ຊົມເຊີຍ! ເມືອງຫີນບູນ ສຸມໃສ່ສີດຢາຂ້າເຊື້ອຕາມສູນທີ່ປິດການກັກກັນ ສົ່ງແຮງງານກັບບ້ານໄດ້ແລ້ວ

ຊົມເຊີຍ! ເມືອງຫີນບູນ ສຸມໃສ່ສີດຢາຂ້າເຊື້ອຕາມສູນທີ່ປິດການກັກກັນ ສົ່ງແຮງງານກັບບ້ານໄດ້ແລ້ວ

26th April 2020 0 By Education

ໃນວັນທີ 24 ເມສາ 2020 ທ່ານ ເທວາ ສີໂສພາ ຮອງເຈົ້າເມືອງ ທັງເປັນຫົວໜ້າຄະນະສະເພາະກິດປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ຂັ້ນເມືອງຫີນບູນ ແຂວງ ຄໍາມ່ວນ ໃຫ້ຮູ້ວ່າ: ພາຍຫຼັງທີ່ໄດ້ຮັບບັນດາມະຕິ, ຄຳສັ່ງ ແລະ ບັນດາແຈ້ງການຕ່າງໆຈາກຂັ້ນເທິງ ເມືອງຫີນບູນກໍ່ໄດ້ຈັດສັນສະຖານທີ່ບ່ອນຮອງຮັບໃຫ້ແກ່ຜູ້ທີ່ກັບຈາກເຂດທີ່ມີຄວາມສ່ຽງ ໂດຍໄດ້ຈັດສັນຕາມຈຳນວນຄົນໜ້ອຍ-ຫຼາຍ ເຊິ່ງບາງບ້ານແມ່ນມີເຖິງ 2-3 ສູນ ເຊິ່ງໃນທົ່ວເມືອງມີບ້ານທັງໝົດຈໍານວນ 100 ບ້ານ.

ໃນນັ້ນບ້ານທີ່ມີສູນກັກກັນຈໍານວນ 80 ບ້ານ, ລວມມີສູນກັກກັນທັງໝົດ 93 ສູນ, ມີຈຳນວນຄົນເຂົ້າສູນກັກນກັນສະສົມຈຳນວນ 2.035 ຄົນ. ໃນນີ້ກັບມາຈາກປະເທດໄທໂດຍຜ່ານດ່ານສາກົນ 667 ຄົນ, ບໍ່ຜ່ານດ່ານສາກົນຈຳນວນ 695 ຄົນ, ມາຈາກນະຄອນຫຼວງວຽງຈັນ ແລະ ແຂວງຕ່າງໆ 673 ຄົນ. ຜ່ານການກັກກັນຕິດຕາມອາການຄົບ 14 ວັນ ມາຮອດວັນທີ 24 ເມສາ2020 ຈໍານວນສູນໃນທົ່ວເມືອງຍັງເຫຼືອ 5 ສູນ ແລະ ຈໍານວນຄົນກັກກັນຍັງເຫຼືອ 27 ຄົນ.

ສຳລັບການຕິດຕາມ, ກວດກາອາການຂອງບັນດາສູນຕ່າງໆ ທ່ານ ດຣ ຄຳສົມຕາ ອິນແປງມະນີ ຫົວໜ້າຫ້ອງການສາທາລະນະສຸກ ທັງເປັນຮອງຫົວໜ້າຄະນະສະເພາະກິດຂັ້ນເມືອງກ່າວວ່າ: ຄະນະທີມງານແພດ-ໝໍຂອງເມືອງໄດ້ລົງຕິດຕາມອາການຢູ່ບັນດາສູນຕ່າງໆຢ່າງເປັນປົກກະຕິ ໂດຍມີເຄື່ອງວັດແທກອຸນຫະພູມລົງວັດແທກໃນແຕ່ລະມື້ ໃນນັ້ນພົບກໍລະນີທີ່ມີອາການເຂົ້າກັບນິຍາມຂອງໂຄວິດ-19 ຈໍານວນ 2 ຄົນຄື: ຢູ່ສູນບ້ານຈຸດສອງ 1 ກໍລະນີ ແລະ ສູນບ້ານໜອງຜື 1 ກໍລະນີ, ກໍລະນີທີ 1 ແມ່ນໄດ້ເກັບເອົາຕົວຢ່າງເພື່ອສົ່ງໄປກວດ ແລະ ກໍລະນີທີ 2 ໄດ້ນຳສົ່ງໄປກັກກັນເພື່ອຕິດຕາມອາການຢູ່ຂັ້ນແຂວງ ຜ່ານການກວດທັງ 2 ກໍລະນີແມ່ນບໍ່ມີຜູ້ຕິດເຊື້ອ.

ທ່ານ ດຣ ຄຳສົມຕາ ອິນແປງມະນີ ກ່າວຕື່ມວ່າ: ສຳລັບແຜນການໃນຕໍ່ໜ້ານີ້ແມ່ນໄດ້ເລັ່ງໃສ່ການສີດຢາຂ້າເຊື້ອຕາມບັນດາສູນທີ່ໄດ້ປິດການກັກກັນ ພ້ອມທັງສືບຕໍ່ຕິດຕາມກວດກາບັນດາສູນທີ່ຍັງເຫຼືອຢ່າງເປັນປົກກະຕິ.