ຄະນະແພດ-ໝໍ ແຂວງຫລວງພະບາງ ເອກອ້າງທະນົງໃຈຕໍ່ໄຊຊະນະການປິ່ນປົ່ວ ພະຍາດໂຄວິດ-19

ຄະນະແພດ-ໝໍ ແຂວງຫລວງພະບາງ ເອກອ້າງທະນົງໃຈຕໍ່ໄຊຊະນະການປິ່ນປົ່ວ ພະຍາດໂຄວິດ-19

30th April 2020 0 By Education

ປັດຈຸບັນ ໜຶ່ງໃນຜູ້ແບກຫາບພາລະອັນໜັກໜ່ວງໃນການຕໍ່ສູ້ກັບພະຍາດໂຄວິດ-19 ແມ່ນບຸກຄະລາກອນແພດ ທີ່ພວກເຮົາໃຫ້ນາມມະຍົດພວກເພິ່ນວ່ານັກຮນົບຊຸດຂາວ ຜູ້ມີຄວາມເສຍສະລະ ແລະ ຮັບຜິດຊອບອັນສູງສົ່ງຕໍ່ໜ້າທີ່ ແລະ ປະຕິບັດໄດ້ປະສົບຜົນສໍາເລັດຢ່າງສວຍງາມ ສາມາດປິ່ນປົວຄົນເຈັບຜູ້ປ່ວຍຕິດໂຄວິດ-19 ໃນ ສປປ ລາວ ໃຫ້ຫາຍດີອອກໂຮງໝໍໄດ້ແລ້ວ 8ຄົນ.

ແຫລ່ງຂ່າວຈາກໂຮງໝໍແຂວງຫລວງພະບາງ ແຈ້ງໃຫ້ຮູ້ ໃນວັນທີ 30 ເມສາ 2020 ນີ້ວ່າ: ມື້ນີ້, ຄະນະອຳນວຍການ ໂຮງໝໍແຂວງຫລວງພະບາງ ຕະຫລອດຮອດພະນັກງານແພດໝໍທຸກໆຄົນ ມີຄວາມພາກພູມໃຈ ແລະ ມີຄວາມເອກອ້າງທະນົງໃຈຫາອັນໃດປຽບບໍ່ໄດ້ ຕໍ່ໄຊຊະນະການປີ່ນປົວພະຍາດໂຄວິດ-19 ຄັ້ງປະຫວັດສາດອັນຍິ່ງໃຫຍ່ຂອງນັກຮົບເສື້ອຂາວ ທີ່ໄດ້ຮ່ວມແຮງຮ່ວມໃຈ ທີ່ໄດ້ຄຽງບ່າຄຽງໄຫລ່ກັນເຂົ້າຮ່ວມສະໜາມຮົບ ສົງຄາມຕີຕ້ານສັດຕູຕົວຮ້າຍກາດທີ່ເບິ່ງບໍ່ເຫັນ.

ນັບແຕ່ຖືກມອບໝາຍໜ້າທີ່ອັນໜັກໜ່ວງ, ແຕ່ມີກຽດສະຫງ່າດ້ວຍມານະຈິດແພດປະຕິວັດ, ອ້າຍເອື້ອຍນ້ອງແພດ-ໝໍໝົດທຸກຄົນ ໄດ້ສຸມຈິດສຸມໃຈ ແລະ ສຸມສະຕິປັນຍາໃນການເບີ່ງແຍງປີ່ນປົວຄົນເຈັບ ຜູ້ທີ່ຕິດເຊື້ອໂຄວິດ-19 ເປັນເວລາ 1 ເດືອນກວ່າ ຈົນຫາຍດີຈາກພະຍາດຕົວຮ້າຍກາດນີ້ໄດ້ທັງ 3 ຄົນ.

ຕໍ່ຜົນສຳເລັດຄັ້ງນີ້, ຖືເປັນກຳລັງໃຈ, ເປັນຢາວິຕາມິນແກ່ອ້າຍເອື້ອຍນ້ອງນັກຮົບເສື້ອຂາວທຸກຄົນ ເຖິງວ່າວຽກງານຈະລຳບາກໜັກໜ່ວງປານໃດກໍຕາມ ພວກເຮົາກໍ່ໄດ້ພ້ອມພຽງກັນຜ່ານຜ່າອຸປະສັກ ແລະ ຂໍ້ຫຍຸ້ງຍາກຈົນໄດ້ຮັບໄຊຊະນະ, ຄະນະອຳນວຍການ, ພະນັກງານແພດ-ໝໍໝົດທຸກຄົນ ຂໍໃຫ້ຄຳໝັ້ນສັນຍາວ່າ ພວກເຮົາຈະພ້ອມກັນປະຕິບັດໜ້າທີ່ ທີ່ພັກ-ລັດຖະບານມອບໝາຍໃຫ້ ແລະ ໃຫ້ສົມກັບຄຳວ່າ ແພດປະຕິວັດ ຫລື ນັກຮົບເສື້ອຂາວ ເຊິ່ງພວກເຮົາພູມໃຈທີ່ໄດ້ຮັບໃຊ້ຊາດ ແລະ ຮັບໃຊ້ພໍ່ແມ່ປະຊາຊົນບັນດາເຜົ່າ ແລະ ມີກຽດສະຫງ່າ.

ຄະນະອຳນວຍການ ໂຮງໝໍແຂວງຫລວງພະບາງ ຂໍຖືໂອກາດນີ້, ສະແດງຄວາມຂອບໃຈ ແລະ ຮູ້ບຸນຄຸນເປັນຢ່າງສູງ ມາຍັງການນໍາພັກ-ລັດ ທຸກຂັ້ນ ທີ່ໄດ້ເອົາໃຈໃສ່ຊີ້ນໍາ, ໃຫ້ການຕິດຕາມຊຸກຍູ້, ສະໜັບສະໜູນງົບປະມານ, ວັດຖຸອຸປະກອນໃຫ້ແກ່ໂຮງໝໍພວກເຮົາ, ຂອບໃຈ ແລະ ຮູ້ບຸນຄຸນມາຍັງພາກສ່ວນສັງຄົມ, ພໍໍ່ແມ່ປະຊາຊົນຜູ້ໃຈບຸນທັງຫລາຍທີ່ໄດ້ໃຫ້ການບໍລິຈາກອາຫານ, ນໍ້າດື່ມ, ອຸປະກອນການແພດຕ່າງໆ, ລວມທັງເງິນສົດໃຫ້ແກ່ພວກເຮົາ ເພື່ອນໍາໄຊ້ເຂົ້າໃນວຽກງານຕອບໂຕ້ ຕໍ່ການລະບາດພະຍາດໃນຄັ້ງນີ້ ຈົນໄດ້ຮັບຜົນສຳເລັດຢ່າງຈົບງາມ.

ທີ່ມາ: ປະເທດລາວ