ກຽມເຮ! ຫຼັງວັນທີ 3ພຶດສະພາ ມີຄວາມຫວັງຈະໄດ້ກັບມາໃຊ້ຊີວິດປົກກະຕິ ເພາະລັດຖະບານໄດ້ພິຈາລະນາໂຍະຍານບາງມາດຕະການແດ່ແລ້ວ

ກຽມເຮ! ຫຼັງວັນທີ 3ພຶດສະພາ ມີຄວາມຫວັງຈະໄດ້ກັບມາໃຊ້ຊີວິດປົກກະຕິ ເພາະລັດຖະບານໄດ້ພິຈາລະນາໂຍະຍານບາງມາດຕະການແດ່ແລ້ວ

28th April 2020 0 By Education

ຄວາມຫວັງການໃຊ້ຊີວິດແບບປົກກຕິ, ໂດຍສະເພາະແມ່ນຜູ້ຫາເຊົ້າກິນຄໍ່າ, ແມ່ຄ້າຊາວຂາຍ ເລີ່ມໃກ້ເຂົ້າມາ ຫຼັງຕ້ອງໄດ້ປະຕິບັດມາດຕະການຕ້ານໂຄວິດ-19ຢ່າງເຂັ້ມງວດ ເພາະມາຮອດປັດຈຸບັນ ລາວເຮົາບໍ່ມີກໍລະນີຜູ້ຕິດເຊື້ອເພີ່ມເປັນເວລາ 2ອາທິດກວ່າແລ້ວ ແລະ ຫຼ້າສຸດມື້ນີ້ ວັນທີ 28 ເມສາ 2020 ລັດຖະບານກໍ່ໄດ້ມີກອງປະຊຸມປຶກສາຫາລືຫຼາຍບັນຫາສໍາຄັນຕໍ່ມາດຕະການຕ້ານໂຄວິດ-19 ຫຼື ການໂຍະຍາຍຜ່ອນຜັນບາງມາດຕະການລົງເພື່ອໃຫ້ປະຊາຊົນສາມາດອອກມາທໍາມາຫາກິນໄດ້.

ໃນຕອນເຊົ້າຂອງວັນທີ 28 ເມສາ 2020 ທີ່ສໍານັກງານນາຍົກລັດຖະ ມົນຕີ ໄດ້ຈັດກອງປະຊຸມນາຍົກ-ຮອງນາຍົກລັດຖະມົນຕີ ເພື່ອປຶກສາຫາລືກ່ຽວກັບວຽກງານສະກັດກັ້ນ, ຄວບຄຸມ ແລະ ແກ້ໄຂການແຜ່ລະ ບາດຂອງ ໂຄວິດ 19 ແລະ ການແກ້ໄຂຜົນກະທົບທາງດ້ານເສດຖະ ກິດຈາກການລະບາດຂອງພະຍາດ ໂຄວິດ-19 ໂດຍການເປັນປະທານຂອງທ່ານ ທອງລຸນ ສີສຸລິດ ນາຍົກລັດຖະມົນຕີ, ມີບັນດາທ່ານຮອງນາຍົກລັດຖະມົນຕີ, ບັນດາທ່ານ ລັດຖະມົນຕີ ກະຊວງກ່ຽວຂ້ອງ, ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງ ພະຍາດ ໂຄວິດ-19 ແລະ ຄະນະສະເພາະກິດດ້ານເສດຖະກິດ ເພື່ອແກ້ໄຂຜົນກະທົບຈາກການແຜ່ລະບາດ ຂອງພະຍາດ ໂຄວິດ-19 ເຂົ້າຮ່ວມ.

ກອງປະຊຸມ ໄດ້ພິຈາລະນາ ແລະ ມີທິດຊີ້ນຳຕໍ່ບັນຫາສຳຄັນ ດັ່ງນີ້:

1 ກອງປະຊຸມ ໄດ້ພິຈາລະນາບົດລາຍງານກ່ຽວກັບສະພາບການປ້ອງກັນ, ຄວບຄຸມ ແລະ ມາດຕະການຮັບມືການລະບາດຂອງພະຍາດ ໂຄວິດ-19, ທິດທາງໃນຕໍ່ໜ້າ, ການປະເມີນຄວາມສ່ຽງແຕ່ລະແຂວງ, ແຜນການ ຜ່ອນຜັນບາງມາດຕະການ ແລະ ການສືບຕໍ່ປະຕິບັດບາງມາດຕະການ ພາຍຫຼັງວັນທີ 3 ພຶດສະພາ 2020 ໂດຍຈະຈັດຕັ້ງປະຕິບັດເປັນແຕ່ລະໄລຍະ ເປັນຕົ້ນ ການອະນຸຍາດໃຫ້ສໍານັກງານ, ອົງການ, ບັນດາບໍລິສັດ ເປີດດໍາເນີນການ; ການອະນຸຍາດໃຫ້ປະຊາຊົນ, ພະນັກງານ-ລັດຖະກອນ, ທະຫານຕໍາຫຼວດ ສາມາດອອກຈາກ ເຮືອນ ແລະ ເດີນທາງພາຍໃນແຂວງ ໂດຍຮັບປະກັນມາດຕະການປ້ອງກັນການຕິດເຊື້ອ.

ພາບປະກອບຂ່າວເທົ່ານັ້ນ

ການຈັດຝຶກອົບຮົມ, ການປະຊຸມທາງການ, ກິດຈະກຳທາງສາສະໜາ ແລະ ກິດຈະກຳອື່ນໆ; ການອະນຸຍາດໃຫ້ເປີດດໍາເນີນກິດຈະການຂອງບັນດາບໍລິສັດ, ໂຮງງານ ແລະ ໂຄງການໃຫຍ່ ທີ່ປະຕິບັດຖືກຕ້ອງສອດຄ່ອງຕາມເງື່ອນ ໄຂ ແລະ ມາດຕະການປ້ອງກັນ ຕາມຂໍ້ແນະນໍາຂອງ ຄະນະສະເພາະກິດ ເລກທີ 031/ສພກ, ການສືບຕໍ່ປິດບາງກິດຈະການ, ການເປີດໂຮງ ຮຽນ, ການປິດດ່ານຊາຍແດນ ແລະ ອື່ນໆ.

ກອງປະຊຸມ ສະແດງຄວາມຊົມເຊີຍຕໍ່ຄະນະສະເພາະກິດ ເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງເຊື້ອພະຍາດ ໂຄວິດ-19 ແລະ ທຸກພາກສ່ວນທີ່ກ່ຽວຂ້ອງທີ່ໄດ້ເອົາໃຈໃສ່ປະຕິບັດວຽກງານຂອງຕົນ ດ້ວຍຄວາມຮັບ ຜິດຊອບສູງ ແລະ ໄດ້ສຸມໃສ່ຄົ້ນຄວ້າ ກະກຽມ ມາດຕະການຕ່າງໆ ທີ່ຈະປະຕິບັດພາຍຫຼັງ ວັນທີ 03 ພຶດສະພາ 2020.

ພາບປະກອບຂ່າວເທົ່ານັ້ນ

ພ້ອມກັນນີ້, ກອງປະຊຸມ ໄດ້ຊີ້ນໍາໃຫ້ຄະນະສະເພາະກິດເພື່ອປ້ອງກັນ, ຄວບຄຸມ ແລະ ແກ້ໄຂການລະບາດຂອງ ເຊື້ອພະ ຍາດ ໂຄວິດ-19 ປັບປຸງລາຍງານດັ່ງກ່າວ ໃຫ້ມີເນື້ອໃນລະອຽດ, ຄົບ ຖ້ວນ, ຈະແຈ້ງ ຕາມການປະກອບຄໍາເຫັນຂອງກອງປະຊຸມ ໂດຍສະ ເພາະກ່ຽວກັບການປະເມີນຄວາມສ່ຽງ; ທິດທາງໃນຕໍ່ໜ້າ ໃຫ້ກຳນົດລະອຽດຊັດເຈນ, ບໍ່ໃຫ້ມີຊ່ອງຫວ່າງໃນການຕີຄວາມໝາຍ; ບັນດາມາດຕະການຜ່ອນຜັນຊົ່ວຄາວ ທີ່ຈະຈັດຕັ້ງປະຕິບັດພາຍຫຼັງວັນທີ 3 ພຶດສະພາ 2020 ໂດຍກຳນົດເປັນແຕ່ລະໄລຍະ ໃນເງື່ອນໄຂບໍ່ມີກໍລະນີຕິດເຊື້ອໃໝ່ ແລະ ມາດຕະການຈະສືບຕໍ່ປະຕິບັດ ຖ້າມີກໍລະນີຕິດເຊື້ອໃໝ່ເກີດຂຶ້ນ. ຫຼັງຈາກນັ້ນ ນຳສະເໜີລາຍງານຕໍ່ກອງປະຊຸມກົມການເມືອງສູນກາງພັກ ພິຈາລະນາ ແລະ ມີທິດຊີ້ນໍາໃນຂັ້ນຕໍ່ໄປ.

ພາບປະກອບຂ່າວເທົ່ານັ້ນ

2 ກອງປະຊຸມ ໄດ້ພິຈາລະນາຮ່າງບົດລາຍງານກ່ຽວກັບ ມາດຕະການແກ້ໄຂຜົນກະທົບທາງດ້ານເສດຖະກິດ ຈາກການແຜ່ລະບາດເຊື້ອພະ ຍາດໂຄວິດ-19 ໂດຍລົງເລິກບາງນະໂຍບາຍ ແລະ ມາດຕະການທີ່ຍັງບໍ່ທັນໄດ້ກຳນົດອອກຢ່າງຊັດເຈນ ຕາມການຊີ້ນຳຂອງກອງປະຊຸມລັດຖະບານຄັ້ງວັນທີ 23 ເມສາ 2020 ເປັນຕົ້ນ ນະໂຍບາຍອຸດໜູນແຮງງານ ຢູ່ໃນ ແລະ ນອກລະບົບປະກັນສັງຄົມ.

ນະໂຍບາຍພາກປະຊາຊົນ ທີ່ຕິດພັນກັບການຫຼຸດຄ່າໄຟຟ້າ ແລະ ນ້ຳປະປາ, ການແກ້ໄຂອຸປະສັກການຂົນສົ່ງ ແລະ ຈໍລະຈອນສິນຄ້າພາຍໃນປະເທດ ແລະ ການນຳເຂົ້າ-ສົ່ງອອກ ສິນຄ້າຢູ່ບັນ ດາດ່ານຊາຍແດນ, ການຊຸກຍູ້ການຜະລິດກະສິກຳ ປູກຝັງ ແລະ ລ້ຽງ ສັດ ເພື່ອເປັນສະບຽງອາຫານ ແລະ ເປັນສິນຄ້າ, ການຟື້ນຟູຂະແໜງການບໍລິການ ແລະ ການທ່ອງທ່ຽວ, ນະໂຍບາຍດ້ານການເງິນ, ເງິນຕາລວມທັງການສົ່ງເສີມທຸລະກິດຂະໜາດນ້ອຍ ແລະ ຂະໜາດກາງ, ການແກ້ໄຂໜີ້ສິນຕ່າງປະເທດ ແລະ ຂໍ້ສະເໜີຈຳນວນໜຶ່ງ ຂອງພາກທຸລະກິດ.

ພາບປະກອບຂ່າວເທົ່ານັ້ນ

ກອງປະຊຸມໄດ້ມີທິດຊີ້ນຳ ໃຫ້ຄະນະສະເພາະກິດດ້ານເສດຖະກິດ ເພື່ອແກ້ໄຂຜົນກະທົບຈາກ ການແຜ່ລະບາດຂອງພະຍາດ ໂຄວິດ-19 ສົມທົບກັບພາກສ່ວນກ່ຽວຂ້ອງ ຄົ້ນຄວ້າລົງເລິກລາຍລະອຽດບາງຈຸດ ເພື່ອຮັບປະກັນວ່ານະໂຍບາຍທີ່ວາງອອກ ສາມາດຈັດຕັ້ງປະຕິບັດໄດ້ ຢ່າງມີປະສິດທິຜົນ ແລ້ວປັບປຸງຮ່າງບົດລາຍງານດັ່ງກ່າວ ຕາມການປະກອບຄຳເຫັນຂອງກອງປະຊຸມ ໃຫ້ມີເນື້ອໃນກະທັດຮັດ, ຄົບຖ້ວນ ແລະ ຈະແຈ້ງ ເພື່ອນໍາສະເໜີ ຕໍ່ກອງປະຊຸມກົມການເມືອງສູນກາງພັກພິຈາລະນາ ແລະ ມີທິດຊີ້ນໍາໃນຂັ້ນຕໍ່ໄປ.

ຂ່າວ; ພາບ: ກົມປະຊາສຳພັນ ສນຍ