ວັນ​ວິ​ສະ​ຂະ​ບູ​ຊາ ວັນ​ໜຶ່ງ​ທີ່​ມີ​ຄວາມ​ໝາຍຫຼາຍ​ຂອງ​ຊາວ​ພຸດ

ວັນ​ວິ​ສະ​ຂະ​ບູ​ຊາ ວັນ​ໜຶ່ງ​ທີ່​ມີ​ຄວາມ​ໝາຍຫຼາຍ​ຂອງ​ຊາວ​ພຸດ

6th May 2020 0 By Entertain

ປະຫວັດຄວາມເປັນມາຂອງວັນວິສາຂະບູຊາ ຂື້ນ 15 ຄໍ່າ ເດືອນ 6

ວັນວິສາຂະບູຊາ ຫຍໍ້ມາຈາກ ວິສາຂະປຸຣະນະມີບູຊາ ແປວ່າ: ການບູຊາໃນວັນເພັງເດືອນວິສາຂະ ຖ້າປີໃດມີອະທິກະມາດ ຄື: ມີເດືອນ 8 ສອງຫົນ ກໍເລື່ອນໄປເປັນກາງເດືອນ 7.

ວັນວິສາຂະບູຊາ ເປັນວັນສໍາຄັນຍິ່ງໃນທາງພຣະພຸດທະສາສະໜາ ເພາະເປັນວັນທີ່ພຣະພຸດທະເຈົ້າປຣະສູດ ຄືເກີດ ໄດ້ຕັດສະຮູ້ ຄືສຳເລັດ ໄດ້ປະຣິນິພານ ຄືດັບ ເກີດຂຶ້ນກົງກັນທັງ 3 ວາລະຄື:

1 ວັນ​ປະປຣະສູດ ເມື່ອວັນເພັງເດືອນ 6 ກົງກັບວັນສຸກ ຂຶ້ນ 15 ຄໍ່າ ປີຈໍ ກ່ອນ ພສ 80 ປີ ເປັນປຣະສູດຂອງເຈົ້າຊາຍສິດທັດຖະ ໃຕ້ຕົ້ນສາລະ ທີ່ລຸມພິນີສະຖານ.

ຕັດສະຮູ້ ເມື່ອເຈົ້າຊາຍສິດທັດຖະ ຊົງຜະນວດ (ບວດ) ໄດ້ 6 ປີ ພຣະຊົນມາຍຸ 35 ພັນສາ ຊົງຕັດສະຮູ້ ໃຕ້ຮົ່ມໄມ້ສີມະຫາໂພ ຝັ່ງແມ່ນໍ້າເນຣັນຊະຣາ ເມືອງອຸຣຸເວລາເສນານິຄົມ ໃນຕອນເຊົ້າມື້ວັນພຸດ ຂຶ້ນ 15 ຄໍ່າ ເດືອນ 6 ປີລະກາ ກ່ອນ ພສ 45 ປີ.

2 ການ ຕັດສະຮູ້ ອະຣິຍະສັຈ 4 ຄືຂອງແທ້ອັນປະເສີດ 4 ປະການ ຂອງພຣະພຸດທະເຈົ້າເປັນການຕັດສະຮູ້ອັນສຸດຍອດ ບໍ່ມີຜູ້ປຽບປານ ວັນຕັດສະຮູ້ຂອງພຣະພຸດທະເຈົ້າ ຈຶ່ງຈັດເປັນວັນສຳຄັນ ເພາະເປັນວັນໃຫ້ກໍາເນີດມີ ພຣະພຸດທະເຈົ້າ ຂຶ້ນໃນໂລກ. ທັມທີ່ພຣະພຸດທະອົງຊົງຕັດສະຮູ້ ອະຣິຍະສັຈ 4 ໄດ້ແກ່:

1 ທຸກ ຄື ຄວາມລຳບາກ ຄວາມບໍ່ສະບາຍກາຍ ຄວາມບໍ່ສະບາຍໃຈ.

2 ສະມຸໄທຍ໌ ຄື ເຫດທີ່ເຮັດໃຫ້ເກີດທຸກ.

3 ນິໂຣທ ຄື ຄວາມດັບທຸກ.

4 ມັຄ ຄື ຂໍ້ປະຕິບັດໃຫ້ເຖິງຄວາມດັບແຫ່ງທຸກ.

ທັງ 4 ຂໍ້ນີ້ ຖືເປັນສັດຈະທຳ ເອີ້ນວ່າ: ອະຣິຍະສັຈ ເພາະເປັນສິ່ງທີ່ພຣະອະຣິຍະເຈົ້າຊົງຄົ້ນພົບ ເປັນສັດຈະທໍາຊັ້ນສູງ ປະເສີດກວ່າສັດຈະທໍາສາມັນທົ່ວໄປ.

3 ປະຣິນິພານ ຫຼັງຈາກຕັດສະຮູ້ແລ້ວ ໄດ້ປະກາດພຣະສາສະໜາ ແລະໂຜດເວໄນຍະສັດ ເປັນໄລຍະເວລາ 45 ພັນສາ ພຣະຊົນມາຍຸໄດ້ 80 ພັນສາ ກໍສະເດັດດັບຂັນທະປະຣິນິພານ ເມື່ອວັນອັງຄານ ຂຶ້ນ 15 ຄໍ່າ ເດືອນ 6 ປີ ມະເສັງ ທີ່ ສາລະວະໂນທະຍານ ຂອງມັດລະກະສັດ ເມືອງກຸສິນາຣາ ແຄ້ວນມັດລະ. ການປະຣິນິພານຂອງພຣະພຸດທະເຈົ້າ ນັບໄດ້ວ່າເປັນການສູນເສຍດວງປະທິບຂອງໂລກ ເປັນການສູນເສຍຄັ້ງຍິ່ງໃຫຍ່ ແລະ ຄັ້ງສຳຄັນຂອງຊາວພຸດທົ່ວໄປ ມີຄວາມເສົ້າສະຫຼົດໃຈ ແລະ ອາໄລສຸດຈະພັນລະນາ. ພຣະພຸດທະອົງໄດ້ຊົງສະແດງປັດສິມໂອວາດກ່ອນປະຣິນິພານວ່າ: “ດູກ່ອນ ພິກຂຸທັງຫຼາຍ ອັນວ່າສັງຂານທັງຫຼາຍຍ່ອມມີຄວາມເສື່ອມສະຫຼາຍໄປເປັນທຳມະດາ ທ່ານທັງຫຼາຍຈົ່ງຍັງກິດທັງປວງອັນເປັນປະໂຫຍດຂອງຕົນ ແລະ ປະໂຫຍດຂອງຜູ້ອື່ນໃຫ້ບໍລິບູນດ້ວຍຄວາມບໍ່ປະໝາດເຖີດ” ຫຼັງຈາກນັ້ນກໍສະເດັດດັບຂັນປະຣິນິພານໃນຣາຕີເພັງເດືອນ 6 ນັ້ນ.

ນັບວ່າເປັນເລື່ອງອັດສະຈັນຍິ່ງ ທີ່ເຫດການທັງ 3 ກ່ຽວກັບວິຖີຊີວິດຂອງພຣະສຳມາສຳພຸດທະເຈົ້າ ເຊິ່ງມີໄລຍະເວລາຫ່າງກັນນັບຫຼາຍສິບປີບັງເອີນເກີດຂຶ້ນໃນວັນເພັງເດືອນ 6 ດັ່ງນັ້ນ ເມື່ອເຖິງວັນສຳຄັນຢ່າງນີ້ ຊາວພຸດທັງບັນພະຊິດ ແລະ ຄະລືຫັດ ໄດ້ພ້ອມໃຈກັນປະກອບພິທີບູຊາພຣະພຸດທະອົງ ເປັນກໍລະນີພິເສດ ເພື່ອນ້ອມລຳນຶກເຖິງພຣະກະລຸນາທິຄຸນ ພຣະປັນຍາທິຄຸນ ແລະ ພຣະບໍລິສຸດທິຄຸນ ຂອງພຣະອົງ ຜູ້ເປັນດວງປະທິບຂອງໂລກ.

ສຳລັບການຈັດງານວັນວິສາຂະບູຊາ ປີພຣະພຸດທະສັງກາດ 2563 (2020)

ສູນກາງອົງການພຸດທະສາສະໜາສຳພັນລາວ (ອພສ) ໄດ້ອອກແຈ້ງການ ເຖິງ ພຣະຫຼັກຄໍາ ເຈົ້າຄະນະແຂວງ, ນະຄອນຫຼວງ ໃນຂອບເຂດທົ່ວປະເທດ ກ່ຽວກັບການຈັດງານ ວັນວິສາຂະບູຊາ ປີພຣະພຸດທະສັງກາດ 2563 (2020) ຕາມຄວາມເໝາະສົມ. ດ້ວຍເຫດວ່າສະຖານະການໂຣກລະບາດ ໂຄວິດ 19 ຍັງບໍ່ທັນໄດ້ໝົດໄປເທື່ອ ຈຶ່ງໃຫ້ສືບຕໍ່ປະຕິບັດ ຄຳສັ່ງຂອງນາຍົກລັດຖະມົນຕີ ແຫ່ງ ສປປ ລາວ ສະບັບເລກທີ 06/ນຍ ລົງວັນທີ 29 ມີນາ 2020 ຈົນເຖິງວັນທີ 17 ພຶດສະພາ 2020.

ເພື່ອໃຫ້ໄດ້ທັງຮີດຄອງປະເພນີ ແລະ ຈັດຕັ້ງປະຕິບັດ ຕາມຄຳສັ່ງຂອງນາຍົກລັດຖະມົນຕີ ຈຶ່ງໃຫ້ມີການຈັດງານບຸນວັນວິສາຂະບູຊາ ພຽງເລັກນ້ອຍພາຍໃນວັດຂອງຕົນ ໂດຍໃຫ້ມີການຈັດຕັ້ງປະຕິບັດ ຄື ປະດັບທຸງຊໍ່ທຸງໄຊ ທຸງສັບພັນນະຣັງສີ (ທຸງສາສະໜາ) ທຸງຊາດ ແລະໄຕ້ປະທີບ ທູບທຽນ ຕາມສົມຄວນ ເພື່ອບູຊາສັກກາຣະ ສະຫຼອງວັນວິສາຂະບູຊາ ຕາມຮີດຄອງປະເພນີ ທີ່ເຄີຍກະທຳມາແຕ່ບູຮານນະການ.

ທີ່ມາ: ພຣະຈັນນ້ອຍ ທັມມະວົງ