຊົ່າເຮືອນຢູ່.

ໃນໄລຍະກອງປະຊຸມດັ່ງກ່າວ ທີ່ຈັດຂຶ້ນໃນມື້ວານນີ້ ຢູ່ກະຊວງແຜນການ ແລະ ການລົງທຶນ, ຜູ້ຕ່າງໜ້າກະຊວງແຮງງານ ແລະ ສະຫວັດດີການສັງຄົມ ໄດ້ສະເໜີໃຫ້ລັດຖະບານອອກແຈ້ງການເຖິງຜູ້ປະກອນການ ເຮືອນເຊົ່າ, ຫ້ອງເຊົ່າ ເພື່ອຫຼຸດຜ່ອນ ຫຼື ເລື່ອນຄ່າເຊົ່າ ຫຼື ຍົກເວັ້ນຄ່າເຊົ່າໃຫ້ ແກ່ຜູ້ອອກແຮງງານ ເປັນຕົ້ນແມ່ນປະຊາຊົນຜູ້ຫາເຊົ້າກິນຄໍ່າ ທີ່ໄດ້ຮັບຜົນກະທົບຈາກການປະກອບອາຊີບ ເປັນຄົນທີ່ດໍາລົງຊີວິດ ແລະ ປະກອບອາຊີບໃນຕົວເມືອງໃຫຍ່ ໃນຊ່ວງໄລຍະ 2 ເດືອນ (ເດືອນພຶດສະພາ ແລະ ເດືອນມີຖຸນາ 2020).

ໂດຍລັດຖະບານຈະມີນະໂຍບາຍຫຼຸດຜ່ອນ ຫຼື ຍົກເວັ້ນການເກັບອາກອນຈາກຜູ້ປະກອບການ. ຜົນຂອງກອງປະຊຸມໃນມື້ວານນີ້ ແມ່ນຈະໄດ້ນໍາສະເໜີຕໍ່ກອງປະຊຸມປະຈໍາເດືອນຂອງລັດຖະບານ ທີ່ຈະຈັດຂຶ້ນໃນວັນທີ 23 ເມສາ 2020 ທີ່ຈະມາເຖິງນີ້.

ຂ່າວ: ວຽງຈັນທາຍ