ກວ່າຊິມາຮອດມື້ນີ້ບໍແມ່ນຂອງງ່າຍ! ຈາກນັກຮຽນເກັ່ງລະດັບຊາດສູ່ເຈົ້າຂອງປຶ້ມສູດເຄມີເຫຼັ້ມທໍາອິດຂອງລາວ

ກວ່າຊິມາຮອດມື້ນີ້ບໍແມ່ນຂອງງ່າຍ! ຈາກນັກຮຽນເກັ່ງລະດັບຊາດສູ່ເຈົ້າຂອງປຶ້ມສູດເຄມີເຫຼັ້ມທໍາອິດຂອງລາວ

29th April 2020 0 By Education

ຄົນທີ່ເກັ່ງແທ້ຄືຄົນທີ່ສາມາດຖ່າຍທອດຄວາມຮູ້ໃຫ້ຄົນອື່ນ, ສາມາດຈົດບັນທຶກສິ່ງທີ່ເປັນປະໂຫຍດ ເພື່ອກະຈາຍຕໍ່ໃຫ້ຄົນລຸ້ນຫຼັງທີ່ມັກຮັກໃນສິ່ງນັ້ນໆ ແລະ ທ້າວ ຢໍ້ຫາ ສິງຢົງເຊັ້ງ ຫຼື ອ.ຈ ໂຢ ເປັນຄົນໜຶ່ງທີ່ເຮັດໄດ້ ຍ້ອນເພິ່ນມີຄວາມຮັກ ຄວາມເຂົ້າໃຈທີ່ທ່ອງແທ້ໃນສາຍນັ້ນໆ.

ຢໍ້ຫາ ສິງຢົງເຊັ້ງ ຫຼື ອ.ຈ ໂຢ ມີຖານຖິ່ນກໍາເນີດ ຢູ່ບ້ານ ຜາງ້ວນ ເມືອງ ໝອງແຮດ ແຂວງຊຽງຂວາງເຂົ້າຮຽນຊັ້ນປະຖົມທີ່ ໂຮງຮຽນ ປະຖົມສົມບູນຍອດງື່ມ, ເຂົ້າຮຽນຊັ້ນມັດທະຍົມຕອນຕົ້ນ ທີ່ ມ.ສ ໜອງເປັດ ແລະ ເປັນຕົວແທນແຂວງຊຽງຂວາງເຂົ້າຮ່ວມສອບເສັງນັກຮຽນເກັ່ງລະດັບຊາດ ວິຊາ ເຄມີສາດ ມ.4 ສົກຮຽນ 2011-2012 ໂດຍໄດ້ຮັບລາງວັນຊົມເຊີຍ.

ຢໍ້ຫາ ໄດ້ມີໂອກາດ ໄປເຂົ້າຮຽນຢູ່ຫ້ອງຮຽນພອນສະຫວັນ ມ.ສ ສັນຕິພາບ ແຂວງ ຫຼວງພະບາງ ໂດຍ ໄດ້ເປັນຕົວແທນແຂວງ ຫຼວງພະບາງ ເຂົ້າຮ່ວມສອບເສັງນັກຮຽນເກັ່ງລະດັບຊາດ ວິຊາ ເຄມີສາດ ມ.7 ສົກຮຽນ 2014-2015 ແຕ່ ໃນຄັ້ງນີ້ ລາວກໍຜິດຫວັງເໝືອນເດີມ ແລະ ໃນປີນັ້ນ ຢໍ້ຫາ ສາມາດສອບເສັງຈົບຊັ້ນ ມ.7 ໄດ້ ອັນດັບ ທີ່ 3 ຂອງ ແຂວງ ຫຼວງພະບາງ ໂດຍໄດ້ 71ຄະແນນ; ຢໍ້ຫາ ຕັດສິນໃຈຂໍທຶນຮຽນຕໍ່ໃນສາຂາຄູເຄມີສາດ ແລະ ໄດ້ຮັບທຶນຮຽນຕໍ່ຢູ່ທີ່ ມຊ ໂດຍລາວມີຄວາມຫວັງວ່າຈະກຽມຕົວເພື່ອສອບເສັງເອົາທຶນລັດຖະບານຢີ່ປຸ່ນ.

ຫລັງຈາກທີ່ໄດ້ຮຽນຢູ່ ມ.ຊ ເປັນເວລາ 5 ເດືອນ ລາວກໍໄດ້ສອບເສັງເອົາທຶນລັດຖະບານຍີ່ປຸ່ນ ໂດຍສາມາດເສັງຕິດ 1 ໃນ 16 ຄົນຈາກທົ່ວປະເທດ ແລະ ໄດ້ເຂົ້າໄປສຳພາດ ແຕ່ຮອດຂັ້ນຕອນສຸດທ້າຍແມ່ນບໍ່ຜ່ານ ເລີຍຜິດຫວັງອີກຄັ້ງ (ຮ້ອງໄຫ້ 2 ມື້) ແຕ່ພໍມາຄິດທົບທວນແລ້ວ ຈຶ່ງຮູ້ວ່າການຮຽນຄູເຄມີ ແລະ ຮຽນໃນສິ່ງທີ່ຕົນເອງມັກນີ້ຖືວ່າເປັນສິ່ງທີ່ດີ ແລະ ອາດຈະສ້າງປະໂຫຍດໃຫ້ກັບສັງຄົມໄດ້ຫລາຍຄືກັນ ເຊິ່ງຕົວເອງກໍມີຄວາມສຸກ ເລີຍເອົາໃຈໃສ່ເຕັມທີກັບການຮຽນໃນ ມ.ຊ ຕໍ່

ຍ້ອນຄວາມຕັ້ງໃຈໃນການຮໍ່າຮຽນ ແລະ ເສັງໄດ້ຄະແນນດີ ໃນປີ1 ຈຶ່ງໄດ້ຮັບທຶນ NaGaO ຊຶ່ງເປັນທຶນການຊ່ວຍເຫຼືອຂອງລັດຖະບານຢີ່ປຸ່ນ ຈົນຮຽນຈົບ ມຊ ໃນສາຂາ ຄູເຄມີສາດ ສົກຮຽນ 2018-2019 ດ້ວຍຄະແນນ 3,61 (ເກຣດ B+).

ໃນໄລຍະເວລາທີ່ຮຽນ ປີ 1- ປີ4 ຢໍ້ຫາ ໄດ້ສອນບຳລຸງພິເສດໃຫ້ນັກຮຽນ ມ.4 ແລະ ມ.7 ເຮັດໃຫ້ນັກຮຽນສາມາດເຂົ້າຮ່ວມສອບເສັງນັກຮຽນເກັ່ງລະດັບເມືອງ, ແຂວງ ແລະ ລະດັບຊາດ ຫຼາຍຄົນ ພິເສດແມ່ນນ້ອງຊາຍແທ້ໆຂອງລາວ 2 ຄົນ ເຊິ່ງຜູ້ອ້າຍສາມາດສອບເສັງໄດ້ທີ1 ຂອງເມືອງແປກ, ທີ1 ຂອງແຂວງ ຊຽງຂວາງ ທີ 4 ໃນລະດັບຊາດ ແລະ ຜູ້ນ້ອງສອບເສັງໄດ້ທີ 2 ຂັ້ນເມືອງ ວິຊາ ເຄມີສາດ.

ໃນໄລຍະພັກແລ້ງຂອງແຕ່ລະປີຈະຮວມຕົວກັບຄູ ອາຈານ ແລະ ໝູ່ເພື່ອນອະດີດນັກຮຽນເກັ່ງຫລາຍໆຄົນເປີດສອນພິເສດ, ໃຫ້ຄຳແນະນຳ ແລະ ເທັກນິກການແກ້ຂໍ້ສອບກຽມເຂົ້າມະຫາໄລຕ່າງໆໃນປະເທດລາວ ແລະ ສອບເສັງໄປຕ່າງປະເທດ

ເລີ່ມຂຽນປຶ້ມກ່ຽວກັບເຄມີ ແລະ ຄະນິດສາດ ຫລາຍໆເຫລັ້ມ ເລີ່ມແຕ່ຕອນທີ່ຮຽນປີ 3 ເຊັ່ນ: ປຶ້ມປະກອບການຮຽນ ມ.1-7 , ປຶ້ມກຽມເສັງນັກຮຽນເກັ່ງ, ປຶ້ມກຽມເສັງເຂົ້າມະຫາວິທະຍາໄລ ແລະ ອື່ນໆ ແຕ່ບໍ່ໄດ້ພິມອອກຈຳໜ່າຍເພາະໃນການພິມອອກຕ້ອງໃຊ້ງົບປະມານຈຳນວນຫຼາຍສິບລ້ານ ແຕ່ຍ້ອນຄວາມໃຝ່ຝັນ ທີ່ຈະໄດ້ເງິນມາສ້າງປຶ້ມດີໆໃຫ້ກັບນ້ອງນ້ອຍເຍົາວະຊົນລາວເຮົາໄດ້ຊົມໃຊ້ໄປໃນອີກຫລາຍສິບປີ ຊຶ່ງຖ້າເຮັດໄດ້ມັນຄືຄວາມພູມໃຈທີ່ສຸດຂອງລາວ ລາວຈຶ່ງໄດ້ເຮັດວຽກເສີມ, ຂາຍເຄື່ອງ, ສອນພິເສດ ຄ່ອຍໆຫາເງີນເກັບອອມ ຮຽນໄປນຳຫາເງິນສົ່ງຕົວເອງຮຽນ ແລະ ເກັບອອມເພື່ອພິມປຶ້ມໄປນຳ ພໍຮຽນຈົບປີ 4 ສົກຮຽນ 2018-2019 ກໍໄດ້ຕີພິມເຂົ້າເຫລັ້ມ ປຶ້ມຫົວທຳອິດ ຄື: ປຶ້ມ ລວມສູດເຄມີສາດ ຈຳນວນ 2000ຫົວ (20ລ້ານກີບ).

ເຊິ່ງເປັນປຶ້ມສູດເຄມີ ຫົວທຳອິດຂອງປະເທດລາວ ເຊຶ່ງກໍຖືວ່າໄດ້ຮັບການສະໝັບສະໜູນຈາກຄູອາຈານ ແລະ ນັກຮຽນຈຳນວນຫລາຍ ສາມາດ ຂາຍໄດ້ 1000 ເຫລັ້ມພາຍໃນ 1 ເດືອນ ນອກຈາກນີ້ ຢໍ້ຫາຍັງໄດ້ສ້າງຕັ້ງສູນສອນອອນໄລນ໌ ຊຶ່ງເປັນສູນທີ່ສອນກ່ຽວກັບການຈັດການຮຽນ-ການສອນທາງອອນລາຍ ການສ້າງຄອສ໌ອອນລາຍຕ່າງໆ ບໍ່ວ່າຈະເປັນການສອນທັກສະດ້ານຄອມພີວເຕີ, ພາສາ, ຄະນິດສາດ, ເຄມີສາດ, ຟີຊິກສາດ ແລະ ອຶ່ນໆ ແລະ ທີ່ສໍາຄັນ ພາຍຫຼັງທີ່ໄດ້ເຮັດວີດີໂອແນະນໍາວິທີການຮຽນຕ່າງໆ ລົງທາງເຟສບຸກ ແມ່ນໄດ້ຮັບກະແສຕອບຮັບທີ່ດີຈາກສັງຄົມເປັນຈໍານວນຫຼາຍ ເຊິ່ງໃນປັດຈຸບັນ ຢໍ້ຫາມີຜູ້ຕິດຕາມເຟສບຸກ ເຖິງ 3 ໝື່ນກວ່າຄົນ, ບາງວີດີໂອ ມີຍອດຜູ້ຮັບຊົມ ສູງເຖິງ 6 ແສນກວ່າວິວ, ຍອດແຊຣ 1 ໝື່ນກວ່າຄັ້ງ.

ພາຍຫຼັງຮຽນຈົບປະລິຍາຕີຈາກ ມຊ ແມ່ນຍັງບໍ່ທັນໄດ້ໄປສະໝັກວຽກເທື່ອ ແຕ່ກໍເປັນຄູຮັບເຊີນສອນບຳລຸງນັກຮຽນເກັ່ງໃຫ້ໂຮງຮຽນຕ່າງໆ ແລະ ນ້ອງໆນັກຮຽນຫຼາຍໆຄົນ ເຊິ່ງສາເຫດທີ່ຍັງບໍ່ທັນໄປສະໝັກວຽກປະຈຳ ເພາະຍັງຕ້ອງການຮຽນຮູ້ທັກສະດ້ານຄອມພິວເຕີ ເວັບໄຊຕ໌ ໂປຣແກຣມຕ່າງໆທີ່ຈະຊ່ວຍພັດທະນາລະບົບການສຶກສາທາງໄກ (ການຮຽນ-ການສອນ online) ແລະ ຍັງພະຍາຍາມຫາທຶນເພຶ່ອຮຽນຕໍ່ປະລິຍາໂທກ່ຽວກັບດ້ານການສອນ ແລະ ດ້ານຄອມພິວເຕີຕື່່ມອີກ.

ບອກໄດ້ເລີຍວ່າ ບ່າວຄົນນີ້ເປັນຄົນທີ່ມີຄວາມຮູ້, ຄວາມສາມາດ ແລະ ມີຄວາມມານະອົດທົນ ເຖິງແມ່ນ ລາວ ຈະຜິດຫວັງກັບການສອບເສັງນັກຮຽນເກັ່ງລະດັບຊາດ ແຕ່ລາວ ກໍາສາມາດ ຝຶກຝົນຕົນເອງ ຈົນສາມາດປະສົບຜົນສໍາເລັດໃນຫຼາຍໆເລື່ອງໃນປັດຈຸບັນ ເຊິ່ງຖືວ່າເປັນຕົວຢ່າງທີ່ໆ ໃຫ້ກັບນ້ອໆຫຼາຍຄົນໄດ້ປະຕິບັດຕາມ.

ທີ່ມາ: GooD Students in LPB ນັກຮຽນເກັ່ງ ແຂວງຫຼວງພະບາງ