ອ່ານກ່ອນ! ກໍລະນີການກວດພົບເຊື້ອໂຄວິດ-19 ຄືນໃໝ່ຢູ່ໜຶ່ງໃນຜູ້ປ່ວຍທີ່ອອກໂຮງໝໍນັ້ນ ແມ່ນບໍ່ສາມາດແຜ່ເຊື້ອໄດ້ແລ້ວ

ອ່ານກ່ອນ! ກໍລະນີການກວດພົບເຊື້ອໂຄວິດ-19 ຄືນໃໝ່ຢູ່ໜຶ່ງໃນຜູ້ປ່ວຍທີ່ອອກໂຮງໝໍນັ້ນ ແມ່ນບໍ່ສາມາດແຜ່ເຊື້ອໄດ້ແລ້ວ

2nd May 2020 0 By Education

ເຊື່ອວ່າຫຼາຍທ່ານຈະຕົກໃຈ ແລະ ກັງວົນບໍ່ໜ້ອຍ ຫຼັງຮູ້ຂ່າວການກວດຫາເຊື້ອໂຄວິດ-19 ຄືນ ຈາກຜູ້ປ່ວຍທີ່ປິ່ນປົວດີ ອອກໂຮງໝໍ ແລ້ວຜົນກວດເປັນບວກ ພົບເຊື້ອໂຄວິດ-19 ນັ້ນ ແຕ່ຂໍໃຫ້ທຸກຄົນອຸ່ນໃຈໄດ້ ທ່ານອໍານວຍການໂຮງໝໍມິດຕະພາບ ແລະ ຫົວໜ້າກົມຄວບຄຸມພະຍາດຕິດຕໍ່ຢືນຢັນວ່າມັນເປັນພຽງການກວດະພົບຊາກເສດເຫຼືອຂອງເຊື້ອໄວຣັດເລັກນ້ອຍເທົ່ານັ້ນ ແລະ ມັນບໍ່ສາມາດແຜ່ເຊື້ອຕໍໄດ້.

ໃນໂອກາດຖະແຫຼງຂ່າວລາຍງານສະພາບການລະບາດຂອງພະຍາດໂຄວິດ-19 ວັນທີ 2 ພຶດສະພາ 2020 ທ່ານ ດຣ ສະໜອງ ຟອງຊະນະ ຜູ້ອໍານວຍການໂຮງໝໍມິດຕະພາບ ໃຫ້ຮູ້ວ່າ: ປັດຈຸບັນມີຄົນເຈັບທີ່ຍັງຢູ່ໂຮງໝໍມິດຕະພາບ 11ຄົນ ແຕ່ຜ່ານການກວດຫາເຊື້ອຄືນພາຍໃນເວລາ 24 ຊົ່ວໂມງ ເຖິງ 2ຄັ້ງ ແມ່ນຜົນກວດເປັນລົບ ຈໍານວນ 2ຄົນ ຈຶ່ງຈະອະນຸຍາດໃຫ້ອອກໂຮງໝໍໄດ້ແຕ່ກໍ່ຍັງຕ້ອງໄດ້ສືບຕໍ່ຕິດຕາມຜູ້ກ່ຽວທັງສອງຢູ່ທີ່ພັກອາໄສຕື່ມອີກ ແລະ ເມື່ອຄົບ 14 ວັນກໍ່ຈະກວດຫາເຊື້ອຄືນອີກເທື່ອໜຶ່ງ, ຫາກຜົນກວດເປັນລົບອີກຄັ້ງ ກໍ່ຈະຖືວ່າພວກກ່ຽວມີຄວາມປອດໄພສາມາດໃຊ້ຊີວິດໃນສັງຄົມຢ່າງປົກກະຕິໄດ້.

ສ່ວນອີກກໍລະນີໜຶ່ງທີ່ອອກໂຮງໝໍໄປກ່ອນໜ້ານີ້, ຫຼັງຜົນກວດຫາເຊື້ອໂຄວິດ-19 ເປັນລົບທັງ 2ຄັ້ງ, ເຊິ່ງຫຼັງອອກໂຮງໝໍຄົບ 14ວັນ ແລ້ວກັບມາກວດຫາເຊື້ອຄືນນັ້ນເຫັນຜົນກວດເປັນບວກ, ດັ່ງນັ້ນ ເພື່ອຄວາມປອດໄພ ຈຶ່ງນໍາເອົາຜູ້ກ່ຽວກັບເຂົ້າມາຕິດຕາມອາການຢູ່ໂຮງໝໍຕື່ມອີກ.

ໃນໂອກາດດຽວກັນ ທ່ານ ຣັດຕະນະໄຊ ເພັດສຸວັນ ຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ກ່າວວ່າ: ການກວດຄືນຜູ້ປ່ວຍຕິດເຊື້ອໂຄວິດ-19 ທີ່ປິ່ນປົວຫາຍດີອອກໂຮງໝໍ ພ້ອມກັກບໍລິເວນຄົບ 14ວັນ ແລ້ວມາກວດຫາເຊື້ອຄືນໃໝ່ ເຊິ່ງຜົນກວດເປັນບວກນັ້ນ ບໍ່ໝາຍຄວາມວ່າຜູ້ກ່ຽວຕິດເຊື້ອຄືນໃໝ່ ເນື່ອງຈາກການກວດພົບນັ້ນເປັນພຽງຊິ້ນສ່ວນ, ຊາກພະຍາດທີ່ຍັງຫຼົງເຫຼືອເທົ່ານັ້ນ ແລະ ຕ້ອງໃຊ້ເວລາທີ່ຈະຖືກຂັບຖ່າຍອອກໄປ, ເຖິງຢ່າງໃດກໍ່ຕາມ ເຖິງແມ່ນວ່າຈະກວດພົບເຊື້ອຄືນ ແຕ່ຜູ້ປ່ວຍບໍ່ສາມາດແຜ່ເຊື້ອໄດ້.

ແຕ່ທັງນີ້ທັງນັ້ນ ກໍ່ຕ້ອງໄດ້ນໍາຄົນເຈັບເຂົ້າມາຈໍາກັດບໍລິເວນຕື່ມ ເພື່ອໃຫ້ທີມແພດໝໍໄດ້ຕິດຕາມຕໍ່ພ້ອມໃຫ້ຢາບໍາລຸງ ແຕ່ກໍ່ເປັນທີ່ແນ່ນອນທີ່ຄົນເຈັບຈະບໍ່ມີອາການຫຍັງແລ້ວ ເນື່ອງຈາກຫາຍດີແລ້ວ ແຕ່ຕ້ອງຕິດຕາມ ພ້ອມກວດຄືນອີກເທື່ອໜຶ່ງເພື່ອໃຫ້ໝັ້ນໃຈໄດ້ວ່າເຊື້ອພະຍາດໝົດອອກຈາກຮ່າງກາຍແລ້ວ.